૯. તિકિચ્છકત્થેરઅપદાનં

૩૯. ‘‘નગરે બન્ધુમતિયા, વેજ્જો આસિં સુસિક્ખિતો;

આતુરાનં સદુક્ખાનં, મહાજનસુખાવહો.

૪૦. ‘‘બ્યાધિતં સમણં દિસ્વા, સીલવન્તં મહાજુતિં;

પસન્નચિત્તો સુમનો, ભેસજ્જમદદિં તદા.

૪૧. ‘‘અરોગો આસિ તેનેવ, સમણો સંવુતિન્દ્રિયો;

અસોકો નામ નામેન, ઉપટ્ઠાકો વિપસ્સિનો.

૪૨. ‘‘એકનવુતિતો કપ્પે, યં ઓસધમદાસહં;

દુગ્ગતિં નાભિજાનામિ, ભેસજ્જસ્સ ઇદં ફલં.

૪૩. ‘‘ઇતો ચ અટ્ઠમે કપ્પે, સબ્બોસધસનામકો;

સત્તરતનસમ્પન્નો, ચક્કવત્તી મહબ્બલો.

૪૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તિકિચ્છકો થેરો ઇમા ગાથાયો અભાસિત્થાતિ.

તિકિચ્છકત્થેરસ્સાપદાનં નવમં.