૬. કુલાવકસુત્તવણ્ણના

૨૫૨. છટ્ઠે અજ્ઝભાસીતિ તસ્સ કિર સિમ્બલિવનાભિમુખસ્સ જાતસ્સ રથસદ્દો ચ આજાનીયસદ્દો ધજસદ્દો ચ સમન્તા અસનિપાતસદ્દો વિય અહોસિ. તં સુત્વા સિમ્બલિવને બલવસુપણ્ણા પલાયિંસુ, જરાજિણ્ણા ચેવ રોગદુબ્બલા ચ અસઞ્જાતપક્ખપોતકા ચ પલાયિતું અસક્કોન્તા, મરણભયેન તજ્જિતા એકપ્પહારેનેવ મહાવિરવં વિરવિંસુ. સક્કો તં સુત્વા ‘‘કસ્સ સદ્દો, તાતા’’તિ? માતલિં પુચ્છિ. રથસદ્દં, તે દેવ, સુત્વા સુપણ્ણા પલાયિતું અસક્કોન્તા વિરવન્તીતિ. તં સુત્વા કરુણાસમાવજ્જિતહદયો અભાસિ. ઈસામુખેનાતિ રથસ્સ ઈસામુખેન. યથા કુલાવકે ઈસામુખં ન સઞ્ચુણ્ણેતિ, એવં ઇમિના ઈસામુખેન તે પરિવજ્જય. સો હિ રથો પુઞ્ઞપચ્ચયનિબ્બત્તો ચક્કવાળપબ્બતેપિ સિનેરુમ્હિપિ સમ્મુખીભૂતે વિનિવિજ્ઝિત્વાવ ગચ્છતિ ન સજ્જતિ, આકાસગતસદિસેનેવ ગચ્છતિ. સચે તેન સિમ્બલિવનેન ગતો ભવેય્ય, યથા મહાસકટે કદલિવનમજ્ઝેન વા એરણ્ડવનમજ્ઝેન વા ગચ્છન્તે સબ્બવનં વિભગ્ગં નિમ્મથિતં હોતિ, એવં તમ્પિ સિમ્બલિવનં ભવેય્ય. છટ્ઠં.