૯. પિણ્ડપાતપારિસુદ્ધિસુત્તવણ્ણના

૪૩૮. એવં મે સુતન્તિ પિણ્ડપાતપારિસુદ્ધિસુત્તં. તત્થ પટિસલ્લાનાતિ ફલસમાપત્તિતો.

વિપ્પસન્નાનીતિ ઓકાસવસેનેતં વુત્તં. ફલસમાપત્તિતો હિ વુટ્ઠિતસ્સ પઞ્ચહિ પસાદેહિ પતિટ્ઠિતોકાસો વિપ્પસન્નો હોતિ, છવિવણ્ણો પરિસુદ્ધો. તસ્મા એવમાહ. સુઞ્ઞતવિહારેનાતિ સુઞ્ઞતફલસમાપત્તિવિહારેન. મહાપુરિસવિહારોતિ બુદ્ધપચ્ચેકબુદ્ધતથાગતમહાસાવકાનં મહાપુરિસાનં વિહારો. યેન ચાહં મગ્ગેનાતિઆદીસુ વિહારતો પટ્ઠાય યાવ ગામસ્સ ઇન્દખીલા એસ પવિટ્ઠમગ્ગો નામ, અન્તોગામં પવિસિત્વા ગેહપટિપાટિયા ચરિત્વા યાવ નગરદ્વારેન નિક્ખમના એસ ચરિતબ્બપદેસો નામ, બહિ ઇન્દખીલતો પટ્ઠાય યાવ વિહારા એસ પટિક્કન્તમગ્ગો નામ. પટિઘં વાપિ ચેતસોતિ ચિત્તે પટિહઞ્ઞનકિલેસજાતં કિઞ્ચિ અત્થિ નત્થીતિ. અહોરત્તાનુસિક્ખિનાતિ દિવસઞ્ચ રત્તિઞ્ચ અનુસિક્ખન્તેન.

૪૪૦. પહીના નુ ખો મે પઞ્ચ કામગુણાતિઆદીસુ એકભિક્ખુસ્સ પચ્ચવેક્ખણા નાના, નાનાભિક્ખૂનં પચ્ચવેક્ખણા નાનાતિ. કથં? એકો હિ ભિક્ખુ પચ્છાભત્તં પિણ્ડપાતપટિક્કન્તો પત્તચીવરં પટિસામેત્વા વિવિત્તોકાસે નિસિન્નો પચ્ચવેક્ખતિ ‘‘પહીના નુ ખો મે પઞ્ચકામગુણા’’તિ. સો ‘‘અપ્પહીના’’તિ ઞત્વા વીરિયં પગ્ગય્હ અનાગામિમગ્ગેન પઞ્ચકામગુણિકરાગં સમુગ્ઘાટેત્વા મગ્ગાનન્તરં ફલં ફલાનન્તરં મગ્ગં તતો વુટ્ઠાય પચ્ચવેક્ખન્તો ‘‘પહીના’’તિ પજાનાતિ. નીવરણાદીસુપિ એસેવ નયો. એતેસં પન અરહત્તમગ્ગેન પહાનાદીનિ હોન્તિ, એવં એકભિક્ખુસ્સ નાનાપચ્ચવેક્ખણા હોતિ. એતાસુ પન પચ્ચવેક્ખણાસુ અઞ્ઞો ભિક્ખુ એકં પચ્ચવેક્ખણં પચ્ચવેક્ખતિ, અઞ્ઞો એકન્તિ એવં નાનાભિક્ખૂનં નાનાપચ્ચવેક્ખણા હોતિ. સેસં સબ્બત્થ ઉત્તાનમેવાતિ.

પપઞ્ચસૂદનિયા મજ્ઝિમનિકાયટ્ઠકથાય

પિણ્ડપાતપારિસુદ્ધિસુત્તવણ્ણના નિટ્ઠિતા.