૭. વિહારકારસિક્ખાપદવણ્ણના

૩૬૫. તેન સમયેનાતિ વિહારકારસિક્ખાપદં. તત્થ કોસમ્બિયન્તિ એવંનામકે નગરે. ઘોસિતારામેતિ ઘોસિતસ્સ આરામે. ઘોસિતનામકેન કિર સેટ્ઠિના સો કારિતો, તસ્મા ‘‘ઘોસિતારામો’’તિ વુચ્ચતિ. છન્નસ્સાતિ બોધિસત્તકાલે ઉપટ્ઠાકછન્નસ્સ. વિહારવત્થું, ભન્તે, જાનાહીતિ વિહારસ્સ પતિટ્ઠાનટ્ઠાનં, ભન્તે, જાનાહિ. એત્થ ચ વિહારોતિ ન સકલવિહારો, એકો આવાસો, તેનેવાહ – ‘‘અય્યસ્સ વિહારં કારાપેસ્સામી’’તિ.

ચેતિયરુક્ખન્તિ એત્થ ચિત્તીકતટ્ઠેન ચેતિયં, પૂજારહાનં દેવટ્ઠાનાનમેતં અધિવચનં, ‘‘ચેતિય’’ન્તિ સમ્મતં રુક્ખં ચેતિયરુક્ખં. ગામેન પૂજિતં ગામસ્સ વા પૂજિતન્તિ ગામપૂજિતં. એસેવ નયો સેસપદેસુપિ. અપિચેત્થ જનપદોતિ એકસ્સ રઞ્ઞો રજ્જે એકેકો કોટ્ઠાસો. રટ્ઠન્તિ સકલરજ્જં વેદિતબ્બં, સકલરજ્જમ્પિ હિ કદાચિ કદાચિ તસ્સ રુક્ખસ્સ પૂજં કરોતિ, તેન વુત્તં ‘‘રટ્ઠપૂજિત’’ન્તિ. એકિન્દ્રિયન્તિ કાયિન્દ્રિયં સન્ધાય વદન્તિ. જીવસઞ્ઞિનોતિ સત્તસઞ્ઞિનો.

૩૬૬. મહલ્લકન્તિ સસ્સામિકભાવેન સંયાચિકકુટિતો મહન્તભાવો એતસ્સ અત્થીતિ મહલ્લકો. યસ્મા વા વત્થું દેસાપેત્વા પમાણાતિક્કમેનપિ કાતું વટ્ટતિ, તસ્મા પમાણમહન્તતાયપિ મહલ્લકો, તં મહલ્લકં. યસ્મા પનસ્સ તં પમાણમહત્તં સસ્સામિકત્તાવ લબ્ભતિ, તસ્મા તદત્થદસ્સનત્થં ‘‘મહલ્લકો નામ વિહારો સસ્સામિકો વુચ્ચતી’’તિ પદભાજનં વુત્તં. સેસં સબ્બં કુટિકારસિક્ખાપદે વુત્તનયેનેવ વેદિતબ્બં સદ્ધિં સમુટ્ઠાનાદીહિ. સસ્સામિકભાવમત્તમેવ હિ એત્થ કિરિયતો સમુટ્ઠાનાભાવો પમાણનિયમાભાવો ચ વિસેસો, પમાણનિયમાભાવા ચ ચતુક્કપારિહાનીતિ.

વિહારકારસિક્ખાપદવણ્ણના નિટ્ઠિતા.