૭. નાગદત્તસુત્તવણ્ણના

૨૨૭. સત્તમે અતિકાલેનાતિ સબ્બરત્તિં નિદ્દાયિત્વા બલવપચ્ચૂસે કોટિસમ્મુઞ્જનિયા થોકં સમ્મજ્જિત્વા મુખં ધોવિત્વા યાગુભિક્ખાય પાતોવ પવિસતિ. અતિદિવાતિ યાગું આદાય આસનસાલં ગન્ત્વા પિવિત્વા એકસ્મિં ઠાને નિપન્નો નિદ્દાયિત્વા – ‘‘મનુસ્સાનં ભોજનવેલાય પણીતં ભિક્ખં લભિસ્સામી’’તિ ઉપકટ્ઠે મજ્ઝન્હિકે ઉટ્ઠાય ધમ્મકરણેન ઉદકં ગહેત્વા અક્ખીનિ પમજ્જિત્વા પિણ્ડાય ચરિત્વા યાવદત્થં ભુઞ્જિત્વા મજ્ઝન્હિકે વીતિવત્તે પટિક્કમતિ. દિવા ચ આગન્ત્વાતિ અતિકાલે પવિટ્ઠેન નામ અઞ્ઞેહિ ભિક્ખૂહિ પઠમતરં આગન્તબ્બં હોતિ, ત્વં પન અતિવિય દિવા આગન્ત્વા ગતાસીતિ અત્થો. ભાયામિ નાગદત્તન્તિ તં નાગદત્તં અહં ભાયામિ. સુપ્પગબ્ભન્તિ સુટ્ઠુ પગબ્ભં. કુલેસૂતિ ખત્તિયકુલાદિઉપટ્ઠાકકુલેસુ. સત્તમં.