૧. સનઙ્કુમારસુત્તવણ્ણના

૧૮૨. દુતિયવગ્ગસ્સ પઠમે સપ્પિનીતીરેતિ સપ્પિનીનામિકાય નદિયા તીરે. સનઙ્કુમારોતિ સો કિર પઞ્ચસિખકુમારકકાલે ઝાનં ભાવેત્વા બ્રહ્મલોકે નિબ્બત્તો કુમારકવણ્ણેનેવ વિચરતિ. તેન નં ‘‘કુમારો’’તિ સઞ્જાનન્તિ, પોરાણકત્તા પન ‘‘સનઙ્કુમારો’’તિ વુચ્ચતિ. જનેતસ્મિન્તિ જનિતસ્મિં, પજાયાતિ અત્થો. યે ગોત્તપટિસારિનોતિ યે જનેતસ્મિં ગોત્તં પટિસરન્તિ તેસુ લોકે ગોત્તપટિસારીસુ ખત્તિયો સેટ્ઠો. વિજ્જાચરણસમ્પન્નોતિ ભયભેરવસુત્તપરિયાયેન (મ. નિ. ૧.૩૪ આદયો) પુબ્બેનિવાસાદીહિ વા તીહિ, અમ્બટ્ઠસુત્તપરિયાયેન (દી. નિ. ૧.૨૭૮ આદયો) વિપસ્સનાઞાણં મનોમયિદ્ધિ છ અભિઞ્ઞાયોતિ ઇમાહિ વા અટ્ઠહિ વિજ્જાહિ, સીલેસુ પરિપૂરકારિતા ઇન્દ્રિયેસુ ગુત્તદ્વારતા ભોજને મત્તઞ્ઞુતા જાગરિયાનુયોગો સત્ત સદ્ધમ્મા ચત્તારિ રૂપાવચરજ્ઝાનાનીતિ એવં પન્નરસધમ્મભેદેન ચરણેન ચ સમન્નાગતો. સો સેટ્ઠો દેવમાનુસેતિ સો ખીણાસવબ્રાહ્મણો દેવેસુ ચ મનુસ્સેસુ ચ સેટ્ઠો ઉત્તમોતિ. પઠમં.