૮. નન્દસુત્તવણ્ણના

૨૪૨. અટ્ઠમે આકોટિતપચ્ચાકોટિતાનીતિ એકસ્મિં પસ્સે પાણિના વા મુગ્ગરેન વા આકોટનેન આકોટિતાનિ, પરિવત્તેત્વા આકોટનેન પચ્ચાકોટિતાનિ. અઞ્જેત્વાતિ અઞ્જનેન પૂરેત્વા. અચ્છં પત્તન્તિ વિપ્પસન્નવણ્ણં મત્તિકાપત્તં. કસ્મા પન થેરો એવમકાસીતિ? સત્થુ અજ્ઝાસયજાનનત્થં. એવં કિરસ્સ અહોસિ ‘‘સચે સત્થા ‘સોભતિ વત મે અયં કનિટ્ઠભાતિકો’તિ વક્ખતિ, યાવજીવં ઇમિના વાકારેન ચરિસ્સામિ. સચે એત્થ દોસં દસ્સતિ, ઇમં આકારં પહાય સઙ્કારચોળં ગહેત્વા ચીવરં કત્વા ધારેન્તો પરિયન્તસેનાસને વસન્તો ચરિસ્સામી’’તિ. અસ્સસીતિ ભવિસ્સસિ.

અઞ્ઞાતુઞ્છેનાતિ અભિલક્ખિતેસુ ઇસ્સરજનગેહેસુ કટુકભણ્ડસમ્ભારં સુગન્ધં ભોજનં પરિયેસન્તસ્સ ઉઞ્છો ઞાતુઞ્છો નામ. ઘરપટિપાટિયા પન દ્વારે ઠિતેન લદ્ધં મિસ્સકભોજનં અઞ્ઞાતુઞ્છો નામ. અયમિધ અધિપ્પેતો. કામેસુ અનપેક્ખિનન્તિ વત્થુકામકિલેસકામેસુ નિરપેક્ખં. આરઞ્ઞિકો ચાતિઆદિ સબ્બં સમાદાનવસેનેવ વુત્તં. કામેસુ ચ અનપેક્ખોતિ ઇદં સુત્તં દેવલોકે અચ્છરાયો દસ્સેત્વા આગતેન અપરભાગે કથિતં. ઇમસ્સ કથિતદિવસતો પટ્ઠાય થેરો ઘટેન્તો વાયમન્તો કતિપાહેનેવ અરહત્તે પતિટ્ઠાય સદેવકે લોકે અગ્ગદક્ખિણેય્યો જાતો. અટ્ઠમં.