૧૨. દુતિયસિઙ્ગાલસુત્તવણ્ણના

૨૩૪. દ્વાદસમે કતઞ્ઞુતાતિ કતજાનનં. કતવેદિતાતિ કતવિસેસજાનનં. તત્રિદં જરસિઙ્ગાલસ્સ કતઞ્ઞુતાય વત્થુ – સત્ત કિર ભાતરો ખેત્તં કસન્તિ. તેસં સબ્બકનિટ્ઠો ખેત્તપરિયન્તે ઠત્વા ગાવો રક્ખતિ. અથેકં જરસિઙ્ગાલં અજગરો ગણ્હિ, સો તં દિસ્વા યટ્ઠિયા પોથેત્વા વિસ્સજ્જાપેસિ. અજગરો સિઙ્ગાલં વિસ્સજ્જેત્વા તમેવ ગણ્હિ. સિઙ્ગાલો ચિન્તેસિ – ‘‘મય્હં ઇમિના જીવિતં દિન્નં, અહમ્પિ ઇમસ્સ દસ્સામી’’તિ યાગુઘટસ્સ ઉપરિ ઠપિતં વાસિં મુખેન ડંસિત્વા તસ્સ સન્તિકં અગમાસિ. ઇતરે ભાતરો દિસ્વા, ‘‘સિઙ્ગાલો વાસિં હરતી’’તિ અનુબન્ધિંસુ. સો તેહિ દિટ્ઠભાવં ઞત્વા વાસિં તસ્સ સન્તિકે છડ્ડેત્વા પલાયિ. ઇતરે આગન્ત્વા કનિટ્ઠં અજગરેન ગહિતં દિસ્વા વાસિયા અજગરં છિન્દિત્વા તં ગહેત્વા અગમંસુ. એવં જરસિઙ્ગાલે સિયા યા કાચિ કતઞ્ઞુતા કતવેદિતા. સક્યપુત્તિયપટિઞ્ઞેતિ ઇદમ્પિ દેવદત્તસ્સ આચારમેવ સન્ધાય વુત્તન્તિ. દ્વાદસમં.

ઓપમ્મસંયુત્તવણ્ણના નિટ્ઠિતા.