૧૧. વન્દનવિમાનવણ્ણના

અભિક્કન્તેન વણ્ણેનાતિ વન્દનવિમાનં. તસ્સ કા ઉપ્પત્તિ? ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન સમયેન સમ્બહુલા ભિક્ખૂ અઞ્ઞતરસ્મિં ગામકાવાસે વસ્સં વસિત્વા વુત્થવસ્સા પવારેત્વા સેનાસનં પટિસામેત્વા પત્તચીવરમાદાય સાવત્થિં ઉદ્દિસ્સ ભગવન્તં દસ્સનત્થાય ગચ્છન્તા અઞ્ઞતરસ્સ ગામસ્સ મજ્ઝેન અતિક્કમન્તિ. તત્થ અઞ્ઞતરા ઇત્થી તે ભિક્ખૂ દિસ્વા પસન્નચિત્તા સઞ્જાતગારવબહુમાના પઞ્ચપતિટ્ઠિતેન વન્દિત્વા સિરસ્મિં અઞ્જલિં પગ્ગય્હ યાવ દસ્સનૂપચારા પસાદસોમ્માનિ અક્ખીનિ ઉમ્મીલેત્વા ઓલોકેન્તી અટ્ઠાસિ. સા અપરેન સમયેન કાલં કત્વા તાવતિંસેસુ નિબ્બત્તિ. અથ નં તત્થ દિબ્બસમ્પત્તિં અનુભવન્તિં આયસ્મા મહામોગ્ગલ્લાનો ઇમાહિ ગાથાહિ પટિપુચ્છિ –

૮૧૯. ‘‘અભિક્કન્તેન વણ્ણેન…પે…વણ્ણો ચ તે સબ્બદિસા પભાસતી’’તિ.

૮૨૨. ‘‘સા દેવતા અત્તમના…પે… યસ્સ કમ્મસ્સિદં ફલં’’.

૮૨૩. ‘‘અહં મનુસ્સેસુ મનુસ્સભૂતા, દિસ્વાન સમણે સીલવન્તે;

પાદાનિ વન્દિત્વા મનં પસાદયિં, વિત્તા ચહં અઞ્જલિકં અકાસિં.

૮૨૪. ‘‘તેન મેતાદિસો વણ્ણો…પે…વણ્ણો ચ મે સબ્બદિસા પભાસતી’’તિ. –

ઇમાહિ ગાથાહિ બ્યાકાસિ.

૮૨૩. તત્થ સમણેતિ સમિતપાપે. સીલવન્તેતિ સીલગુણયુત્તે. મનં પસાદયિન્તિ ‘‘સાધુરૂપા વતિમે અય્યા ધમ્મચારિનો સમચારિનો બ્રહ્મચારિનો’’તિ તેસં ગુણે આરબ્ભ ચિત્તં પસાદેસિં. વિત્તા ચહં અઞ્જલિકં અકાસિન્તિ તુટ્ઠા સોમનસ્સજાતા અહં વન્દિં. પેસલાનં ભિક્ખૂનં પસાદવિકસિતાનિ અક્ખીનિ ઉમ્મીલેત્વા દસ્સનમત્તમ્પિ ઇમેસં સત્તાનં બહૂપકારં, પગેવ વન્દનાતિ. તેનાહ ‘‘તેન મેતાદિસો વણ્ણો’’તિઆદિ. સેસં વુત્તનયમેવ.

વન્દનવિમાનવણ્ણના નિટ્ઠિતા.