૧૮. કુમુદવગ્ગો

૧. કુમુદમાલિયત્થેરઅપદાનં

૧. ‘‘પબ્બતે હિમવન્તમ્હિ, મહાજાતસ્સરો અહુ;

તત્થજો રક્ખસો આસિં, ઘોરરૂપો મહબ્બલો.

૨. ‘‘કુમુદં પુપ્ફતે તત્થ, ચક્કમત્તાનિ જાયરે;

ઓચિનામિ ચ તં પુપ્ફં, બલિનો સમિતિં તદા.

૩. ‘‘અત્થદસ્સી તુ ભગવા, દ્વિપદિન્દો નરાસભો;

પુપ્ફસઙ્કોચિતં [પુપ્ફં સઙ્કોચિતં (સી. સ્યા.), પુપ્ફં સમોચિતં (?)] દિસ્વા, આગચ્છિ મમ સન્તિકં.

૪. ‘‘ઉપાગતઞ્ચ સમ્બુદ્ધં, દેવદેવં નરાસભં;

સબ્બઞ્ચ પુપ્ફં પગ્ગય્હ, બુદ્ધસ્સ અભિરોપયિં.

૫. ‘‘યાવતા હિમવન્તન્તા, પરિસા સા [હિમવન્તસ્મિં, યાવ માલા (સ્યા.)] તદા અહુ;

તાવચ્છદનસમ્પન્નો, અગમાસિ તથાગતો.

૬. ‘‘અટ્ઠારસે કપ્પસતે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૭. ‘‘ઇતો પન્નરસે કપ્પે, સત્તાહેસું જનાધિપા;

સહસ્સરથનામા તે, ચક્કવત્તી મહબ્બલા.

૮. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા કુમુદમાલિયો થેરો ઇમા ગાથાયો અભાસિત્થાતિ.

કુમુદમાલિયત્થેરસ્સાપદાનં પઠમં.

૨. નિસ્સેણિદાયકત્થેરઅપદાનં

૯. ‘‘કોણ્ડઞ્ઞસ્સ ભગવતો, લોકજેટ્ઠસ્સ તાદિનો;

આરોહત્થાય પાસાદં, નિસ્સેણી કારિતા મયા.

૧૦. ‘‘તેન ચિત્તપ્પસાદેન, અનુભોત્વાન સમ્પદા;

ધારેમિ અન્તિમં દેહં, સમ્માસમ્બુદ્ધસાસને.

૧૧. ‘‘એકત્તિંસમ્હિ કપ્પાનં, સહસ્સમ્હિ તયો અહું [મહા (સી. સ્યા.)];

સમ્બહુલા નામ રાજાનો, ચક્કવત્તી મહબ્બલા.

૧૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા નિસ્સેણિદાયકો થેરો ઇમા ગાથાયો અભાસિત્થાતિ.

નિસ્સેણિદાયકત્થેરસ્સાપદાનં દુતિયં.

૩. રત્તિપુપ્ફિયત્થેરઅપદાનં

૧૩. ‘‘મિગલુદ્દો પુરે આસિં, અરઞ્ઞે કાનને અહં;

વિપસ્સિં અદ્દસં બુદ્ધં, દેવદેવં નરાસભં.

૧૪. ‘‘રત્તિકં પુપ્ફિતં દિસ્વા, કુટજં ધરણીરુહં;

સમૂલં પગ્ગહેત્વાન, ઉપનેસિં મહેસિનો.

૧૫. ‘‘એકનવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, પુપ્ફદાનસ્સિદં ફલં.

૧૬. ‘‘ઇતો ચ અટ્ઠમે કપ્પે, સુપ્પસન્નસનામકો;

સત્તરતનસમ્પન્નો, રાજાહોસિં મહબ્બલો.

૧૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા રત્તિપુપ્ફિયો થેરો ઇમા ગાથાયો અભાસિત્થાતિ.

રત્તિપુપ્ફિયત્થેરસ્સાપદાનં તતિયં.

૪. ઉદપાનદાયકત્થેરઅપદાનં

૧૮. ‘‘વિપસ્સિનો ભગવતો, ઉદપાનો કતો મયા;

પિણ્ડપાતઞ્ચ દત્વાન [ગહેત્વાન (સ્યા.)], નિય્યાદેસિમહં તદા.

૧૯. ‘‘એકનવુતિતો કપ્પે, યં કમ્મમકરિં તદા;

દુગ્ગતિં નાભિજાનામિ, ઉદપાનસ્સિદં ફલં.

૨૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ઉદપાનદાયકો થેરો ઇમા ગાથાયો અભાસિત્થાતિ.

ઉદપાનદાયકત્થેરસ્સાપદાનં ચતુત્થં.

૫. સીહાસનદાયકત્થેરઅપદાનં

૨૧. ‘‘નિબ્બુતે લોકનાથમ્હિ, પદુમુત્તરનાયકે;

પસન્નચિત્તો સુમનો, સીહાસનમદાસહં.

૨૨. ‘‘બહૂહિ ગન્ધમાલેહિ, દિટ્ઠધમ્મસુખાવહે;

તત્થ પૂજઞ્ચ કત્વાન, નિબ્બાયતિ બહુજ્જનો.

૨૩. ‘‘પસન્નચિત્તો સુમનો, વન્દિત્વા બોધિમુત્તમં;

કપ્પાનં સતસહસ્સં, દુગ્ગતિં નુપપજ્જહં.

૨૪. ‘‘પન્નરસસહસ્સમ્હિ, કપ્પાનં અટ્ઠ આસુ તે [અટ્ઠ આસયું (ક.)];

સિલુચ્ચયસનામા ચ, રાજાનો ચક્કવત્તિનો.

૨૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સીહાસનદાયકો થેરો ઇમા ગાથાયો અભાસિત્થાતિ;

સીહાસનદાયકત્થેરસ્સાપદાનં પઞ્ચમં.

૬. મગ્ગદત્તિકત્થેરઅપદાનં

૨૬. ‘‘અનોમદસ્સી ભગવા, દ્વિપદિન્દો નરાસભો;

દિટ્ઠધમ્મસુખત્થાય, અબ્ભોકાસમ્હિ ચઙ્કમિ.

૨૭. ‘‘ઉદ્ધતે પાદે પુપ્ફાનિ, સોભં મુદ્ધનિ તિટ્ઠરે;

પસન્નચિત્તો સુમનો, વન્દિત્વા પુપ્ફમોકિરિં.

૨૮. ‘‘વીસકપ્પસહસ્સમ્હિ, ઇતો પઞ્ચ જના અહું;

પુપ્ફચ્છદનિયા નામ, ચક્કવત્તી મહબ્બલા.

૨૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મગ્ગદત્તિકો થેરો ઇમા ગાથાયો અભાસિત્થાતિ.

મગ્ગદત્તિકત્થેરસ્સાપદાનં છટ્ઠં.

૭. એકદીપિયત્થેરઅપદાનં

૩૦. ‘‘પદુમુત્તરસ્સ મુનિનો, સળલે બોધિમુત્તમે;

પસન્નચિત્તો સુમનો, એકદીપં અદાસહં.

૩૧. ‘‘ભવે નિબ્બત્તમાનમ્હિ, નિબ્બત્તે પુઞ્ઞસઞ્ચયે;

દુગ્ગતિં નાભિજાનામિ, દીપદાનસ્સિદં ફલં.

૩૨. ‘‘સોળસે કપ્પસહસ્સે, ઇતો તે ચતુરો જના;

ચન્દાભા નામ નામેન, ચક્કવત્તી મહબ્બલા.

૩૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા એકદીપિયો થેરો ઇમા ગાથાયો અભાસિત્થાતિ.

એકદીપિયત્થેરસ્સાપદાનં સત્તમં.

નવમં ભાણવારં.

૮. મણિપૂજકત્થેરઅપદાનં

૩૪. ‘‘ઓરેન હિમવન્તસ્સ, નદિકા સમ્પવત્તથ;

તસ્સા ચાનુપખેત્તમ્હિ, સયમ્ભૂ વસતે તદા.

૩૫. ‘‘મણિં પગ્ગય્હ પલ્લઙ્કં, સાધુચિત્તં મનોરમં;

પસન્નચિત્તો સુમનો, બુદ્ધસ્સ અભિરોપયિં.

૩૬. ‘‘ચતુન્નવુતિતો કપ્પે, યં મણિં અભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૩૭. ‘‘ઇતો ચ દ્વાદસે કપ્પે, સતરંસીસનામકા;

અટ્ઠ તે આસું રાજાનો, ચક્કવત્તી મહબ્બલા.

૩૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મણિપૂજકો થેરો ઇમા ગાથાયો અભાસિત્થાતિ.

મણિપૂજકત્થેરસ્સાપદાનં અટ્ઠમં.

૯. તિકિચ્છકત્થેરઅપદાનં

૩૯. ‘‘નગરે બન્ધુમતિયા, વેજ્જો આસિં સુસિક્ખિતો;

આતુરાનં સદુક્ખાનં, મહાજનસુખાવહો.

૪૦. ‘‘બ્યાધિતં સમણં દિસ્વા, સીલવન્તં મહાજુતિં;

પસન્નચિત્તો સુમનો, ભેસજ્જમદદિં તદા.

૪૧. ‘‘અરોગો આસિ તેનેવ, સમણો સંવુતિન્દ્રિયો;

અસોકો નામ નામેન, ઉપટ્ઠાકો વિપસ્સિનો.

૪૨. ‘‘એકનવુતિતો કપ્પે, યં ઓસધમદાસહં;

દુગ્ગતિં નાભિજાનામિ, ભેસજ્જસ્સ ઇદં ફલં.

૪૩. ‘‘ઇતો ચ અટ્ઠમે કપ્પે, સબ્બોસધસનામકો;

સત્તરતનસમ્પન્નો, ચક્કવત્તી મહબ્બલો.

૪૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તિકિચ્છકો થેરો ઇમા ગાથાયો અભાસિત્થાતિ.

તિકિચ્છકત્થેરસ્સાપદાનં નવમં.

૧૦. સઙ્ઘુપટ્ઠાકત્થેરઅપદાનં

૪૫. ‘‘વેસ્સભુમ્હિ ભગવતિ, અહોસારામિકો અહં;

પસન્નચિત્તો સુમનો, ઉપટ્ઠિં સઙ્ઘમુત્તમં.

૪૬. ‘‘એકત્તિંસે ઇતો કપ્પે, યં કમ્મમકરિં તદા;

દુગ્ગતિં નાભિજાનામિ, ઉપટ્ઠાનસ્સિદં ફલં.

૪૭. ‘‘ઇતો તે સત્તમે કપ્પે, સત્તેવાસું સમોદકા;

સત્તરતનસમ્પન્ના, ચક્કવત્તી મહબ્બલા.

૪૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સઙ્ઘુપટ્ઠાકો થેરો ઇમા ગાથાયો અભાસિત્થાતિ.

સઙ્ઘુપટ્ઠાકત્થેરસ્સાપદાનં દસમં.

કુમુદવગ્ગો અટ્ઠારસમો.