૧૬. બન્ધુજીવકવગ્ગો

૧. બન્ધુજીવકત્થેરઅપદાનં

૧. ‘‘ચન્દંવ વિમલં સુદ્ધં, વિપ્પસન્નમનાવિલં;

નન્દીભવપરિક્ખીણં, તિણ્ણં લોકે વિસત્તિકં.

૨. ‘‘નિબ્બાપયન્તં જનતં, તિણ્ણં [દિસ્વા (?)] તારયતં વરં [તારયતં મુનિં (સ્યા.)];

મુનિં વનમ્હિ ઝાયન્તં [વનસ્મિં ઝાયમાનં તં (સી. સ્યા.)], એકગ્ગં સુસમાહિતં.

૩. ‘‘બન્ધુજીવકપુપ્ફાનિ, લગેત્વા સુત્તકેનહં;

બુદ્ધસ્સ અભિરોપયિં, સિખિનો લોકબન્ધુનો.

૪. ‘‘એકત્તિંસે ઇતો કપ્પે, યં કમ્મમકરિં તદા;

દુગ્ગતિં નાભિજાનામિ, બુદ્ધપૂજાયિદં ફલં.

૫. ‘‘ઇતો સત્તમકે કપ્પે, મનુજિન્દો મહાયસો;

સમન્તચક્ખુ નામાસિ, ચક્કવત્તી મહબ્બલો.

૬. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા બન્ધુજીવકો થેરો ઇમા ગાથાયો અભાસિત્થાતિ.

બન્ધુજીવકત્થેરસ્સાપદાનં પઠમં.

૨. તમ્બપુપ્ફિયત્થેરઅપદાનં

૭. ‘‘પરકમ્માયને યુત્તો, અપરાધં અકાસહં;

વનન્તં અભિધાવિસ્સં, ભયવેરસમપ્પિતો.

૮. ‘‘પુપ્ફિતં પાદપં દિસ્વા, પિણ્ડિબન્ધં સુનિમ્મિતં;

તમ્બપુપ્ફં ગહેત્વાન, બોધિયં ઓકિરિં અહં.

૯. ‘‘સમ્મજ્જિત્વાન તં બોધિં, પાટલિં પાદપુત્તમં;

પલ્લઙ્કં આભુજિત્વાન, બોધિમૂલે ઉપાવિસિં.

૧૦. ‘‘ગતમગ્ગં ગવેસન્તા, આગચ્છું મમ સન્તિકં;

તે ચ દિસ્વાનહં તત્થ, આવજ્જિં બોધિમુત્તમં.

૧૧. ‘‘વન્દિત્વાન અહં બોધિં, વિપ્પસન્નેન ચેતસા;

અનેકતાલે પપતિં, ગિરિદુગ્ગે ભયાનકે.

૧૨. ‘‘એકનવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બોધિપૂજાયિદં ફલં.

૧૩. ‘‘ઇતો ચ તતિયે કપ્પે, રાજા સુસઞ્ઞતો અહં [સંથુસિતો અહું (સી.)];

સત્તરતનસમ્પન્નો, ચક્કવત્તી મહબ્બલો.

૧૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તમ્બપુપ્ફિયો થેરો ઇમા ગાથાયો અભાસિત્થાતિ.

તમ્બપુપ્ફિયત્થેરસ્સાપદાનં દુતિયં.

૩. વીથિસમ્મજ્જકત્થેરઅપદાનં

૧૫. ‘‘ઉદેન્તં સતરંસિંવ, પીતરંસિંવ [સિતરંસિંવ (સી. સ્યા.)] ભાણુમં;

પન્નરસે યથા ચન્દં, નિય્યન્તં લોકનાયકં.

૧૬. ‘‘અટ્ઠસટ્ઠિસહસ્સાનિ, સબ્બે ખીણાસવા અહું;

પરિવારિંસુ સમ્બુદ્ધં, દ્વિપદિન્દં નરાસભં.

૧૭. ‘‘સમ્મજ્જિત્વાન તં વીથિં, નિય્યન્તે લોકનાયકે;

ઉસ્સાપેસિં ધજં તત્થ, વિપ્પસન્નેન ચેતસા.

૧૮. ‘‘એકનવુતિતો કપ્પે, યં ધજં અભિરોપયિં;

દુગ્ગતિં નાભિજાનામિ, ધજદાનસ્સિદં ફલં.

૧૯. ‘‘ઇતો ચતુત્થકે કપ્પે, રાજાહોસિં મહબ્બલો;

સબ્બાકારેન સમ્પન્નો, સુધજો ઇતિ વિસ્સુતો.

૨૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા વીથિસમ્મજ્જકો થેરો ઇમા ગાથાયો અભાસિત્થાતિ.

વીથિસમ્મજ્જકત્થેરસ્સાપદાનં તતિયં.

૪. કક્કારુપુપ્ફપૂજકત્થેરઅપદાનં

૨૧. ‘‘દેવપુત્તો અહં સન્તો, પૂજયિં સિખિનાયકં;

કક્કારુપુપ્ફં પગ્ગય્હ, બુદ્ધસ્સ અભિરોપયિં.

૨૨. ‘‘એકત્તિંસે ઇતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૨૩. ‘‘ઇતો ચ નવમે કપ્પે, રાજા સત્તુત્તમો અહું;

સત્તરતનસમ્પન્નો, ચક્કવત્તી મહબ્બલો.

૨૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કક્કારુપુપ્ફપૂજકો થેરો ઇમા ગાથાયો અભાસિત્થાતિ.

કક્કારુપુપ્ફપૂજકત્થેરસ્સાપદાનં ચતુત્થં.

૫. મન્દારવપુપ્ફપૂજકત્થેરઅપદાનં

૨૫. ‘‘દેવપુત્તો અહં સન્તો, પૂજયિં સિખિનાયકં;

મન્દારવેન પુપ્ફેન, બુદ્ધસ્સ અભિરોપયિં.

૨૬. ‘‘સત્તાહં છદનં આસિ, દિબ્બં માલં તથાગતે;

સબ્બે જના સમાગન્ત્વા, નમસ્સિંસુ તથાગતં.

૨૭. ‘‘એકત્તિંસે ઇતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૨૮. ‘‘ઇતો ચ દસમે કપ્પે, રાજાહોસિં જુતિન્ધરો;

સત્તરતનસમ્પન્નો, ચક્કવત્તી મહબ્બલો.

૨૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મન્દારવપુપ્ફપૂજકો થેરો ઇમા ગાથાયો અભાસિત્થાતિ.

મન્દારવપુપ્ફપૂજકત્થેરસ્સાપદાનં પઞ્ચમં.

૬. કદમ્બપુપ્ફિયત્થેરઅપદાનં

૩૦. ‘‘હિમવન્તસ્સાવિદૂરે, કુક્કુટો નામ પબ્બતો;

તમ્હિ પબ્બતપાદમ્હિ, સત્ત બુદ્ધા વસન્તિ તે.

૩૧. ‘‘કદમ્બં પુપ્ફિતં દિસ્વા, દીપરાજંવ ઉગ્ગતં;

ઉભો હત્થેહિ પગ્ગય્હ, સત્ત બુદ્ધે સમોકિરિં.

૩૨. ‘‘ચતુન્નવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૩૩. ‘‘દ્વેનવુતે ઇતો કપ્પે, સત્તાસું પુપ્ફનામકા;

સત્તરતનસમ્પન્ના, ચક્કવત્તી મહબ્બલા.

૩૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કદમ્બપુપ્ફિયો થેરો ઇમા ગાથાયો અભાસિત્થાતિ;

કદમ્બપુપ્ફિયત્થેરસ્સાપદાનં છટ્ઠં.

૭. તિણસૂલકત્થેરઅપદાનં

૩૫. ‘‘હિમવન્તસ્સાવિદૂરે, ભૂતગણો નામ પબ્બતો;

વસતેકો જિનો તત્થ, સયમ્ભૂ લોકનિસ્સટો.

૩૬. ‘‘તિણસૂલં ગહેત્વાન, બુદ્ધસ્સ અભિરોપયિં;

એકૂનસતસહસ્સં, કપ્પં ન વિનિપાતિકો.

૩૭. ‘‘ઇતો એકાદસે કપ્પે, એકોસિં ધરણીરુહો;

સત્તરતનસમ્પન્નો, ચક્કવત્તી મહબ્બલો.

૩૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તિણસૂલકો થેરો ઇમા ગાથાયો અભાસિત્થાતિ.

તિણસૂલકત્થેરસ્સાપદાનં સત્તમં.

૮. નાગપુપ્ફિયત્થેરઅપદાનં

૩૯. ‘‘સુવચ્છો નામ નામેન, બ્રાહ્મણો મન્તપારગૂ;

પુરક્ખતો સસિસ્સેહિ, વસતે પબ્બતન્તરે.

૪૦. ‘‘પદુમુત્તરો નામ જિનો, આહુતીનં પટિગ્ગહો;

મમુદ્ધરિતુકામો સો, આગચ્છિ મમ સન્તિકં.

૪૧. ‘‘વેહાસમ્હિ ચઙ્કમતિ, ધૂપાયતિ જલતે તથા;

હાસં મમં વિદિત્વાન, પક્કામિ પાચિનામુખો.

૪૨. ‘‘તઞ્ચ અચ્છરિયં દિસ્વા, અબ્ભુતં લોમહંસનં;

નાગપુપ્ફં ગહેત્વાન, ગતમગ્ગમ્હિ ઓકિરિં.

૪૩. ‘‘સતસહસ્સિતો કપ્પે, યં પુપ્ફં ઓકિરિં અહં;

તેન ચિત્તપ્પસાદેન, દુગ્ગતિં નુપપજ્જહં.

૪૪. ‘‘એકત્તિંસે કપ્પસતે [એકતિંસે ઇતો કમ્મે (સ્યા.)], રાજા આસિ મહારહો;

સત્તરતનસમ્પન્નો, ચક્કવત્તી મહબ્બલો.

૪૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા નાગપુપ્ફિયો થેરો ઇમા ગાથાયો અભાસિત્થાતિ.

નાગપુપ્ફિયત્થેરસ્સાપદાનં અટ્ઠમં.

૯. પુન્નાગપુપ્ફિયત્થેરઅપદાનં

૪૬. ‘‘કાનનં વનમોગય્હ, વસામિ લુદ્દકો અહં;

પુન્નાગં પુપ્ફિતં દિસ્વા, બુદ્ધસેટ્ઠં અનુસ્સરિં.

૪૭. ‘‘તં પુપ્ફં ઓચિનિત્વાન, સુગન્ધં ગન્ધિતં સુભં;

થૂપં કરિત્વા પુલિને, બુદ્ધસ્સ અભિરોપયિં.

૪૮. ‘‘દ્વેનવુતે ઇતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૪૯. ‘‘એકમ્હિ નવુતે કપ્પે, એકો આસિં તમોનુદો;

સત્તરતનસમ્પન્નો, ચક્કવત્તી મહબ્બલો.

૫૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પુન્નાગપુપ્ફિયો થેરો ઇમા ગાથાયો અભાસિત્થાતિ.

પુન્નાગપુપ્ફિયત્થેરસ્સાપદાનં નવમં.

૧૦. કુમુદદાયકત્થેરઅપદાનં

૫૧. ‘‘હિમવન્તસ્સાવિદૂરે, મહાજાતસ્સરો અહુ;

પદુમુપ્પલસઞ્છન્નો, પુણ્ડરીકસમોત્થટો.

૫૨. ‘‘કુકુત્થો નામ નામેન, તત્થાસિં સકુણો તદા;

સીલવા બુદ્ધિસમ્પન્નો, પુઞ્ઞાપુઞ્ઞેસુ કોવિદો.

૫૩. ‘‘પદુમુત્તરો લોકવિદૂ, આહુતીનં પટિગ્ગહો;

જાતસ્સરસ્સાવિદૂરે, સઞ્ચરિત્થ મહામુનિ.

૫૪. ‘‘જલજં કુમુદં છેત્વા, ઉપનેસિં મહેસિનો;

મમ સઙ્કપ્પમઞ્ઞાય, પટિગ્ગહિ મહામુનિ.

૫૫. ‘‘તઞ્ચ દાનં દદિત્વાન, સુક્કમૂલેન ચોદિતો;

કપ્પાનં સતસહસ્સં, દુગ્ગતિં નુપપજ્જહં.

૫૬. ‘‘સોળસેતો કપ્પસતે, આસું વરુણનામકા;

અટ્ઠ એતે જનાધિપા, ચક્કવત્તી મહબ્બલા.

૫૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કુમુદદાયકો થેરો ઇમા ગાથાયો અભાસિત્થાતિ.

કુમુદદાયકત્થેરસ્સાપદાનં દસમં.

બન્ધુજીવકવગ્ગો સોળસમો.