૧૫. છત્તવગ્ગો

૧. અતિછત્તિયત્થેરઅપદાનં

૧. ‘‘પરિનિબ્બુતે ભગવતિ, અત્થદસ્સીનરુત્તમે;

છત્તાતિછત્તં [છત્તાધિછત્તં (સી.)] કારેત્વા, થૂપમ્હિ અભિરોપયિં.

૨. ‘‘કાલેન કાલમાગન્ત્વા, નમસ્સિં લોકનાયકં [સત્થુ ચેતિયં (સી.)];

પુપ્ફચ્છદનં કત્વાન, છત્તમ્હિ અભિરોપયિં.

૩. ‘‘સત્તરસે કપ્પસતે, દેવરજ્જમકારયિં;

મનુસ્સત્તં ન ગચ્છામિ, થૂપપૂજાયિદં ફલં.

૪. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા અતિછત્તિયો [અધિછત્તિયો (સી. સ્યા.)] થેરો ઇમા ગાથાયો અભાસિત્થાતિ.

અતિછત્તિયત્થેરસ્સાપદાનં પઠમં.

૨. થમ્ભારોપકત્થેરઅપદાનં

૫. ‘‘નિબ્બુતે લોકનાથમ્હિ, ધમ્મદસ્સીનરાસભે;

આરોપેસિં ધજત્થમ્ભં, બુદ્ધસેટ્ઠસ્સ ચેતિયે.

૬. ‘‘નિસ્સેણિં માપયિત્વાન, થૂપસેટ્ઠં સમારુહિં;

જાતિપુપ્ફં ગહેત્વાન, થૂપમ્હિ અભિરોપયિં.

૭. ‘‘અહો બુદ્ધો અહો ધમ્મો, અહો નો સત્થુ સમ્પદા;

દુગ્ગતિં નાભિજાનામિ, થૂપપૂજાયિદં ફલં.

૮. ‘‘ચતુન્નવુતિતો કપ્પે, થૂપસીખસનામકા;

સોળસાસિંસુ રાજાનો, ચક્કવત્તી મહબ્બલા.

૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા થમ્ભારોપકો થેરો ઇમા ગાથાયો અભાસિત્થાતિ.

થમ્ભારોપકત્થેરસ્સાપદાનં દુતિયં.

૩. વેદિકારકત્થેરઅપદાનં

૧૦. ‘‘નિબ્બુતે લોકનાથમ્હિ, પિયદસ્સીનરુત્તમે;

પસન્નચિત્તો સુમનો, મુત્તાવેદિમકાસહં.

૧૧. ‘‘મણીહિ પરિવારેત્વા, અકાસિં વેદિમુત્તમં;

વેદિકાય મહં કત્વા, તત્થ કાલઙ્કતો અહં.

૧૨. ‘‘યં યં યોનુપપજ્જામિ, દેવત્તં અથ માનુસં;

મણી ધારેન્તિ આકાસે, પુઞ્ઞકમ્મસ્સિદં ફલં.

૧૩. ‘‘સોળસિતો કપ્પસતે, મણિપ્પભાસનામકા;

છત્તિંસાસિંસુ [બાત્તિંસાસિંસુ (સી. સ્યા.)] રાજાનો, ચક્કવત્તી મહબ્બલા.

૧૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા વેદિકારકો થેરો ઇમા ગાથાયો અભાસિત્થાતિ.

વેદિકારકત્થેરસ્સાપદાનં તતિયં.

૪. સપરિવારિયત્થેરઅપદાનં

૧૫. ‘‘પદુમુત્તરો નામ જિનો, લોકજેટ્ઠો નરાસભો;

જલિત્વા અગ્ગિક્ખન્ધોવ, સમ્બુદ્ધો પરિનિબ્બુતો.

૧૬. ‘‘નિબ્બુતે ચ મહાવીરે, થૂપો વિત્થારિકો અહુ;

દૂરતોવ [અહોરત્તં (સી.), થૂપદત્તં (સ્યા.)] ઉપટ્ઠેન્તિ, ધાતુગેહવરુત્તમે.

૧૭. ‘‘પસન્નચિત્તો સુમનો, અકં ચન્દનવેદિકં;

દિસ્સતિ થૂપખન્ધો ચ [દીયતિ ધૂમક્ખન્ધો ચ (સી.), દીયતિ ધૂપગન્ધો ચ (સ્યા.)], થૂપાનુચ્છવિકો તદા.

૧૮. ‘‘ભવે નિબ્બત્તમાનમ્હિ, દેવત્તે અથ માનુસે;

ઓમત્તં મે ન પસ્સામિ, પુબ્બકમ્મસ્સિદં ફલં.

૧૯. ‘‘પઞ્ચદસકપ્પસતે, ઇતો અટ્ઠ જના અહું;

સબ્બે સમત્તનામા તે, ચક્કવત્તી મહબ્બલા.

૨૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સપરિવારિયો થેરો ઇમા ગાથાયો અભાસિત્થાતિ.

સપરિવારિયત્થેરસ્સાપદાનં ચતુત્થં.

૫. ઉમાપુપ્ફિયત્થેરઅપદાનં

૨૧. ‘‘નિબ્બુતે લોકમહિતે [લોકનાથમ્હિ (સી.)], આહુતીનં પટિગ્ગહે;

સિદ્ધત્થમ્હિ ભગવતિ, મહાથૂપમહો અહુ.

૨૨. ‘‘મહે પવત્તમાનમ્હિ, સિદ્ધત્થસ્સ મહેસિનો;

ઉમાપુપ્ફં [ઉમ્માપુપ્ફં (સબ્બત્થ)] ગહેત્વાન, થૂપમ્હિ અભિરોપયિં.

૨૩. ‘‘ચતુન્નવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, થૂપપૂજાયિદં [પુપ્ફપૂજાયિદં (સ્યા.), બુદ્ધપૂજાયિદં (ક.)] ફલં.

૨૪. ‘‘ઇતો ચ નવમે કપ્પે, સોમદેવસનામકા;

પઞ્ચાસીતિસુ રાજાનો, ચક્કવત્તી મહબ્બલા.

૨૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ઉમાપુપ્ફિયો થેરો ઇમા ગાથાયો અભાસિત્થાતિ.

ઉમાપુપ્ફિયત્થેરસ્સાપદાનં પઞ્ચમં.

૬. અનુલેપદાયકત્થેરઅપદાનં

૨૬. ‘‘અનોમદસ્સીમુનિનો, બોધિવેદિમકાસહં;

સુધાય પિણ્ડં દત્વાન, પાણિકમ્મં અકાસહં.

૨૭. ‘‘દિસ્વા તં સુકતં કમ્મં, અનોમદસ્સી નરુત્તમો;

ભિક્ખુસઙ્ઘે ઠિતો સત્થા, ઇમં ગાથં અભાસથ.

૨૮. ‘‘‘ઇમિના સુધકમ્મેન, ચેતનાપણિધીહિ ચ;

સમ્પત્તિં અનુભોત્વાન, દુક્ખસ્સન્તં કરિસ્સતિ’.

૨૯. ‘‘પસન્નમુખવણ્ણોમ્હિ, એકગ્ગો સુસમાહિતો;

ધારેમિ અન્તિમં દેહં, સમ્માસમ્બુદ્ધસાસને.

૩૦. ‘‘ઇતો કપ્પસતે આસિં, પરિપુણ્ણે અનૂનકે [પરિપુણ્ણો અનૂનકો (સ્યા.)];

રાજા સબ્બઘનો નામ, ચક્કવત્તી મહબ્બલો.

૩૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અનુલેપદાયકો થેરો ઇમા ગાથાયો અભાસિત્થાતિ.

અનુલેપદાયકત્થેરસ્સાપદાનં છટ્ઠં.

૭. મગ્ગદાયકત્થેરઅપદાનં

૩૨. ‘‘ઉત્તરિત્વાન નદિકં, વનં ગચ્છતિ ચક્ખુમા;

તમદ્દસાસિં સમ્બુદ્ધં, સિદ્ધત્થં વરલક્ખણં.

૩૩. ‘‘કુદાલ [કુદ્દાલ (સી. સ્યા.)] પિટકમાદાય, સમં કત્વાન તં પથં;

સત્થારં અભિવાદેત્વા, સકં ચિત્તં પસાદયિં.

૩૪. ‘‘ચતુન્નવુતિતો કપ્પે, યં કમ્મમકરિં તદા;

દુગ્ગતિં નાભિજાનામિ, મગ્ગદાનસ્સિદં ફલં.

૩૫. ‘‘સત્તપઞ્ઞાસકપ્પમ્હિ, એકો આસિં જનાધિપો;

નામેન સુપ્પબુદ્ધોતિ, નાયકો સો નરિસ્સરો.

૩૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મગ્ગદાયકો થેરો ઇમા ગાથાયો અભાસિત્થાતિ.

મગ્ગદાયકત્થેરસ્સાપદાનં સત્તમં.

૮. ફલકદાયકત્થેરઅપદાનં

૩૭. ‘‘યાનકારો પુરે આસિં, દારુકમ્મે સુસિક્ખિતો;

ચન્દનં ફલકં કત્વા, અદાસિં લોકબન્ધુનો.

૩૮. ‘‘પભાસતિ ઇદં બ્યમ્હં, સુવણ્ણસ્સ સુનિમ્મિતં;

હત્થિયાનં અસ્સયાનં, દિબ્બયાનં ઉપટ્ઠિતં.

૩૯. ‘‘પાસાદા સિવિકા ચેવ, નિબ્બત્તન્તિ યદિચ્છકં;

અક્ખુબ્ભં [અક્ખોભં (સી.)] રતનં મય્હં, ફલકસ્સ ઇદં ફલં.

૪૦. ‘‘એકનવુતિતો કપ્પે, ફલકં યમહં દદિં;

દુગ્ગતિં નાભિજાનામિ, ફલકસ્સ ઇદં ફલં.

૪૧. ‘‘સત્તપઞ્ઞાસકપ્પમ્હિ, ચતુરો નિમ્મિતાવ્હયા;

સત્તરતનસમ્પન્ના, ચક્કવત્તી મહબ્બલા.

૪૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ફલકદાયકો થેરો ઇમા ગાથાયો અભાસિત્થાતિ.

ફલકદાયકત્થેરસ્સાપદાનં અટ્ઠમં.

૯. વટંસકિયત્થેરઅપદાનં

૪૩. ‘‘સુમેધો નામ નામેન, સયમ્ભૂ અપરાજિતો;

વિવેકમનુબ્રૂહન્તો, અજ્ઝોગહિ મહાવનં.

૪૪. ‘‘સળલં પુપ્ફિતં દિસ્વા, ગન્થિત્વાન [બન્ધિત્વાન (સી.)] વટંસકં;

બુદ્ધસ્સ અભિરોપેસિં, સમ્મુખા લોકનાયકં.

૪૫. ‘‘તિંસકપ્પસહસ્સમ્હિ, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૪૬. ‘‘ઊનવીસે કપ્પસતે, સોળસાસું સુનિમ્મિતા;

સત્તરતનસમ્પન્ના, ચક્કવત્તી મહબ્બલા.

૪૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા વટંસકિયો થેરો ઇમા ગાથાયો અભાસિત્થાતિ.

વટંસકિયત્થેરસ્સાપદાનં નવમં.

૧૦. પલ્લઙ્કદાયકત્થેરઅપદાનં

૪૮. ‘‘સુમેધસ્સ ભગવતો, લોકજેટ્ઠસ્સ તાદિનો;

પલ્લઙ્કો હિ મયા દિન્નો, સઉત્તરસપચ્છદો.

૪૯. ‘‘સત્તરતનસમ્પન્નો, પલ્લઙ્કો આસિ સો તદા;

મમ સઙ્કપ્પમઞ્ઞાય, નિબ્બત્તતિ સદા મમ.

૫૦. ‘‘તિંસકપ્પસહસ્સમ્હિ, પલ્લઙ્કમદદિં તદા;

દુગ્ગતિં નાભિજાનામિ, પલ્લઙ્કસ્સ ઇદં ફલં.

૫૧. ‘‘વીસકપ્પસહસ્સમ્હિ, સુવણ્ણાભા તયો જના;

સત્તરતનસમ્પન્ના, ચક્કવત્તી મહબ્બલા.

૫૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પલ્લઙ્કદાયકો થેરો ઇમા ગાથાયો અભાસિત્થાતિ.

પલ્લઙ્કદાયકત્થેરસ્સાપદાનં દસમં.

છત્તવગ્ગો પન્નરસમો.