૧૨. ચન્દાથેરીગાથાવણ્ણના

દુગ્ગતાહં પુરે આસિન્તિઆદિકા ચન્દાય થેરિયા ગાથા. અયમ્પિ પુરિમબુદ્ધેસુ કતાધિકારા તત્થ તત્થ ભવે વિવટ્ટૂપનિસ્સયં કુસલં ઉપચિનન્તી અનુક્કમેન સમ્ભતવિમોક્ખસમ્ભારા પરિપક્કઞાણા ઇમસ્મિં બુદ્ધુપ્પાદે અઞ્ઞતરસ્મિં બ્રાહ્મણગામે અપઞ્ઞાતસ્સ બ્રાહ્મણસ્સ ગેહે પટિસન્ધિં ગણ્હિ. તસ્સા નિબ્બત્તિતો પટ્ઠાયં તં કુલં ભોગેહિ પરિક્ખયં ગતં. સા અનુક્કમેન વિઞ્ઞુતં પત્વા દુક્ખેન જીવતિ. અથ તસ્મિં ગેહે અહિવાતરોગો ઉપ્પજ્જિ. તેનસ્સા સબ્બેપિ ઞાતકા મરણબ્યસનં પાપુણિંસુ. સા ઞાતિક્ખયે જાતે અઞ્ઞત્થ જીવિતું અસક્કોન્તી કપાલહત્થા કુલે કુલે વિચરિત્વા લદ્ધલદ્ધેન ભિક્ખાહારેન યાપેન્તી એકદિવસં પટાચારાય થેરિયા ભત્તવિસ્સગ્ગટ્ઠાનં અગમાસિ. ભિક્ખુનિયો તં દુક્ખિતં ખુદ્દાભિભૂતં દિસ્વાન સઞ્જાતકારુઞ્ઞા પિયસમુદાચારેન સઙ્ગહેત્વા તત્થ વિજ્જમાનેન ઉપચારમનોહરેન આહારેન સન્તપ્પેસું. સા તાસં આચારસીલે પસીદિત્વા થેરિયા સન્તિકં ઉપસઙ્કમિત્વા વન્દિત્વા એકમન્તં નિસીદિ. તસ્સા થેરી ધમ્મં કથેસિ. સા તં ધમ્મં સુત્વા સાસને અભિપ્પસન્ના સંસારે ચ સઞ્જાતસંવેગા પબ્બજિ. પબ્બજિત્વા ચ થેરિયા ઓવાદે ઠત્વા વિપસ્સનં પટ્ઠપેત્વા ભાવનં અનુયુઞ્જન્તી કતાધિકારતાય ઞાણસ્સ ચ પરિપાકં ગતત્તા ન ચિરસ્સેવ સહ પટિસમ્ભિદાહિ અરહત્તં પત્વા અત્તનો પટિપત્તિં પચ્ચવેક્ખિત્વા –

૧૨૨. ‘‘દુગ્ગતાહં પુરે આસિં, વિધવા ચ અપુત્તિકા;

વિના મિત્તેહિ ઞાતીહિ, ભત્તચોળસ્સ નાધિગં.

૧૨૩. ‘‘પત્તં દણ્ડઞ્ચ ગણ્હિત્વા, ભિક્ખમાના કુલા કુલં;

સીતુણ્હેન ચ ડય્હન્તી, સત્ત વસ્સાનિ ચારિહં.

૧૨૪. ‘‘ભિક્ખુનિં પુન દિસ્વાન, અન્નપાનસ્સ લાભિનિં;

ઉપસઙ્કમ્મં અવોચં, પબ્બજ્જં અનગારિયં.

૧૨૫. ‘‘સા ચ મં અનુકમ્પાય, પબ્બાજેસિ પટાચારા;

તતો મં ઓવદિત્વાન, પરમત્થે નિયોજયિ.

૧૨૬. ‘‘તસ્સાહં વચનં સુત્વા, અકાસિં અનુસાસનિં;

અમોઘો અય્યાયોવાદો, તેવિજ્જામ્હિ અનાસવા’’તિ. –

ઉદાનવસેન ઇમા ગાથા અભાસિ.

તત્થ દુગ્ગતાતિ દલિદ્દા. પુરેતિ પબ્બજિતતો પુબ્બે. પબ્બજિતકાલતો પટ્ઠાય હિ ઇધ પુગ્ગલો ભોગેહિ અડ્ઢો વા દલિદ્દો વાતિ ન વત્તબ્બો. ગુણેહિ પન અયં થેરી અડ્ઢાયેવ. તેનાહ ‘‘દુગ્ગતાહં પુરે આસિ’’ન્તિ. વિધવાતિ ધવો વુચ્ચતિ સામિકો, તદભાવા વિધવા, મતપતિકાતિ અત્થો. અપુત્તિકાતિ પુત્તરહિતા. વિના મિત્તેહીતિ મિત્તેહિ બન્ધવેહિ ચ પરિહીના રહિતા. ભત્તચોળસ્સ નાધિગન્તિ ભત્તસ્સ ચોળસ્સ ચ પારિપૂરિં નાધિગચ્છિં, કેવલં પન ભિક્ખાપિણ્ડસ્સ પિલોતિકાખણ્ડસ્સ ચ વસેન ઘાસચ્છાદનમત્તમેવ અલત્થન્તિ અધિપ્પાયો. તેનાહ ‘‘પત્તં દણ્ડઞ્ચ ગણ્હિત્વા’’તિઆદિ.

તત્થ પત્તન્તિ મત્તિકાભાજનં. દણ્ડન્તિ ગોણસુનખાદિપરિહરણદણ્ડકં. કુલા કુલન્તિ કુલતો કુલં. સીતુણ્હેન ચ ડય્હન્તીતિ વસનગેહાભાવતો સીતેન ચ ઉણ્હેન ચ પીળિયમાના.

ભિક્ખુનિન્તિ પટાચારાથેરિં સન્ધાય વદતિ. પુનાતિ પચ્છા, સત્તસંવચ્છરતો અપરભાગે.

પરમત્થેતિ પરમે ઉત્તમે અત્થે, નિબ્બાનગામિનિયા પટિપદાય નિબ્બાને ચ. નિયોજયીતિ કમ્મટ્ઠાનં આચિક્ખન્તી નિયોજેસિ. સેસં વુત્તનયમેવ.

ચન્દાથેરીગાથાવણ્ણના નિટ્ઠિતા.

પઞ્ચકનિપાતવણ્ણના નિટ્ઠિતા.