૬. અનુરુદ્ધસુત્તવણ્ણના

૨૨૬. છટ્ઠે પુરાણદુતિયિકાતિ અનન્તરે અત્તભાવે અગ્ગમહેસી. સોભસીતિ પુબ્બેપિ સોભસિ, ઇદાનિપિ સોભસિ. દુગ્ગતાતિ ન ગતિદુગ્ગતિયા દુગ્ગતા. તા હિ સુગતિયં ઠિતા સમ્પત્તિં અનુભવન્તિ, પટિપત્તિદુગ્ગતિયા પન દુગ્ગતા. તતો ચુતા હિ તા નિરયેપિ ઉપપજ્જન્તીતિ દુગ્ગતા. પતિટ્ઠિતાતિ સક્કાયસ્મિં હિ પતિટ્ઠહન્તો અટ્ઠહિ કારણેહિ પતિટ્ઠાતિ – રત્તો રાગવસેન પતિટ્ઠાતિ, દુટ્ઠો દોસવસેન… મૂળ્હો મોહવસેન… વિનિબદ્ધો માનવસેન… પરામટ્ઠો દિટ્ઠિવસેન… થામગતો અનુસયવસેન… અનિટ્ઠઙ્ગતો વિચિકિચ્છાવસેન… વિક્ખેપગતો ઉદ્ધચ્ચવસેન પતિટ્ઠાતિ. તાપિ એવં પતિટ્ઠિતાવ. નરદેવાનન્તિ દેવનરાનં.

નત્થિ દાનીતિ સા કિર દેવધીતા થેરે બલવસિનેહા અહોસિ, પટિગન્તું નાસક્ખિ. કાલેન આગન્ત્વા પરિવેણં સમ્મજ્જતિ, મુખોદકં દન્તકટ્ઠં પાનીયં પરિભોજનીયં ઉપટ્ઠપેતિ. થેરો અનાવજ્જનેન પરિભુઞ્જતિ. એકસ્મિં દિવસે થેરસ્સ જિણ્ણચીવરસ્સ ચોળકભિક્ખં ચરતો સઙ્કારકૂટે દિબ્બદુસ્સં ઠપેત્વા પક્કમિ. થેરો તં દિસ્વા ઉક્ખિપિત્વા, ઓલોકેન્તો દુસ્સન્તં દિસ્વા ‘‘દુસ્સમેત’’ન્તિ ઞત્વા, ‘‘અલં એત્તાવતા’’તિ અગ્ગહેસિ. તેનેવસ્સ ચીવરં નિટ્ઠાસિ. અથ દ્વે અગ્ગસાવકા અનુરુદ્ધત્થેરો ચાતિ તયો જના ચીવરં કરિંસુ. સત્થા સૂચિં યોજેત્વા અદાસિ. નિટ્ઠિતચીવરસ્સ પિણ્ડાય ચરતો દેવતા પિણ્ડપાતં સમાદપેતિ. સા કાલેન એકિકા, કાલેન અત્તદુતિયા થેરસ્સ સન્તિકં આગચ્છતિ. તદા પન અત્તતતિયા આગન્ત્વા દિવાટ્ઠાને થેરં ઉપસઙ્કમિત્વા – ‘‘મયં મનાપકાયિકા નામ મનસા ઇચ્છિતિચ્છિતરૂપં માપેમા’’તિ આહ. થેરો – ‘‘એતા એવં વદન્તિ, વીમંસિસ્સામિ, સબ્બા નીલકા હોન્તૂ’’તિ ચિન્તેસિ. તા થેરસ્સ મનં ઞત્વા સબ્બાવ નીલવણ્ણા અહેસું, એવં પીતલોહિતઓદાતવણ્ણાતિ. તતો ચિન્તયિંસુ – ‘‘થેરો અમ્હાકં દસ્સનં અસ્સાદેતી’’તિ તા સમજ્જં કાતું આરદ્ધા, એકાપિ ગાયિ, એકાપિ નચ્ચિ, એકાપિ અચ્છરં પહરિ. થેરો ઇન્દ્રિયાનિ ઓક્ખિપિ. તતો – ‘‘ન અમ્હાકં દસ્સનં થેરો અસ્સાદેતી’’તિ ઞત્વા સિનેહં વા સન્થવં વા અલભમાના નિબ્બિન્દિત્વા ગન્તુમારદ્ધા. થેરો તાસં ગમનભાવં ઞત્વા – ‘‘મા પુનપ્પુનં આગચ્છિંસૂ’’તિ અરહત્તં બ્યાકરોન્તો ઇમં ગાથમાહ. તત્થ વિક્ખીણોતિ ખીણો. જાતિસંસારોતિ તત્થ તત્થ જાતિસઙ્ખાતો સંસારો. છટ્ઠં.