૧. અપરાસામાથેરીગાથાવણ્ણના

તિકનિપાતે પણ્ણવીસતિવસ્સાનીતિઆદિકા અપરાય સામાય થેરિયા ગાથા. અયમ્પિ પુરિમબુદ્ધેસુ કતાધિકારા તત્થ તત્થ ભવે વિવટ્ટૂપનિસ્સયં કુસલં ઉપચિનન્તી વિપસ્સિસ્સ ભગવતો કાલે ચન્દભાગાય નદિયા તીરે કિન્નરયોનિયં નિબ્બત્તિ. સા તત્થ કિન્નરેહિ સદ્ધિં કીળાપસુતા વિચરતિ. અથેકદિવસં સત્થા તસ્સા કુસલબીજરોપનત્થં તત્થ ગન્ત્વા નદીતીરે ચઙ્કમિ. સા ભગવન્તં દિસ્વા હટ્ઠતુટ્ઠા સળલપુપ્ફાનિ આદાય સત્થુ સન્તિકં ગન્ત્વા વન્દિત્વા તેહિ પુપ્ફેહિ ભગવન્તં પૂજેસિ. સા તેન પુઞ્ઞકમ્મેન દેવમનુસ્સેસુ સંસરન્તી ઇમસ્મિં બુદ્ધુપ્પાદે કોસમ્બિયં કુલઘરે નિબ્બત્તિત્વા વયપ્પત્તા સામાવતિયા સહાયિકા હુત્વા તસ્સા મતકાલે સંવેગજાતા પબ્બજિત્વા પઞ્ચવીસતિ વસ્સાનિ ચિત્તસમાધાનં અલભિત્વા મહલ્લિકાકાલે સુગતોવાદં લભિત્વા વિપસ્સનં વડ્ઢેત્વા સહ પટિસમ્ભિદાહિ અરહત્તં પાપુણિ. તેન વુત્તં અપદાને (અપ. થેરી ૨.૨.૨૨-૨૯) –

‘‘ચન્દભાગાનદીતીરે, અહોસિં કિન્નરી તદા;

અદ્દસાહં દેવદેવં, ચઙ્કમન્તં નરાસભં.

‘‘ઓચિનિત્વાન સળલં, બુદ્ધસેટ્ઠસ્સદાસહં;

ઉપસિઙ્ઘિ મહાવીરો, સળલં દેવગન્ધિકં.

‘‘પટિગ્ગહેત્વા સમ્બુદ્ધો, વિપસ્સી લોકનાયકો;

ઉપસિઙ્ઘિ મહાવીરો, પેક્ખમાનાય મે તદા.

‘‘અઞ્જલિં પગ્ગહેત્વાન, વન્દિત્વા દ્વિપદુત્તમં;

સકં ચિત્તં પસાદેત્વા, તતો પબ્બતમારુહિં.

‘‘એકનવુતિતો કપ્પે, યં પુપ્ફમદદિં તદા;

દુગ્ગતિં નાભિજાનામિ, બુદ્ધપૂજાયિદં ફલં.

‘‘કિલેસા ઝાપિતા મય્હં…પે… કતં બુદ્ધસ્સ સાસન’’ન્તિ.

અરહત્તં પન પત્વા અત્તનો પટિપત્તિં પચ્ચવેક્ખિત્વા ઉદાનવસેન –

૩૯. ‘‘પણ્ણવીસતિ વસ્સાનિ, યતો પબ્બજિતાય મે;

નાભિજાનામિ ચિત્તસ્સ, સમં લદ્ધં કુદાચનં.

૪૦. ‘‘અલદ્ધા ચેતસો સન્તિં, ચિત્તે અવસવત્તિની;

તતો સંવેગમાપાદિં, સરિત્વા જિનસાસનં.

૪૧. ‘‘બહૂહિ દુક્ખધમ્મેહિ, અપ્પમાદરતાય મે;

તણ્હક્ખયો અનુપ્પત્તો, કતં બુદ્ધસ્સ સાસનં;

અજ્જ મે સત્તમી રત્તિ, યતો તણ્હા વિસોસિતા’’તિ. –

ઇમા ગાથા અભાસિ.

તત્થ ચિત્તસ્સ સમન્તિ ચિત્તસ્સ વૂપસમં, ચેતોસમથમગ્ગફલસમાધીતિ અત્થો.

તતોતિ તસ્મા ચિત્તવસં વત્તેતું અસમત્થભાવતો. સંવેગમાપાદિન્તિ સત્થરિ ધરન્તેપિ પબ્બજિતકિચ્ચં મત્થકં પાપેતું અસક્કોન્તી પચ્છા કથં પાપયિસ્સામીતિ સંવેગં ઞાણુત્રાસં આપજ્જિં. સરિત્વા જિનસાસનન્તિ કાણકચ્છપોપમાદિસત્થુઓવાદં (સં. નિ. ૫.૧૧૧૭; મ. નિ. ૩.૨૫૨) અનુસ્સરિત્વા. સેસં વુત્તનયમેવ.

અપરાસામાથેરીગાથાવણ્ણના નિટ્ઠિતા.