૪. નોચેદંસુત્તવણ્ણના

૧૧૭. ચતુત્થે નિસ્સટાતિઆદીનિ આદિતો વુત્તપટિસેધેન યોજેત્વા ‘‘ન નિસ્સટા, ન વિસંયુત્તા, ન વિપ્પમુત્તા, ન વિમરિયાદિકતેન ચેતસા વિહરિંસૂ’’તિ એવં વેદિતબ્બાનિ. દુતિયનયે વિમરિયાદિકતેનાતિ નિમ્મરિયાદિકતેન. તત્થ દુવિધા મરિયાદા કિલેસમરિયાદા વટ્ટમરિયાદાતિ. તત્થ ચ યસ્સ ઉપડ્ઢા કિલેસા પહીના, ઉપડ્ઢા અપ્પહીના, વટ્ટં વા પન ઉપડ્ઢં પહીનં, ઉપડ્ઢં અપ્પહીનં, તસ્સ ચિત્તં પહીનકિલેસે વા વટ્ટં વા સન્ધાય વિમરિયાદિકતં, અપ્પહીનકિલેસે વા વટ્ટં વા સન્ધાય ન વિમરિયાદિકતં. ઇધ પન ઉભયસ્સાપિ પહીનત્તા ‘‘વિમરિયાદિકતેન ચેતસા’’તિ વુત્તં, મરિયાદં અકત્વા ઠિતેન અતિક્કન્તમરિયાદેન ચેતસાતિ અત્થો. ઇતિ તીસુપિ ઇમેસુ સુત્તેસુ ચતુસચ્ચમેવ કથિતં. ચતુત્થં.