૭. પેસવતીવિમાનવણ્ણના

ફલિકરજતહેમજાલછન્નન્તિ પેસવતીવિમાનં. તસ્સ કા ઉપ્પત્તિ? ભગવા સાવત્થિયં વિહરતિ જેતવને. તેન સમયેન મગધેસુ નાલકગામે એકસ્મિં ગહપતિમહાસારકુલે પેસવતી નામ કુલસુણ્હા અહોસિ. સા કિર કસ્સપસ્સ ભગવતો યોજનિકે કનકથૂપે કયિરમાને દારિકા હુત્વા માતરા સદ્ધિં ચેતિયટ્ઠાનં ગન્ત્વા માતરં પુચ્છિ ‘‘કિં ઇમે, અમ્મ, કરોન્તી’’તિ? ‘‘ચેતિયં કાતું સુવણ્ણિટ્ઠકા કરોન્તી’’તિ. તં સુત્વા દારિકા પસન્નમાનસા માતરં આહ – ‘‘અમ્મ, મમ ગીવાય ઇદં સોવણ્ણમયં ખુદ્દકપિળન્ધનં અત્થિ, ઇમાહં ચેતિયત્થાય દેમી’’તિ. માતા ‘‘સાધુ દેહી’’તિ વત્વા તં ગીવતો ઓમુઞ્ચિત્વા સુવણ્ણકારસ્સ હત્થે અદાસિ ‘‘ઇદં ઇમાય દારિકાય પરિચ્ચજિતં, ઇમમ્પિ પક્ખિપિત્વા ઇટ્ઠકં કરોહી’’તિ. સુવણ્ણકારો તથા અકાસિ. સા દારિકા અપરભાગે કાલં કત્વા તેનેવ પુઞ્ઞકમ્મેન દેવલોકે નિબ્બત્તિત્વા સુગતિયંયેવ અપરાપરં સંસરન્તી અમ્હાકં ભગવતો કાલે નાલકગામે નિબ્બત્તા અનુક્કમેન દ્વાદસવસ્સિકા જાતા.

સા એકદિવસં માતરા પેસિતં મૂલં ગહેત્વા તેલત્થાય અઞ્ઞતરં આપણં અગમાસિ. તસ્મિઞ્ચ આપણે અઞ્ઞતરો કુટુમ્બિયપુત્તો પિતરા નિદહિત્વા ઠપિતં બહું હિરઞ્ઞસુવણ્ણં મુત્તામણિરતનાનિ ચ ગહેતું ઉદ્ધરન્તો આપણિકો કમ્મબલેન કથલપાસાણસક્ખરરૂપેન ઉપટ્ઠહન્તાનિ દિસ્વા તતો એકદેસં ‘‘પુઞ્ઞવન્તાનં વસેન હિરઞ્ઞસુવણ્ણાદિ ભવિસ્સતી’’તિ વીમંસિતું રાસિં કત્વા ઠપેસિ. અથ નં સા દારિકા દિસ્વા ‘‘કસ્મા આપણે રતનાનિ એવં ઠપિતાનિ, નનુ નામ સમ્મદેવ પટિસામેતબ્બાની’’તિ આહ. આપણિકો તં સુત્વા ‘‘મહાપુઞ્ઞા અયં દારિકા, ઇમિસ્સા વસેન સબ્બમિદં હિરઞ્ઞાદિ એવ હુત્વા અમ્હાકં વિનિયોગં ગમિસ્સતિ, સઙ્ગણ્હિસ્સામિ ન’’ન્તિ ચિન્તેત્વા તસ્સા માતુ સન્તિકં ગન્ત્વા ‘‘ઇમં દારિકં મય્હં પુત્તસ્સત્થાય દેહી’’તિ વારેત્વા બહુધનં દત્વા આવાહવિવાહં કત્વા તં અત્તનો ગેહં આનેસિ. અથસ્સા સીલાચારં ઞત્વા ભણ્ડાગારં વિવરિત્વા ‘‘કિં એત્થ પસ્સસી’’તિ વત્વા તાય ‘‘હિરઞ્ઞસુવણ્ણમણિમેવ રાસિકતં પસ્સામી’’તિ વુત્તે ‘‘એતાનિ અમ્હાકં કમ્મબલેન અન્તરધાયન્તાનિ તવ પુઞ્ઞવિસેસેન પુન વિસેસાનિ જાતાનિ, તસ્મા ઇતો પટ્ઠાય ઇમસ્મિં ગેહે સબ્બં ત્વંયેવ વિચારેહિ, તયા દિન્નમેવ મયં પરિભુઞ્જિસ્સામા’’તિ વત્વા તતો પભુતિ તં ‘‘પેસવતી’’તિ વોહરિંસુ.

તેન ચ સમયેન આયસ્મા ધમ્મસેનાપતિ અત્તનો આયુસઙ્ખારાનં પરિક્ખીણભાવં ઞત્વા ‘‘મય્હં માતુયા રૂપસારિબ્રાહ્મણિયા પોસાવનિકમૂલં દત્વા પરિનિબ્બાયિસ્સામી’’તિ ચિન્તેત્વા ભગવન્તં ઉપસઙ્કમિત્વા પરિનિબ્બાનં અનુજાનાપેત્વા સત્થુ આણાય મહન્તં પાટિહારિયં દસ્સેત્વા અનેકેહિ થુતિસહસ્સેહિ ભગવન્તં થોમેત્વા યાવ દસ્સનવિસયાતિક્કમા અભિમુખોવ અપક્કમિત્વા પુન વન્દિત્વા ભિક્ખુસઙ્ઘપરિવુતો વિહારા નિક્ખમ્મ ભિક્ખુસઙ્ઘસ્સ ઓવાદં દત્વા આયસ્મન્તં આનન્દં સમસ્સાસેત્વા ચતસ્સોપિ પરિસા નિવત્તેત્વા અનુક્કમેન નાલકગામં પત્વા માતરં સોતાપત્તિફલે પતિટ્ઠાપેત્વા પચ્ચૂસસમયે જાતોવરકે પરિનિબ્બાયિ. પરિનિબ્બુતસ્સ ચસ્સ સરીરસક્કારકરણવસેન દેવા ચેવ મનુસ્સા ચ સત્તાહં વીતિનામેસું, અગરુચન્દનાદીહિ હત્થસતુબ્બેધં ચિતકમકંસુ.

પેસવતીપિ થેરસ્સ પરિનિબ્બાનં સુત્વા ‘‘ગન્તા પૂજેસ્સામી’’તિ સુવણ્ણપુપ્ફેહિ ગન્ધજાતેહિ ચ પૂરિતાનિ ચઙ્કોટકાનિ ગાહાપેત્વા ગન્તુકામા સસુરં આપુચ્છિત્વા તેન ‘‘ત્વં ગરુભારા, તત્થ ચ મહાજનસમ્મદ્દો, પુપ્ફગન્ધાનિ પેસેત્વા ઇધેવ હોહી’’તિ વુત્તાપિ સદ્ધાજાતા ‘‘યદિપિ મે તત્થ જીવિતન્તરાયો સિયા, ગન્તાવ પૂજાસક્કારં કરિસ્સામી’’તિ તં વચનં અગ્ગહેત્વા સપરિવારા તત્થ ગન્ત્વા ગન્ધપુપ્ફાદીહિ પૂજેત્વા કતઞ્જલી અટ્ઠાસિ. તસ્મિઞ્ચ સમયે થેરં પૂજેતું આગતાનં રાજપરિસાનં હત્થી મત્તો હુત્વા તં પદેસં ઉપગઞ્છિ. તં દિસ્વા મરણભયભીતેસુ મનુસ્સેસુ પલાયન્તેસુ જનસમ્મદ્દેન પતિતં પેસવતિં મહાજનો અક્કમિત્વા મારેસિ. સા પૂજાસક્કારં કત્વા થેરગતાય સદ્ધાય સમ્પન્નચિત્તા એવ કાલં કત્વા તાવતિંસભવને નિબ્બત્તિ, અચ્છરાસહસ્સઞ્ચસ્સા પરિવારો અહોસિ.

સા તાવદેવ અત્તનો દિબ્બસમ્પત્તિં ઓલોકેત્વા ‘‘કીદિસેન નુ ખો પુઞ્ઞેન મયા એસા લદ્ધા’’તિ, તસ્સા હેતું ઉપધારેન્તી થેરં ઉદ્દિસ્સ કતં પૂજાસક્કારં દિસ્વા, રતનત્તયે અભિપ્પસન્નમાનસા સત્થારં વન્દિતું અચ્છરાસહસ્સપરિવુતા સટ્ઠિસકટભારાલઙ્કારપટિમણ્ડિતત્તભાવા સુમહતિયા દેવિદ્ધિયા ચન્દો વિય ચ સૂરિયો વિય ચ દસ દિસા ઓભાસયમાના સહ વિમાનેન આગન્ત્વા વિમાનતો ઓરુય્હ ભગવન્તં વન્દિત્વા અઞ્જલિં પગ્ગય્હ અટ્ઠાસિ. તેન ચ સમયેન આયસ્મા વઙ્ગીસો ભગવતો સમીપે નિસિન્નો ભગવન્તં એવમાહ ‘‘પટિભાતિ મં ભગવા ઇમિસ્સા દેવતાય કતકમ્મં પુચ્છિતુ’’ન્તિ. ‘‘પટિભાતુ તં, વઙ્ગીસા’’તિ ભગવા અવોચ. અથ આયસ્મા વઙ્ગીસો તાય દેવતાય કતકમ્મં પુચ્છિતુકામો પઠમં તાવસ્સા વિમાનં સંવણ્ણેન્તો આહ –

૬૪૬. ‘‘ફલિકરજતહેમજાલછન્નં, વિવિધચિત્રતલમદ્દસં સુરમ્મં;

બ્યમ્હં સુનિમ્મિતં તોરણૂપપન્નં, રુચકુપકિણ્ણમિદં સુભં વિમાનં.

૬૪૭. ‘‘ભાતિ ચ દસ દિસા નભેવ સુરિયો, સરદે તમોનુદો સહસ્સરંસી;

તથા તપતિ મિદં તવ વિમાનં, જલમિવ ધૂમસિખો નિસે નભગ્ગે.

૬૪૮. ‘‘મુસતીવ નયનં સતેરતાવ, આકાસે ઠપિતમિદં મનુઞ્ઞં;

વીણામુરજસમ્મતાળઘુટ્ઠં, ઇદ્ધં ઇન્દપુરં યથા તવેદં.

૬૪૯. ‘‘પદુમકુમુદુપ્પલકુવલયં, યોધિકબન્ધુકનોજકા ચ સન્તિ;

સાલકુસુમિતપુપ્ફિતા અસોકા, વિવિધદુમગ્ગસુગન્ધસેવિતમિદં.

૬૫૦. ‘‘સળલલબુજભુજકસંયુત્તા, કુસકસુફુલ્લિતલતાવલમ્બિનીહિ;

મણિજાલસદિસા યસસ્સિની, રમ્મા પોક્ખરણી ઉપટ્ઠિતા તે.

૬૫૧. ‘‘ઉદકરુહા ચ યેત્થિ પુપ્ફજાતા, થલજા યે ચ સન્તિ રુક્ખજાતા;

માનુસકામાનુસ્સકા ચ દિબ્બા, સબ્બે તુય્હં નિવેસનમ્હિ જાતા.

૬૫૨. ‘‘કિસ્સ સંયમદમસ્સયં વિપાકો, કેનાસિ કમ્મફલેનિધૂપપન્ના;

યથા ચ તે અધિગતમિદં વિમાનં, તદનુપદં અવચાસિળારપમ્હે’’તિ.

૬૪૬. તત્થ ફલિકરજતહેમજાલછન્નન્તિ ફલિકમણીહિ રજતહેમજાલેહિ ચ છાદિતં, ફલિકમણિમયાહિ ભિત્તીહિ રજતહેમમયેહિ જાલેહિ ચ સમન્તતો હેટ્ઠા ચ ઉપરિ ચ છાદિતં, વિવિધવણ્ણાનં વિચિત્તસન્નિવેસાનઞ્ચ તલાનં ભૂમીનં વસેન વિવિધચિત્રતલં અદ્દસં પસ્સિં. સુરમ્મન્તિ સુટ્ઠુ રમણીયં. વિહરિતુકામા વસન્તિ એત્થાતિ બ્યમ્હં, ભવનં. તોરણૂપપન્નન્તિ વિવિધમાલાકમ્માદિવિચિત્તેન સત્તરતનમયેન તોરણેન ઉપેતં. તોરણન્તિ વા દ્વારકોટ્ઠકપાસાદસ્સ નામં, તેન ચ અનેકભૂમકેન વિચિત્તાકારેન તં વિમાનં ઉપેતં. રુચકુપતિણ્ણન્તિ સુવણ્ણવાલિકાહિ ઓકિણ્ણઙ્ગણં. વાલિકસદિસા હિ સુવણ્ણખણ્ડા રુચા નામ, રુચમેવ રુચકન્તિ વુત્તં. સુભન્તિ સોભતિ, સુટ્ઠુ ભાતીતિ વા સુભં. વિમાનન્તિ વિસિટ્ઠમાનં, પમાણતો મહન્તન્તિ અત્થો.

૬૪૭. ભાતીતિ જોતતિ ઉજ્જલતિ. નભેવ સુરિયોતિ આકાસે આદિચ્ચો વિય. સરદેતિ સરદસમયે. તમોનુદોતિ અન્ધકારવિદ્ધંસનો. તથા તપતિ મિદન્તિ યથા સરદકાલે સહસ્સરંસી સૂરિયો, તથા તપતિ દિબ્બતિ ઇદં તવ વિમાનં, મ-કારો પદસન્ધિકરો. જલમિવ ધૂમસિખોતિ જલન્તો અગ્ગિ વિય. અગ્ગિ હિ તસ્સ અગ્ગતો ધૂમો પઞ્ઞાયતીતિ ‘‘ધૂમસિખો ધૂમકેતૂ’’તિ ચ વુચ્ચતિ. નિસેતિ નિસતિ, રત્તિયન્તિ અત્થો. નભગ્ગેતિ નભકોટ્ઠાસે, આકાસપદેસેતિ વુત્તં હોતિ. ‘‘નગગ્ગે’’તિ વા પાઠો, પબ્બતસિખરેતિ અત્થો. ઇદં તવ વિમાનન્તિ યોજના.

૬૪૮. મુસતીવ નયનન્તિ અતિવિય અત્તનો પભસ્સરતાય પટિહનન્તં દસ્સનકિચ્ચં કાતું અદેન્તં ઓલોકેન્તાનં ચક્ખું મુસતિ વિય. તેનાહ ‘‘સતેરતાવા’’તિ, વિજ્જુલતા વિયાતિ અત્થો. વીણામુરજસમ્મતાળઘુટ્ઠન્તિ મહતીઆદિવીણાનં ભેરિઆદિપટહાનં હત્થતાળકંસતાળાનઞ્ચ સદ્દેહિ ઘોસિતં એકનિન્નાદં. ઇદ્ધન્તિ દેવપુત્તેહિ દેવધીતાહિ દિબ્બસમ્પત્તિયા ચ સમિદ્ધં. ઇન્દપુરં યથાતિ સુદસ્સનનગરં વિય.

૬૪૯. પદુમાનિ ચ કુમુદાનિ ચ ઉપ્પલાનિ ચ કુવલયાનિ ચ પદુમકુમુદુપ્પલકુવલયન્તિ એકત્તવસેન વુત્તં. અત્થીતિ વચનં પરિણામેત્વા યોજેતબ્બં. તત્થ પદુમગ્ગહણેન પુણ્ડરીકમ્પિ ગહિતં, કુમુદગ્ગહણેન સેતરત્તભેદાનિ સબ્બાનિ કુમુદાનિ, ઉપ્પલગ્ગહણેન રત્તઉપ્પલં સબ્બા વા ઉપ્પલજાતિ, કુવલયગ્ગહણેન નીલુપ્પલમેવ ગહિતન્તિ વેદિતબ્બં. યોધિકબન્ધુકનોજકા ચ સન્તીતિ ચ-કારો નિપાતમત્તં, યોધિકબન્ધુજીવકઅનોજકરુક્ખા ચ સન્તીતિ અત્થો. કેચિ ‘‘અનોજકાપિ સન્તી’’તિ પાઠં વત્વા ‘‘અનોજકાપીતિ વુત્તં હોતી’’તિ અત્થં વદન્તિ. સાલકુસુમિતપુપ્ફિતા અસોકાતિ સાલા કુસુમિતા પુપ્ફિતા અસોકાતિ યોજેતબ્બં. વિવિધદુમગ્ગસુગન્ધસેવિતમિદન્તિ નાનાવિધાનં ઉત્તમરુક્ખાનં સોભનેહિ ગન્ધેહિ સેવિતં પરિભાવિતં ઇદં તે વિમાનન્તિ અત્થો.

૬૫૦. સળલલબુજભુજકસંયુત્તાતિ તીરે ઠિતેહિ સળલેહિ લબુજેહિ ભુજકરુક્ખેહિ ચ સહિતા. ભુજકો નામ એકો સુગન્ધરુક્ખો દેવલોકે ચ ગન્ધમાદને ચ અત્થિ, અઞ્ઞત્થ નત્થીતિ વદન્તિ. કુસકસુફુલ્લિતલતાવલમ્બિનીહીતિ કુસકેહિ તાલનાળિકેરાદીહિ તિણજાતીહિ ઓલમ્બમાનાહિ સન્તાનકવલ્લિઆદીહિ સુટ્ઠુ કુસુમિતલતાહિ ચ સંયુત્તાતિ યોજના. મણિજાલસદિસાતિ મણિજાલસદિસજલા. ‘‘મણિજલસદિસા’’તિપિ પાળિ, મણિસદિસજલાતિ અત્થો. યસસ્સિનીતિ દેવતાય આલપનં. ઉપટ્ઠિતા તેતિ યથાવુત્તગુણા રમણીયા પોક્ખરણી તવ વિમાનસમીપે ઠિતા.

૬૫૧. ઉદકરુહાતિ યથાવુત્તે પદુમાદિકે સન્ધાય વદતિ. યેત્થીતિ યે અત્થિ. થલજાતિ યોધિકાદિકા. યે ચ સન્તીતિ યે અઞ્ઞેપિ રુક્ખજાતા પુપ્ફૂપગા ચ ફલૂપગા ચ, તેપિ તવ વિમાનસમીપે સન્તિયેવ.

૬૫૨. કિસ્સ સંયમદમસ્સયં વિપાકોતિ કાયસંયમાદીસુ કીદિસસ્સ સંયમસ્સ, ઇન્દ્રિયદમનાદીસુ કીદિસસ્સ દમસ્સ અયં વિપાકો. કેનાસીતિ અઞ્ઞમેવ ઉપપત્તિનિબ્બત્તકં, અઞ્ઞં ઉપભોગસુખનિબ્બત્તકં હોતીતિ ‘‘કેનાસિ કમ્મફલેનિધૂપપન્ના’’તિ વત્વા પુન ‘‘યથા ચ તે અધિગતમિદં વિમાન’’ન્તિ આહ. તત્થ કમ્મફલેનાતિ કમ્મફલેન વિપચ્ચિતું આરદ્ધેનાતિ વચનસેસો, ઇત્થમ્ભૂતલક્ખણે ચેતં કરણવચનં. તદનુપદં અવચાસીતિ તં કમ્મં મયા વુત્તપદસ્સ અનુપદં અનુરૂપપદં કત્વા કથેય્યાસિ. અળારપમ્હેતિ બહલસંહતપખુમે, ગોપખુમેતિ અધિપ્પાયો.

અથ દેવતા આહ –

૬૫૩. ‘‘યથા ચ મે અધિગતમિદં વિમાનં, કોઞ્ચમયૂરચકોર સઙ્ઘચરિતં;

દિબ્યપિલવહંસરાજચિણ્ણં, દિજકારણ્ડવકોકિલાભિનદિતં.

૬૫૪. ‘‘નાનાસન્તાનકપુપ્ફરુક્ખવિવિધા, પાટલિજમ્બુઅસોકરુક્ખવન્તં;

યથા ચ મે અધિગતમિદં વિમાનં, તં તે પવેદયામિ સુણોહિ ભન્તે.

૬૫૫. ‘‘મગધવરપુરત્થિમેન, નાલકગામો નામ અત્થિ ભન્તે;

તત્થ અહોસિં પુરે સુણિસા, પેસવતીતિ તત્થ જાનિંસુ મમં.

૬૫૬. ‘‘સાહમપચિતત્થધમ્મકુસલં, દેવમનુસ્સપૂજિતં મહન્તં;

ઉપતિસ્સં નિબ્બુતમપ્પમેય્યં, મુદિતમના કુસુમેહિ અબ્ભુકિરિં.

૬૫૭. ‘‘પરમગતિગતઞ્ચ પૂજયિત્વા, અન્તિમદેહધરં ઇસિં ઉળારં;

પહાય માનુસકં સમુસ્સયં, તિદસગતા ઇધ માવસામિ ઠાન’’ન્તિ.

૬૫૩. તત્થ કોઞ્ચમયૂરચકોરસઙ્ઘચરિતન્તિ સારસસિખણ્ડિકુમ્ભકારકુક્કુટગણેહિ તત્થ તત્થ વિચરિતં. દિબ્યપિલવહંસરાજચિણ્ણન્તિ ઉદકે પિલવિત્વા વિચરણતો ‘‘પિલવા’’તિ લદ્ધનામેહિ ઉદકસકુણેહિ હંસરાજેહિ ચ તહિં તહિં વિચરિતં. દિજકારણ્ડવકોકિલાભિનદિતન્તિ કારણ્ડવેહિ કાદમ્બેહિ કોકિલેહિ અઞ્ઞેહિ ચ દિજેહિ અભિનાદિતં.

૬૫૪. નાનાસન્તાનકપુપ્ફરુક્ખવિવિધાતિ નાનાવિધસાખાપસાખવન્તા નાનાપુપ્ફરુક્ખા નાનાસન્તાનકપુપ્ફરુક્ખા, તેહિ વિવિધં ચિત્તાકારં વિચિત્તસન્નિવેસં નાનાસન્તાનકપુપ્ફરુક્ખવિવિધા. ‘‘વિવિધ’’ન્તિ હિ વત્તબ્બે ‘‘વિવિધા’’તિ વુત્તં. સન્તાનકાતિ હિ કામવલ્લિયો, નાનાવિધપુપ્ફરુક્ખા ચ વિવિધા એત્થ સન્તિ, તેહિ વા વિવિધન્તિ નાનાસન્તાનકપુપ્ફરુક્ખવિવિધા. ‘‘નાનાસન્તાનકપુપ્ફરુક્ખવિવિધં, પાટલિજમ્બુઅસોકરુક્ખવન્ત’’ન્તિ ચ કેચિ પઠન્તિ. તેહિ ‘‘પુપ્ફરુક્ખા સન્તી’’તિ પદં આનેત્વા સમ્બન્ધિતબ્બં. ‘‘પુપ્ફરુક્ખા’’તિ વા અવિભત્તિકનિદ્દેસો, પુપ્ફરક્ખન્તિ વુત્તં હોતિ.

૬૫૫. મગધવરપુરત્થિમેનાતિ મગધવરે પુરત્થિમેન, અભિસમ્બોધિટ્ઠાનતાય ઉત્તમે મગધરટ્ઠે પુરત્થિમદિસાય. તત્થ અહોસિં પુરે સુણિસાતિ પુબ્બે અહં તસ્મિં નાલકગામે એકસ્મિં ગહપતિકુલે સુણિસા સુણ્હા અહોસિં.

૬૫૬. સાતિ સયં. અત્થે ચ ધમ્મે ચ કુસલોતિ અત્થધમ્મકુસલો, ભગવા. અપચિતો અત્થધમ્મકુસલો એતેનાતિ અપચિતત્થધમ્મકુસલો, ધમ્મસેનાપતિ, તં. અપચિતં વા અપચયો, નિબ્બાનં, તસ્મિં અવસિટ્ઠઅત્થધમ્મે ચ કુસલં, અપચિતે વા પૂજનીયે અત્થે ધમ્મે નિરોધે મગ્ગે ચ કુસલં. મહન્તેહિ ઉળારેહિ સીલક્ખન્ધાદીહિ સમન્નાગતત્તા મહન્તં. કુસુમેહીતિ રતનમયેહિ ઇતરેહિ ચ કુસુમેહિ.

૬૫૭. પરમગતિગતન્તિ અનુપાદિસેસનિબ્બાનં પત્તં. સમુસ્સયન્તિ સરીરં. તિદસગતાતિ તિદસભવનં ગતા, તાવતિંસં દેવનિકાયં ઉપપન્ના. ઇધાતિ ઇમસ્મિં દેવલોકે. આવસામિ ઠાનન્તિ ઇમં વિમાનં અધિવસામિ. સેસં વુત્તનયમેવ.

એવં આયસ્મતા વઙ્ગીસેન દેવતાય ચ કથિતકથામગ્ગં અટ્ઠુપ્પત્તિં કત્વા ભગવા સમ્પત્તપરિસાય વિત્થારેન ધમ્મં દેસેસિ. સા દેસના મહાજનસ્સ સાત્થિકા અહોસીતિ.

પેસવતીવિમાનવણ્ણના નિટ્ઠિતા.