૧૦. ઉચ્છુવિમાનવણ્ણના

ઓભાસયિત્વા પથવિં સદેવકન્તિ ઉચ્છુવિમાનં. તં હેટ્ઠા ઉચ્છુવિમાનેન પાળિતો ચ અટ્ઠુપ્પત્તિતો ચ સદિસમેવ. કેવલં તત્થ સસ્સુ સુણિસં પીઠકેન પહરિત્વા મારેસિ, ઇધ પન લેડ્ડુનાતિ અયમેવ વિસેસો. વત્થુનો પન ભિન્નત્તા ઉભયમ્પિ વિસુંયેવ સઙ્ગહં આરુળ્હન્તિ વેદિતબ્બં.

૮૦૮. ‘‘ઓભાસયિત્વા પથવિં સદેવકં, અતિરોચસિ ચન્દિમસૂરિયા વિય;

સિરિયા ચ વણ્ણેન યસેન તેજસા, બ્રહ્માવ દેવે તિદસે સહિન્દકે.

૮૦૯. ‘‘પુચ્છામિ તં ઉપ્પલમાલધારિની, આવેળિની કઞ્ચનસન્નિભત્તચે;

અલઙ્કતે ઉત્તમવત્થધારિની, કા ત્વં સુભે દેવતે વન્દસે મમં.

૮૧૦. ‘‘કિં ત્વં પુરે કમ્મમકાસિ અત્તના, મનુસ્સભૂતા પુરિમાય જાતિયા;

દાનં સુચિણ્ણં અથ સીલસઞ્ઞમં, કેનુપપન્ના સુગતિં યસસ્સિની;

દેવતે પુચ્છિતાચિક્ખ, કિસ્સ કમ્મસ્સિદં ફલ’’ન્તિ. –

આયસ્મા મહામોગ્ગલ્લાનત્થેરો પુચ્છિ. તતો દેવતા ઇમાહિ ગાથાહિ બ્યાકાસિ –

૮૧૧. ‘‘ઇદાનિ ભન્તે ઇમમેવ ગામં, પિણ્ડાય અમ્હાકં ઘરં ઉપાગમિ;

તતો તે ઉચ્છુસ્સ અદાસિં ખણ્ડિકં, પસન્નચિત્તા અતુલાય પીતિયા.

૮૧૨. ‘‘સસ્સુ ચ પચ્છા અનુયુઞ્જતે મમં, કહં નુ ઉચ્છું વધુકે અવાકિરિ;

ન છડ્ડિતં નો પન ખાદિતં મયા, સન્તસ્સ ભિક્ખુસ્સ સયં અદાસહં.

૮૧૩. ‘‘‘તુય્હં ન્વિદં ઇસ્સરિયં અથો મમ’, ઇતિસ્સા સસ્સુ પરિભાસતે મમં;

લેડ્ડું ગહેત્વા પહારં અદાસિ મે, તતો ચુતા કાલકતામ્હિ દેવતા.

૮૧૪. ‘‘તદેવ કમ્મં કુસલં કતં મયા, સુખઞ્ચ કમ્મં અનુભોમિ અત્તના;

દેવેહિ સદ્ધિં પરિચારયામહં, મોદામહં કામગુણેહિ પઞ્ચહિ.

૮૧૫. ‘‘તદેવ કમ્મં કુસલં કતં મયા, સુખઞ્ચ કમ્મં અનુભોમિ અત્તના;

દેવિન્દગુત્તા તિદસેહિ રક્ખિતા, સમપ્પિતા કામગુણેહિ પઞ્ચહિ.

૮૧૬. ‘‘એતાદિસં પુઞ્ઞફલં અનપ્પકં, મહાવિપાકા મમ ઉચ્છુદક્ખિણા;

દેવેહિ સદ્ધિં પરિચારયામહં, મોદામહં કામગુણેહિ પઞ્ચહિ.

૮૧૭. ‘‘એતાદિસં પુઞ્ઞફલં અનપ્પકં, મહાજુતિકા મમ ઉચ્છુદક્ખિણા;

દેવિન્દગુત્તા તિદસેહિ રક્ખિતા, સહસ્સનેત્તોરિવ નન્દને વને.

૮૧૮. ‘‘તુવઞ્ચ ભન્તે અનુકમ્પકં વિદું, ઉપેચ્ચ વન્દિં કુસલઞ્ચ પુચ્છિસં;

તતો તે ઉચ્છુસ્સ અદાસિં ખણ્ડિકં, પસન્નચિત્તા અતુલાય પીતિયા’’તિ.

સેસં વુત્તસદિસમેવાતિ.

ઉચ્છુવિમાનવણ્ણના નિટ્ઠિતા.