૮. મણિપૂજકત્થેરઅપદાનં

૩૪. ‘‘ઓરેન હિમવન્તસ્સ, નદિકા સમ્પવત્તથ;

તસ્સા ચાનુપખેત્તમ્હિ, સયમ્ભૂ વસતે તદા.

૩૫. ‘‘મણિં પગ્ગય્હ પલ્લઙ્કં, સાધુચિત્તં મનોરમં;

પસન્નચિત્તો સુમનો, બુદ્ધસ્સ અભિરોપયિં.

૩૬. ‘‘ચતુન્નવુતિતો કપ્પે, યં મણિં અભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૩૭. ‘‘ઇતો ચ દ્વાદસે કપ્પે, સતરંસીસનામકા;

અટ્ઠ તે આસું રાજાનો, ચક્કવત્તી મહબ્બલા.

૩૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મણિપૂજકો થેરો ઇમા ગાથાયો અભાસિત્થાતિ.

મણિપૂજકત્થેરસ્સાપદાનં અટ્ઠમં.