૧૦. એણિજઙ્ઘસુત્તવણ્ણના

૩૦. દસમે એણિજઙ્ઘન્તિ એણિમિગસ્સ વિય સુવટ્ટિતજઙ્ઘં. કિસન્તિ અથૂલં સમસરીરં. અથ વા આતપેન મિલાતં માલાગન્ધવિલેપનેહિ અનુપબ્રૂહિતસરીરન્તિપિ અત્થો. વીરન્તિ વીરિયવન્તં. અપ્પાહારન્તિ ભોજને મત્તઞ્ઞુતાય મિતાહારં, વિકાલભોજનપટિક્ખેપવસેન વા પરિત્તાહારં. અલોલુપન્તિ ચતૂસુ પચ્ચયેસુ લોલુપ્પવિરહિતં. રસતણ્હાપટિક્ખેપો વા એસ. સીહંવેકચરં નાગન્તિ એકચરં સીહં વિય, એકચરં નાગં વિય. ગણવાસિનો હિ પમત્તા હોન્તિ, એકચરા અપ્પમત્તા, તસ્મા એકચરાવ ગહિતાતિ. પવેદિતાતિ પકાસિતા કથિતા. એત્થાતિ એતસ્મિં નામરૂપે. પઞ્ચકામગુણવસેન હિ રૂપં ગહિતં, મનેન નામં, ઉભયેહિ પન અવિનિભુત્તધમ્મે ગહેત્વા પઞ્ચક્ખન્ધાદિવસેનપેત્થ ભુમ્મં યોજેતબ્બન્તિ. દસમં.

સત્તિવગ્ગો તતિયો.