૯. વટંસકિયત્થેરઅપદાનં

૪૩. ‘‘સુમેધો નામ નામેન, સયમ્ભૂ અપરાજિતો;

વિવેકમનુબ્રૂહન્તો, અજ્ઝોગહિ મહાવનં.

૪૪. ‘‘સળલં પુપ્ફિતં દિસ્વા, ગન્થિત્વાન [બન્ધિત્વાન (સી.)] વટંસકં;

બુદ્ધસ્સ અભિરોપેસિં, સમ્મુખા લોકનાયકં.

૪૫. ‘‘તિંસકપ્પસહસ્સમ્હિ, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૪૬. ‘‘ઊનવીસે કપ્પસતે, સોળસાસું સુનિમ્મિતા;

સત્તરતનસમ્પન્ના, ચક્કવત્તી મહબ્બલા.

૪૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા વટંસકિયો થેરો ઇમા ગાથાયો અભાસિત્થાતિ.

વટંસકિયત્થેરસ્સાપદાનં નવમં.