૧૭. સુપારિચરિયવગ્ગો

૧. સુપારિચરિયત્થેરઅપદાનં

૧. ‘‘પદુમો નામ નામેન, દ્વિપદિન્દો નરાસભો;

પવના અભિનિક્ખમ્મ, ધમ્મં દેસેતિ ચક્ખુમા.

૨. ‘‘યક્ખાનં સમયો આસિ, અવિદૂરે મહેસિનો;

યેન કિચ્ચેન સમ્પત્તા, અજ્ઝાપેક્ખિંસુ તાવદે.

૩. ‘‘બુદ્ધસ્સ ગિરમઞ્ઞાય, અમતસ્સ ચ દેસનં;

પસન્નચિત્તો સુમનો, અપ્ફોટેત્વા ઉપટ્ઠહિં.

૪. ‘‘સુચિણ્ણસ્સ ફલં પસ્સ, ઉપટ્ઠાનસ્સ સત્થુનો;

તિંસકપ્પસહસ્સેસુ, દુગ્ગતિં નુપપજ્જહં.

૫. ‘‘ઊનતિંસે કપ્પસતે, સમલઙ્કતનામકો;

સત્તરતનસમ્પન્નો, ચક્કવત્તી મહબ્બલો.

૬. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા સુપારિચરિયો થેરો ઇમા ગાથાયો અભાસિત્થાતિ.

સુપારિચરિયત્થેરસ્સાપદાનં પઠમં.

૨. કણવેરપુપ્ફિયત્થેરઅપદાનં

૭. ‘‘સિદ્ધત્થો નામ ભગવા, લોકજેટ્ઠો નરાસભો;

પુરક્ખતો સાવકેહિ, નગરં પટિપજ્જથ.

૮. ‘‘રઞ્ઞો અન્તેપુરે આસિં, ગોપકો અભિસમ્મતો;

પાસાદે ઉપવિટ્ઠોહં, અદ્દસં લોકનાયકં.

૯. ‘‘કણવેરં [કરવીરં (સક્કતાનુલોમં), કણવીરં (પાકત)] ગહેત્વાન, ભિક્ખુસઙ્ઘે સમોકિરિં;

બુદ્ધસ્સ વિસું કત્વાન, તતો ભિય્યો સમોકિરિં.

૧૦. ‘‘ચતુન્નવુતિતો કપ્પે, યં પુપ્ફમભિપૂજયિં [રોપયિં (સ્યા.)];

દુગ્ગતિં નાભિજાનામિ, બુદ્ધપૂજાયિદં ફલં.

૧૧. ‘‘સત્તાસીતિમ્હિતો કપ્પે, ચતુરાસું મહિદ્ધિકા;

સત્તરતનસમ્પન્ના, ચક્કવત્તી મહબ્બલા.

૧૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કણવેરપુપ્ફિયો થેરો ઇમા ગાથાયો અભાસિત્થાતિ.

કણવેરપુપ્ફિયત્થેરસ્સાપદાનં દુતિયં.

૩. ખજ્જકદાયકત્થેરઅપદાનં

૧૩. ‘‘તિસ્સસ્સ ખો ભગવતો, પુબ્બે ફલમદાસહં;

નાળિકેરઞ્ચ પાદાસિં, ખજ્જકં અભિસમ્મતં.

૧૪. ‘‘બુદ્ધસ્સ તમહં દત્વા, તિસ્સસ્સ તુ મહેસિનો;

મોદામહં કામકામી, ઉપપજ્જિં [કામકારી, ઉપપજ્જં (સી.)] યમિચ્છકં [સબ્બત્થપિ એવમેવ દિસ્સતિ].

૧૫. ‘‘દ્વેનવુતે ઇતો કપ્પે, યં દાનમદદિં તદા;

દુગ્ગતિં નાભિજાનામિ, ફલદાનસ્સિદં ફલં.

૧૬. ‘‘ઇતો તેરસકપ્પમ્હિ, રાજા ઇન્દસમો અહુ;

સત્તરતનસમ્પન્નો, ચક્કવત્તી મહબ્બલો.

૧૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ખજ્જકદાયકો થેરો ઇમા ગાથાયો અભાસિત્થાતિ.

ખજ્જકદાયકત્થેરસ્સાપદાનં તતિયં.

૪. દેસપૂજકત્થેરઅપદાનં

૧૮. ‘‘અત્થદસ્સી તુ ભગવા, લોકજેટ્ઠો નરાસભો;

અબ્ભુગ્ગન્ત્વાન વેહાસં, ગચ્છતે અનિલઞ્જસે.

૧૯. ‘‘યમ્હિ દેસે ઠિતો સત્થા, અબ્ભુગ્ગચ્છિ મહામુનિ;

તાહં દેસં અપૂજેસિં, પસન્નો સેહિ પાણિભિ.

૨૦. ‘‘અટ્ઠારસે કપ્પસતે, અદ્દસં યં મહામુનિં;

દુગ્ગતિં નાભિજાનામિ, દેસપૂજાયિદં ફલં.

૨૧. ‘‘એકાદસે કપ્પસતે, ગોસુજાતસનામકો;

સત્તરતનસમ્પન્નો, ચક્કવત્તી મહબ્બલો.

૨૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા દેસપૂજકો થેરો ઇમા ગાથાયો અભાસિત્થાતિ.

દેસપૂજકત્થેરસ્સાપદાનં ચતુત્થં.

૫. કણિકારછત્તિયત્થેરઅપદાનં

૨૩. ‘‘વેસ્સભૂ નામ સમ્બુદ્ધો, લોકજેટ્ઠો નરાસભો;

દિવાવિહારાય મુનિ, ઓગાહયિ મહાવનં.

૨૪. ‘‘કણિકારં ઓચિનિત્વા, છત્તં કત્વાનહં તદા;

પુપ્ફચ્છદનં કત્વાન, બુદ્ધસ્સ અભિરોપયિં.

૨૫. ‘‘એકત્તિંસે ઇતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૨૬. ‘‘ઇતો વીસતિકપ્પમ્હિ, સોણ્ણાભા અટ્ઠ ખત્તિયા;

સત્તરતનસમ્પન્ના, ચક્કવત્તી મહબ્બલા.

૨૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કણિકારછત્તિયો થેરો ઇમા ગાથાયો અભાસિત્થાતિ.

કણિકારછત્તિયત્થેરસ્સાપદાનં પઞ્ચમં.

૬. સપ્પિદાયકત્થેરઅપદાનં

૨૮. ‘‘ફુસ્સો નામાસિ [નામાથ (સી.)] ભગવા, આહુતીનં પટિગ્ગહો;

ગચ્છતે વીથિયં વીરો, નિબ્બાપેન્તો મહાજનં.

૨૯. ‘‘અનુપુબ્બેન ભગવા, આગચ્છિ મમ સન્તિકં;

તતો તં [તતોહં (સી. સ્યા.)] પત્તં પગ્ગય્હ, સપ્પિતેલમદાસહં.

૩૦. ‘‘દ્વેનવુતે ઇતો કપ્પે, યં સપ્પિમદદિં તદા;

દુગ્ગતિં નાભિજાનામિ, સપ્પિદાનસ્સિદં ફલં.

૩૧. ‘‘છપ્પઞ્ઞાસે ઇતો કપ્પે, એકો આસિ સમોદકો;

સત્તરતનસમ્પન્નો, ચક્કવત્તી મહબ્બલો.

૩૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સપ્પિદાયકો થેરો ઇમા ગાથાયો અભાસિત્થાતિ.

સપ્પિદાયકત્થેરસ્સાપદાનં છટ્ઠં.

૭. યૂથિકપુપ્ફિયત્થેરઅપદાનં

૩૩. ‘‘ચન્દભાગાનદીતીરે, અનુસોતં વજામહં;

સયમ્ભું અદ્દસં તત્થ, સાલરાજંવ ફુલ્લિતં.

૩૪. ‘‘પુપ્ફં યૂથિકમાદાય, ઉપગચ્છિં મહામુનિં;

પસન્નચિત્તો સુમનો, બુદ્ધસ્સ અભિરોપયિં.

૩૫. ‘‘ચતુન્નવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૩૬. ‘‘સત્તસટ્ઠિમ્હિતો કપ્પે, એકો સામુદ્ધરો અહુ;

સત્તરતનસમ્પન્નો, ચક્કવત્તી મહબ્બલો.

૩૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા યૂથિકપુપ્ફિયો થેરો ઇમા ગાથાયો અભાસિત્થાતિ.

યૂથિકપુપ્ફિયત્થેરસ્સાપદાનં સત્તમં.

૮. દુસ્સદાયકત્થેરઅપદાનં

૩૮. ‘‘તિવરાયં પુરે રમ્મે, રાજપુત્તોસહં [રાજપુત્તો અહં (સી. સ્યા.)] તદા;

પણ્ણાકારં લભિત્વાન, ઉપસન્તસ્સદાસહં.

૩૯. ‘‘અધિવાસેસિ ભગવા, વત્થં [નવં (ક.)] હત્થેન આમસિ;

સિદ્ધત્થો અધિવાસેત્વા, વેહાસં નભમુગ્ગમિ.

૪૦. ‘‘બુદ્ધસ્સ ગચ્છમાનસ્સ, દુસ્સા ધાવન્તિ પચ્છતો;

તત્થ ચિત્તં પસાદેસિં, બુદ્ધો નો અગ્ગપુગ્ગલો.

૪૧. ‘‘ચતુન્નવુતિતો કપ્પે, યં દુસ્સમદદિં તદા;

દુગ્ગતિં નાભિજાનામિ, દુસ્સદાનસ્સિદં ફલં.

૪૨. ‘‘સત્તસટ્ઠિમ્હિતો કપ્પે, ચક્કવત્તી તદા અહુ;

પરિસુદ્ધોતિ નામેન, મનુજિન્દો મહબ્બલો.

૪૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા દુસ્સદાયકો થેરો ઇમા ગાથાયો અભાસિત્થાતિ.

દુસ્સદાયકત્થેરસ્સાપદાનં અટ્ઠમં.

૯. સમાદપકત્થેરઅપદાનં

૪૪. ‘‘નગરે બન્ધુમતિયા, મહાપૂગગણો અહુ;

તેસાહં પવરો આસિં, મમ બદ્ધચરા [પટ્ઠચરા (સ્યા.)] ચ તે.

૪૫. ‘‘સબ્બે તે સન્નિપાતેત્વા, પુઞ્ઞકમ્મે સમાદયિં;

માળં કસ્સામ સઙ્ઘસ્સ, પુઞ્ઞક્ખેત્તં અનુત્તરં.

૪૬. ‘‘સાધૂતિ તે પટિસ્સુત્વા, મમ છન્દવસાનુગા;

નિટ્ઠાપેત્વા ચ તં માળં, વિપસ્સિસ્સ અદમ્હસે.

૪૭. ‘‘એકનવુતિતો કપ્પે, યં માળમદદિં તદા;

દુગ્ગતિં નાભિજાનામિ, માળદાનસ્સિદં ફલં.

૪૮. ‘‘એકૂનસત્તતિકપ્પે [એકૂનસટ્ઠિકપ્પમ્હિ (સી. સ્યા.)],

એકો આસિ જનાધિપો.

આદેય્યો નામ નામેન, ચક્કવત્તી મહબ્બલો.

૪૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સમાદપકો થેરો ઇમા ગાથાયો અભાસિત્થાતિ.

સમાદપકત્થેરસ્સાપદાનં નવમં.

૧૦. પઞ્ચઙ્ગુલિયત્થેરઅપદાનં

૫૦. ‘‘તિસ્સો નામાસિ ભગવા, લોકજેટ્ઠો નરાસભો;

પવિસતિ ગન્ધકુટિં, વિહારકુસલો મુનિ.

૫૧. ‘‘સુગન્ધમાલમાદાય, અગમાસિં જિનન્તિકં;

અપસદ્દો ચ સમ્બુદ્ધે, પઞ્ચઙ્ગુલિમદાસહં.

૫૨. ‘‘દ્વેનવુતે ઇતો કપ્પે, યં ગન્ધમભિરોપયિં;

દુગ્ગતિં નાભિજાનામિ, પઞ્ચઙ્ગુલિસ્સિદં [પઞ્ચઙ્ગુલિયિદં (સી.)] ફલં.

૫૩. ‘‘દ્વેસત્તતિમ્હિતો કપ્પે, રાજા આસિં સયમ્પભો;

સત્તરતનસમ્પન્નો, ચક્કવત્તી મહબ્બલો.

૫૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પઞ્ચઙ્ગુલિયો થેરો ઇમા ગાથાયો અભાસિત્થાતિ;

પઞ્ચઙ્ગુલિયત્થેરસ્સાપદાનં દસમં.

સુપારિચરિયવગ્ગો સત્તરસમો.