૧૦. સામાથેરીગાથાવણ્ણના

ચતુક્ખત્તું પઞ્ચક્ખત્તુન્તિઆદિકા સામાય થેરિયા ગાથા. અયમ્પિ પુરિમબુદ્ધેસુ કતાધિકારા તત્થ તત્થ ભવે વિવટ્ટૂપનિસ્સયં કુસલં ઉપચિનિત્વા સુગતીસુયેવ સંસરન્તી ઇમસ્મિં બુદ્ધુપ્પાદે કોસમ્બિયં ગહપતિમહાસાલકુલે નિબ્બત્તિત્વા સામાતિસ્સા નામં અહોસિ. સા વિઞ્ઞુતં પત્તા સામાવતિયા ઉપાસિકાય પિયસહાયિકા હુત્વા તાય કાલઙ્કતાય સઞ્જાતસંવેગા પબ્બજિ. પબ્બજિત્વા ચ સામાવતિકં આરબ્ભ ઉપ્પન્નસોકં વિનોદેતું અસક્કોન્તી અરિયમગ્ગં ગણ્હિતું નાસક્ખિ. અપરભાગે આસનસાલાય નિસિન્નસ્સ આનન્દત્થેરસ્સ ઓવાદં સુત્વા વિપસ્સનં પટ્ઠપેત્વા તતો સત્તમે દિવસે સહ પટિસમ્ભિદાહિ અરહત્તં પાપુણિ.

અરહત્તં પન પત્વા અત્તનો પટિપત્તિં પચ્ચવેક્ખિત્વા તં પકાસેન્તી –

૩૭. ‘‘ચતુક્ખત્તું પઞ્ચક્ખત્તું, વિહારા ઉપનિક્ખમિં;

અલદ્ધા ચેતસો સન્તિં, ચિત્તે અવસવત્તિની;

તસ્સા મે અટ્ઠમી રત્તિ, યતો તણ્હા સમૂહતા.

૩૮. ‘‘બહૂહિ દુક્ખધમ્મેહિ, અપ્પમાદરતાય મે;

તણ્હક્ખયો અનુપ્પત્તો, કતં બુદ્ધસ્સ સાસન’’ન્તિ. –

ઉદાનવસેન ઇમા દ્વે ગાથા અભાસિ.

તત્થ ચતુક્ખત્તું પઞ્ચક્ખત્તું, વિહારા ઉપનિક્ખમિન્તિ ‘‘મમ વસનકવિહારે વિપસ્સનામનસિકારેન નિસિન્ના સમણકિચ્ચં મત્થકં પાપેતું અસક્કોન્તી ઉતુસપ્પાયાભાવેન નનુ ખો મય્હં વિપસ્સના મગ્ગેન ઘટ્ટેતી’’તિ ચિન્તેત્વા ચત્તારો પઞ્ચ ચાતિ નવ વારે વિહારા ઉપસ્સયતો બહિ નિક્ખમિં. તેનાહ ‘‘અલદ્ધા ચેતસો સન્તિં, ચિત્તે અવસવત્તિની’’તિ. તત્થ ચેતસો સન્તિન્તિ અરિયમગ્ગસમાધિં સન્ધાયાહ. ચિત્તે અવસવત્તિનીતિ વીરિયસમતાય અભાવેન મમ ભાવનાચિત્તે ન વસવત્તિની. સા કિર અતિવિય પગ્ગહિતવીરિયા અહોસિ. તસ્સા મે અટ્ઠમી રત્તીતિ યતો પટ્ઠાય આનન્દત્થેરસ્સ સન્તિકે ઓવાદં પટિલભિં, તતો પટ્ઠાય રત્તિન્દિવમતન્દિતા વિપસ્સનાય કમ્મં કરોન્તી રત્તિયં ચતુક્ખત્તું પઞ્ચક્ખત્તું વિહારતો નિક્ખમિત્વા મનસિકારં પવત્તેન્તી વિસેસં અનધિગન્ત્વા અટ્ઠમિયં રત્તિયં વીરિયસમતં લભિત્વા મગ્ગપટિપાટિયા કિલેસે ખેપેસિન્તિ અત્થો. તેન વુત્તં – ‘‘તસ્સા મે અટ્ઠમી રત્તિ, યતો તણ્હા સમૂહતા’’તિ. સેસં વુત્તનયમેવ.

સામાથેરીગાથાવણ્ણના નિટ્ઠિતા.

દુકનિપાતવણ્ણના નિટ્ઠિતા.