૯. મટ્ઠકુણ્ડલીવિમાનવણ્ણના

અલઙ્કતો મટ્ઠકુણ્ડલીતિ મટ્ઠકુણ્ડલીવિમાનં. તસ્સ કા ઉપ્પત્તિ? ભગવા સાવત્થિયં વિહરતિ જેતવને. તેન સમયેન સાવત્થિવાસી એકો બ્રાહ્મણો અદ્ધો મહદ્ધનો મહાભોગો અસ્સદ્ધો અપ્પસન્નો મિચ્છાદિટ્ઠિકો કસ્સચિ કિઞ્ચિ ન દેતિ, અદાનતો એવ ‘‘અદિન્નપુબ્બકો’’તિ પઞ્ઞાયિત્થ. સો મિચ્છાદિટ્ઠિભાવેન ચ લુદ્ધભાવેન ચ તથાગતં વા તથાગતસાવકં વા દટ્ઠુમ્પિ ન ઇચ્છતિ. મટ્ઠકુણ્ડલં નામ અત્તનો પુત્તઞ્ચ સિક્ખાપેસિ ‘‘તાત, તયા સમણો ગોતમો તસ્સ સાવકા ચ ન ઉપસઙ્કમિતબ્બા ન દટ્ઠબ્બા’’તિ. સોપિ તથા અકાસિ. અથસ્સ પુત્તો ગિલાનો અહોસિ, બ્રાહ્મણો ધનક્ખયભયેન ભેસજ્જં ન કારેસિ, રોગે પન વડ્ઢિતેવ વેજ્જે પક્કોસિત્વા દસ્સેસિ. વેજ્જા તસ્સ સરીરં ઓલોકેત્વા ‘‘અતેકિચ્છો’’તિ તં ઞત્વા અપક્કમિંસુ. બ્રાહ્મણો ‘‘પુત્તે અબ્ભન્તરે મતે નીહરણં દુક્ખ’’ન્તિ પુત્તં બહિદ્વારકોટ્ઠકે નિપજ્જાપેસિ.

ભગવા રત્તિયા પચ્ચૂસસમયે મહાકરુણાસમાપત્તિતો વુટ્ઠાય લોકં વોલોકેન્તો અદ્દસ મટ્ઠકુણ્ડલીમાણવં ખીણાયુકં તદહેવ ચવનધમ્મં, નિરયસંવત્તનિકઞ્ચસ્સ કમ્મં કતોકાસં. ‘‘સચે પનાહં તત્થ ગમિસ્સામિ, સો મયિ ચિત્તં પસાદેત્વા દેવલોકે નિબ્બત્તિત્વા પિતરં આળાહને રોદમાનં ઉપગન્ત્વા સંવેજેસ્સતિ, એવં સો ચ તસ્સ પિતા ચ મમ સન્તિકં આગમિસ્સતિ, મહાજનકાયો સન્નિપતિસ્સતિ તત્થ મયા ધમ્મે દેસિતે મહાધમ્માભિસમયો ભવિસ્સતી’’તિ એવં પન ઞત્વા પુબ્બણ્હસમયં નિવાસેત્વા પત્તચીવરમાદાય મહતા ભિક્ખુસઙ્ઘેન સદ્ધિં સાવત્થિં પિણ્ડાય પવિટ્ઠો મટ્ઠકુણ્ડલીમાણવસ્સ પિતુ ગેહસમીપે ઠત્વા છબ્બણ્ણબુદ્ધરંસિયો વિસ્સજ્જેસિ. તા દિસ્વા માણવો ‘‘કિમેત’’ન્તિ ઇતો ચિતો ચ વિલોકેન્તો અદ્દસ ભગવન્તં દન્તં ગુત્તં સન્તિન્દ્રિયં દ્વત્તિંસાય મહાપુરિસલક્ખણેહિ અસીતિયા અનુબ્યઞ્જનેહિ બ્યામપ્પભાય કેતુમાલાય ચ વિજ્જોતમાનં અનુપમાય બુદ્ધસિરિયા અચિન્તેય્યેન બુદ્ધાનુભાવેન વિરોચમાનં. દિસ્વા તસ્સ એતદહોસિ ‘‘બુદ્ધો નુ ખો ભગવા ઇધાનુપ્પત્તો, યસ્સાયં રૂપસમ્પદા અત્તનો તેજસા સૂરિયમ્પિ અભિભવતિ, કન્તભાવેન ચન્દિમં, ઉપસન્તભાવેન સબ્બેપિ સમણબ્રાહ્મણે, ઉપસમેન નામ એત્થેવ ભવિતબ્બં, અયમેવ ચ મઞ્ઞે ઇમસ્મિં લોકે અગ્ગપુગ્ગલો, મમેવ ચ અનુકમ્પાય ઇધાનુપ્પત્તો’’તિ બુદ્ધારમ્મણાય પીતિયા નિરન્તરં ફુટસરીરો અનપ્પકં પીતિસોમનસ્સં પટિસંવેદેન્તો પસન્નચિત્તો અઞ્જલિં પગ્ગય્હ નિપજ્જિ. તં દિસ્વા ભગવા ‘‘અલં ઇમસ્સ એત્તકેન સગ્ગૂપપત્તિયા’’તિ પક્કામિ.

સોપિ તં પીતિસોમનસ્સં અવિજહન્તોવ કાલં કત્વા તાવતિંસેસુ દ્વાદસયોજનિકે વિમાને નિબ્બત્તિ. પિતા પનસ્સ સરીરસક્કારં કરિત્વા દુતિયદિવસે પચ્ચૂસવેલાયં આળાહનં ગન્ત્વા ‘‘હા હા મટ્ઠકુણ્ડલિ, હા હા મટ્ઠકુણ્ડલી’’તિ પરિદેવમાનો આળાહનં અનુપરિક્કમન્તો રોદતિ. દેવપુત્તો અત્તનો વિભવસમ્પત્તિં ઓલોકેત્વા ‘‘કુતો નુ ખો અહં ઇધાગતો કિઞ્ચ કમ્મં કત્વા’’તિ ઉપધારેન્તો અત્તનો પુરિમત્તભાવં ઞત્વા તત્થ ચ મરણકાલે ભગવતિ પવત્તિતં ચિત્તપ્પસાદં મનોહરં અઞ્જલિકરણમત્તં દિસ્વા ‘‘અહો મહાનુભાવા બુદ્ધા ભગવન્તો’’તિ સાતિસયં તથાગતે સઞ્જાતપ્પસાદબહુમાનો ‘‘અદિન્નપુબ્બકબ્રાહ્મણો નુ ખો કિં કરોતી’’તિ ઉપધારેન્તો આળાહને રોદમાનં દિસ્વા ‘‘અયં મય્હં પુબ્બે ભેસજ્જમત્તમ્પિ અકત્વા ઇદાનિ નિરત્થકં આળાહને રોદતિ, હન્દ નં સંવેજેત્વા કુસલે પતિટ્ઠાપેસ્સામી’’તિ દેવલોકતો આગન્ત્વા મટ્ઠકુણ્ડલીરૂપેન રોદમાનો ‘‘હા હા ચન્દ, હા હા સૂરિયા’’તિ બાહા પગ્ગય્હ કન્દન્તો પિતુ સમીપે અટ્ઠાસિ. અથ નં બ્રાહ્મણો ‘‘અયં મટ્ઠકુણ્ડલી આગતો’’તિ ચિન્તેત્વા ગાથાય અજ્ઝભાસિ –

૧૨૦૭. ‘‘અલઙ્કતો મટ્ઠકુણ્ડલી, માલધારી હરિચન્દનુસ્સદો;

બાહા પગ્ગય્હ કન્દસિ, વનમજ્ઝે કિં દુક્ખિતો તુવ’’ન્તિ.

તત્થ અલઙ્કતોતિ વિભૂસિતો. મટ્ઠકુણ્ડલીતિ સરીરપ્પદેસસ્સ અઘંસનત્થં માલાલતાદયો અદસ્સેત્વા મટ્ઠાકારેનેવ કતકુણ્ડલો. અથ વા મટ્ઠકુણ્ડલીતિ વિસુદ્ધકુણ્ડલો, તાપેત્વા જાતિહિઙ્ગુલિકાય મજ્જિત્વા ધોવિત્વા સૂકરલોમેન મજ્જિતકુણ્ડલોતિ અત્થો. માલધારીતિ માલં ધારેન્તો, પિળન્ધિતમાલોતિ અત્થો. હરિચન્દનુસ્સદોતિ રત્તચન્દનેન સબ્બસો અનુલિત્તગત્તો. કિન્તિ પુચ્છાવચનં. દુક્ખિતોતિ દુક્ખપ્પત્તો. કિંદુક્ખિતોતિ વા એકમેવ પદં, કેન દુક્ખેન દુક્ખિતોતિ અત્થો.

અથ નં દેવપુત્તો આહ –

૧૨૦૮. ‘‘સોવણ્ણમયો પભસ્સરો, ઉપ્પન્નો રથપઞ્જરો મમ;

તસ્સ ચક્કયુગં ન વિન્દામિ, તેન દુક્ખેન જહામિ જીવિત’’ન્તિ.

અથ નં બ્રાહ્મણો આહ –

૧૨૦૯. ‘‘સોવણ્ણમયં મણિમયં, લોહિતકમયં અથ રૂપિયમયં;

આચિક્ખ મે ભદ્દમાણવ, ચક્કયુગં પટિપાદયામિ તે’’તિ.

તં સુત્વા માણવો ‘‘અયં પુત્તસ્સ ભેસજ્જં અકત્વા પુત્તપતિરૂપકં મં દિસ્વા રોદન્તો ‘સુવણ્ણાદિમયં રથચક્કં કરોમી’તિ વદતિ, હોતુ નિગ્ગણ્હિસ્સામિ ન’’ન્તિ ચિન્તેત્વા ‘‘કીવ મહન્તં મે ચક્કયુગં કરિસ્સસી’’તિ વત્વા ‘‘યાવ મહન્તં આકઙ્ખસી’’તિ વુત્તે ‘‘ચન્દિમસૂરિયેહિ મે અત્થો, તે મે દેહી’’તિ યાચન્તો –

૧૨૧૦. ‘‘સો માણવો તસ્સ પાવદિ, ચન્દસૂરિયા ઉભયેત્થ દિસ્સરે;

સોવણ્ણમયો રથો મમ, તેન ચક્કયુગેન સોભતી’’તિ.

અથ નં બ્રાહ્મણો આહ –

૧૨૧૧. ‘‘બાલો ખો ત્વં અસિ માણવ, યો ત્વં પત્થયસે અપત્થિયં;

મઞ્ઞામિ તુવં મરિસ્સસિ, ન હિ ત્વં લચ્છસિ ચન્દસૂરિયે’’તિ.

અથ નં માણવો ‘‘કિં પન પઞ્ઞાયમાનસ્સત્થાય રોદન્તો બાલો હોતિ, ઉદાહુ અપઞ્ઞાયમાનસ્સા’’તિ વત્વા –

૧૨૧૨. ‘‘ગમનાગમનમ્પિ દિસ્સતિ, વણ્ણધાતુ ઉભયત્થ વીથિયા;

પેતો કાલકતો ન દિસ્સતિ, કો નિધ કન્દતં બાલ્યતરો’’તિ.

તં સુત્વા બ્રાહ્મણો ‘‘યુત્તં એસ વદતી’’તિ સલ્લક્ખેત્વા –

૧૨૧૩. ‘‘સચ્ચં ખો વદેસિ માણવ, અહમેવ કન્દતં બાલ્યતરો;

ચન્દં વિય દારકો રુદં, પેતં કાલકતાભિપત્થયિ’’ન્તિ. –

વત્વા તસ્સ કથાય નિસ્સોકો હુત્વા માણવસ્સ થુતિં કરોન્તો ઇમા ગાથા અભાસિ –

૧૨૧૪. ‘‘આદિત્તં વત મં સન્તં, ઘતસિત્તંવ પાવકં;

વારિના વિય ઓસિઞ્ચં, સબ્બં નિબ્બાપયે દરં.

૧૨૧૫. ‘‘અબ્બહી વત મે સલ્લં, સોકં હદયનિસ્સિતં;

યો મે સોકપરેતસ્સ, પુત્તસોકં અપાનુદિ.

૧૨૧૬. ‘‘સ્વાહં અબ્બૂળ્હસલ્લોસ્મિ, સીતિભૂતોસ્મિ નિબ્બુતો;

ન સોચામિ ન રોદામિ, તવ સુત્વાન માણવા’’તિ.

૧૨૦૮-૧૦. તત્થ રથપઞ્જરોતિ રથૂપત્થં. ન વિન્દામીતિ ન લભામિ. ભદ્દમાણવાતિ આલપનં. પટિપાદયામીતિ સમ્પાદેત્વા દદામિ, મા ચક્કયુગાભાવેન જીવિતં જહીતિ અધિપ્પાયો. ઉભયેત્થ દિસ્સરેતિ ઉભોપિ એત્થ ચન્દસૂરિયા આકાસે દિસ્સન્તિ. ય-કારો પદસન્ધિકરો, ઉભયે એત્થાતિ વા પદવિભાગો.

૧૨૧૨. ગમનાગમનન્તિ દિવસે દિવસે ઓગમનુગ્ગમનવસેન ચન્દસૂરિયાનં ગમનં આગમનઞ્ચ દિસ્સતિ. ‘‘ગમનોગમન’’ન્તિપિ પાળિ, ઉગ્ગમનં ઓગમનઞ્ચાતિ અત્થો. વણ્ણધાતૂતિ સીતિભાવવિસિટ્ઠા કન્તભાવભાસુરા, ઉણ્હભાવવિસિટ્ઠા તિક્ખભાવભાસુરા ચ વણ્ણનિભા. ઉભયત્થાતિ ચન્દે સૂરિયે ચાતિ દ્વીસુપિ વણ્ણધાતુ દિસ્સતીતિ યોજેતબ્બં. વીથિયાતિ પવત્તનવીથિયં આકાસે, નાગવીથિયાદિવીથિયં વા. ‘‘ઉભયેત્થા’’તિપિ પાઠો, ઉભયે એત્થાતિ પદવિસન્ધિ. બાલ્યતરોતિ બાલતરો અતિસયેન બાલો.

૧૨૧૩. ઇમં પન કથં સુત્વા ‘‘અલબ્ભનીયવત્થું વતાહં પત્થેત્વા કેવલં સોકગ્ગિના ડય્હામિ, કિં મે નિરત્થકેન અનયબ્યસનેના’’તિ પટિસઙ્ખાને અટ્ઠાસિ. અથ દેવપુત્તો મટ્ઠકુણ્ડલીરૂપં પટિસંહરિત્વા અત્તનો દિબ્બરૂપેનેવ અટ્ઠાસિ. બ્રાહ્મણો પન તં અનોલોકેત્વા માણવવોહારેનેવ વોહરન્તો ‘‘સચ્ચં ખો વદેસિ માણવા’’તિઆદિમાહ. તત્થ ચન્દં વિય દારકો રુદન્તિ ચન્દં અભિપત્થયં રુદન્તો દારકો વિયાતિ અત્થો. કાલકતાભિપત્થયિન્તિ કાલકતં અભિપત્થયિં. ‘‘અભિપત્થય’’ન્તિપિ પાઠો.

૧૨૧૪-૫. આદિત્તન્તિ સોકગ્ગિના આદિત્તં. નિબ્બાપયે દરન્તિ નિબ્બાપયિ દરથં સોકપરિળાહં. અબ્બહીતિ ઉદ્ધરિ.

અથ બ્રાહ્મણો સોકં વિનોદેત્વા અત્તનો ઉપદેસદાયકં દિબ્બરૂપેન ઠિતં દિસ્વા ‘‘કો નામ ત્વ’’ન્તિ પુચ્છન્તો –

૧૨૧૭. ‘‘દેવતા નુસિ ગન્ધબ્બો, અદુ સક્કો પુરિન્દદો;

કો વા ત્વં કસ્સ વા પુત્તો, કથં જાનેમુ તં મય’’ન્તિ. –

આહ. સોપિ તસ્સ –

૧૨૧૮. ‘‘યઞ્ચ કન્દસિ યઞ્ચ રોદસિ, પુત્તં આળાહને સયં દહિત્વા;

સ્વાહં કુસલં કરિત્વા કમ્મં, તિદસાનં સહબ્યતં ગતો’’તિ. –

અત્તાનં કથેસિ. તત્થ યઞ્ચ કન્દસિ યઞ્ચ રોદસીતિ યં તવ પુત્તં મટ્ઠકુણ્ડલિં ઉદ્દિસ્સ રોદસિ, અસ્સૂનિ મુઞ્ચસિ.

અથ નં બ્રાહ્મણો આહ –

૧૨૧૯. ‘‘અપ્પં વા બહું વા નાદ્દસામ, દાનં દદન્તસ્સ સકે અગારે;

ઉપોસથકમ્મં વા તાદિસં, કેન કમ્મેન ગતોસિ દેવલોક’’ન્તિ.

તત્થ ‘‘ઉપોસથકમ્મં વા તાદિસં નાદ્દસામા’’તિ યોજના.

અથ નં માણવો આહ –

૧૨૨૦. ‘‘આબાધિકોહં દુક્ખિતો ગિલાનો, આતુરરૂપોમ્હિ સકે નિવેસને;

બુદ્ધં વિગતરજં વિતિણ્ણકઙ્ખં, અદ્દક્ખિં સુગતં અનોમપઞ્ઞં.

૧૨૨૧. ‘‘સ્વાહં મુદિતમનો પસન્નચિત્તો, અઞ્જલિં અકરિં તથાગતસ્સ;

તાહં કુસલં કરિત્વાન કમ્મં, તિદસાનં સહબ્યતં ગતો’’તિ.

૧૨૨૦-૨૧. તત્થ આબાધિકોતિ આબાધસમઙ્ગી. દુક્ખિતોતિ તેનેવ આબાધિકભાવેન જાતદુક્ખો. ગિલાનોતિ ગિલાયમાનોતિ અત્થો. આતુરરૂપોતિ દુક્ખવેદનાભિતુન્નકાયો. વિગતરજન્તિ વિગતરાગાદિરજં. વિતિણ્ણકઙ્ખન્તિ સબ્બસો સંસયાનં સમુચ્છિન્નત્તા તિણ્ણવિચિકિચ્છં. અનોમપઞ્ઞન્તિ પરિપુણ્ણપઞ્ઞં, સબ્બઞ્ઞુન્તિ અત્થો. અકરિન્તિ અકાસિં. તાહન્તિ તં અહં.

એવં તસ્મિં કથેન્તેયેવ બ્રાહ્મણસ્સ સકલસરીરં પીતિયા પરિપૂરિ. સો તં પીતિં પવેદેન્તો –

૧૨૨૨. ‘‘અચ્છરિયં વત અબ્ભુતં વત,

અઞ્જલિકમ્મસ્સ અયમીદિસો વિપાકો;

અહમ્પિ મુદિતમનો પસન્નચિત્તો,

અજ્જેવ બુદ્ધં સરણં વજામી’’તિ. – આહ;

તત્થ અનભિણ્હપ્પવત્તિતાય અચ્છરં પહરિતું યોગ્ગન્તિ અચ્છરિયં, અભૂતપુબ્બતાય અબ્ભુતં. ઉભયેનપિ વિમ્હયાવહતંયેવ દસ્સેત્વા ‘‘અહમ્પિ મુદિતમનો પસન્નચિત્તો, અજ્જેવ બુદ્ધં સરણં વજામી’’તિ આહ.

અથ નં દેવપુત્તો સરણગમને સીલસમાદાને ચ નિયોજેન્તો –

૧૨૨૩. ‘‘અજ્જેવ બુદ્ધં સરણં વજાહિ, ધમ્મઞ્ચ સઙ્ઘઞ્ચ પસન્નચિત્તો;

તથેવ સિક્ખાય પદાનિ પઞ્ચ, અખણ્ડફુલ્લાનિ સમાદિયસ્સુ.

૧૨૨૪. ‘‘પાણાતિપાતા વિરમસ્સુ ખિપ્પં, લોકે અદિન્નં પરિવજ્જયસ્સુ;

અમજ્જપો મા ચ મુસા ભણાહિ, સકેન દારેન ચ હોહિ તુટ્ઠો’’તિ. –

ગાથાદ્વયમાહ.

૧૨૨૩. તત્થ તથેવાતિ યથા પસન્નચિત્તો ‘‘સમ્માસમ્બુદ્ધો ભગવા’’તિ બુદ્ધં સરણં વજેસિ, તથેવ ‘‘સ્વાક્ખાતો ધમ્મો, સુપ્પટિપન્નો સઙ્ઘો’’તિ પસન્નચિત્તો ધમ્મઞ્ચ સઙ્ઘઞ્ચ સરણં વજાહિ. યથા વા પસન્નચિત્તો રતનત્તયં સરણં વજેસિ, તથેવ ‘‘અયં એકંસતો દિટ્ઠેવ ધમ્મે અભિસમ્પરાયઞ્ચ હિતસુખાવહો’’તિ પસન્નચિત્તો સિક્ખાય અધિસીલસિક્ખાય પદાનિ કોટ્ઠાસભૂતાનિ અધિચિત્તઅધિપઞ્ઞાસિક્ખાય વા ઉપાયભૂતાનિ પઞ્ચસીલાનિ અવિકોપનતો ચ અસંકિલિસ્સનતો ચ અખણ્ડફુલ્લાનિ સમાદિયસ્સુ, સમાદાય વત્તસ્સૂતિ અત્થો.

એવં દેવપુત્તેન સરણગમને સીલસમાદાને ચ નિયોજિતો બ્રાહ્મણો તસ્સ વચનં સિરસા સમ્પટિચ્છન્તો –

૧૨૨૫. ‘‘અત્થકામોસિ મે યક્ખ, હિતકામોસિ દેવતે;

કરોમિ તુય્હં વચનં, ત્વંસિ આચરિયો મમા’’તિ. –

ગાથં વત્વા તત્થ પતિટ્ઠહન્તો –

૧૨૨૬. ‘‘ઉપેમિ સરણં બુદ્ધં, ધમ્મઞ્ચાપિ અનુત્તરં;

સઙ્ઘઞ્ચ નરદેવસ્સ, ગચ્છામિ સરણં અહં.

૧૨૨૭. ‘‘પાણાતિપાતા વિરમામિ ખિપ્પં, લોકે અદિન્નં પરિવજ્જયામિ;

અમજ્જપો નો ચ મુસા ભણામિ, સકેન દારેન ચ હોમિ તુટ્ઠો’’તિ. –

ગાથાદ્વયમાહ. તમ્પિ સુવિઞ્ઞેય્યમેવ.

તતો દેવપુત્તો ‘‘કતં મયા બ્રાહ્મણસ્સ કત્તબ્બયુત્તકં, ઇદાનિ સયમેવ ભગવન્તં ઉપસઙ્કમિસ્સતી’’તિ તત્થેવ અન્તરધાયિ. બ્રાહ્મણોપિ ખો ભગવતિ સઞ્જાતપસાદબહુમાનો દેવતાય ચ ચોદિયમાનો ‘‘સમણં ગોતમં ઉપસઙ્કમિસ્સામી’’તિ વિહારાભિમુખો ગચ્છતિ. તં દિસ્વા મહાજનો ‘‘અયં બ્રાહ્મણો એત્તકં કાલં તથાગતં અનુપસઙ્કમિત્વા અજ્જ પુત્તસોકેન ઉપસઙ્કમતિ, કીદિસી નુ ખો ધમ્મદેસના ભવિસ્સતી’’તિ તં અનુબન્ધિ.

બ્રાહ્મણો ભગવન્તં ઉપસઙ્કમિત્વા પટિસન્થારં કત્વા એવમાહ ‘‘સક્કા નુ ખો ભો ગોતમ કિઞ્ચિ દાનં અદત્વા સીલં વા અરક્ખિત્વા કેવલં તુમ્હેસુ પસાદમત્તેન સગ્ગે નિબ્બત્તિતુ’’ન્તિ. ‘‘નનુ, બ્રાહ્મણ, અજ્જ પચ્ચૂસવેલાયં મટ્ઠકુણ્ડલિના દેવપુત્તેન અત્તનો દેવલોકૂપપત્તિકારણં તુય્હં કથિક’’ન્તિ ભગવા અવોચ. તસ્મિં ખણે મટ્ઠકુણ્ડલીદેવપુત્તો સહ વિમાનેન આગન્ત્વા દિસ્સમાનરૂપો વિમાનતો ઓરુય્હ ભગવન્તં અભિવાદેત્વા અઞ્જલિં પગ્ગય્હ એકમન્તં અટ્ઠાસિ. અથ ભગવા તસ્સં પરિસતિ તેન દેવપુત્તેન કતસુચરિતં કથેત્વા પરિસાય ચિત્તકલ્લતં ઞત્વા સામુક્કંસિકં ધમ્મદેસનં અકાસિ. દેસનાપરિયોસાને દેવપુત્તો ચ બ્રાહ્મણો ચ સન્નિપતિતપરિસા ચાતિ ચતુરાસીતિયા પાણસહસ્સાનં ધમ્માભિસમયો અહોસીતિ.

મટ્ઠકુણ્ડલીવિમાનવણ્ણના નિટ્ઠિતા.