૧૬. વિમલત્થેરગાથાવણ્ણના

પાપમિત્તેતિ આયસ્મતો વિમલત્થેરસ્સ ગાથા. કા ઉપ્પત્તિ? અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયં પુઞ્ઞં ઉપચિનન્તો પદુમુત્તરસ્સ ભગવતો કાલે કુલગેહે નિબ્બત્તિત્વા વિઞ્ઞુતં પત્તો સત્થરિ પરિનિબ્બુતે સાધુકીળનદિવસેસુ વીતિવત્તેસુ સત્થુ સરીરં ગહેત્વા ઉપાસકેસુ ઝાપનટ્ઠાનં ગચ્છન્તેસુ સત્થુ ગુણે આવજ્જિત્વા પસન્નમાનસો સુમનપુપ્ફેહિ પૂજમકાસિ. સો તેન પુઞ્ઞકમ્મેન દેવમનુસ્સેસુ સંસરન્તો ઇમસ્મિં બુદ્ધુપ્પાદે બારાણસિયં બ્રાહ્મણકુલે નિબ્બત્તિત્વા વિમલોતિ લદ્ધનામો વયપ્પત્તો સોમમિત્તત્થેરં નિસ્સાય સાસને પબ્બજિત્વા તેનેવ ઉસ્સાહિતો વિપસ્સનં પટ્ઠપેત્વા નચિરસ્સેવ અરહત્તં પાપુણિ. તેન વુત્તં અપદાને (અપ. થેર ૨.૪૬.૫૮-૬૨) –

‘‘નીહરન્તે સરીરમ્હિ, વજ્જમાનાસુ ભેરિસુ;

પસન્નચિત્તો સુમનો, પટ્ટિપુપ્ફમપૂજયિં.

‘‘સતસહસ્સિતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, દેહપૂજાયિદં ફલં.

‘‘કિલેસા ઝાપિતા મય્હં…પે… કતં બુદ્ધસ્સ સાસન’’ન્તિ.

અરહત્તં પન પત્વા અત્તનો સહાયસ્સ ભિક્ખુસ્સ ઓવાદં દેન્તો –

૨૬૪. ‘‘પાપમિત્તે વિવજ્જેત્વા, ભજેય્યુત્તમપુગ્ગલં;

ઓવાદે ચસ્સ તિટ્ઠેય્ય, પત્થેન્તો અચલં સુખં.

૨૬૫. ‘‘પરિત્તં દારુમારુય્હ, યથા સીદે મહણ્ણવે;

એવં કુસીતમાગમ્મ, સાધુજીવીપિ સીદતિ;

તસ્મા તં પરિવજ્જેય્ય, કુસીતં હીનવીરિયં.

૨૬૬. ‘‘પવિવિત્તેહિ અરિયેહિ, પહિતત્તેહિ ઝાયિભિ;

નિચ્ચં આરદ્ધવીરિયેહિ, પણ્ડિતેહિ સહાવસે’’તિ. –

તિસ્સો ગાથા અભાસિ.

તત્થ પાપમિત્તેતિ અકલ્યાણમિત્તે અસપ્પુરિસે હીનવીરિયે. વિવજ્જેત્વાતિ તં અભજનવસેન દૂરતો વજ્જેત્વા. ભજેય્યુત્તમપુગ્ગલન્તિ સપ્પુરિસં પણ્ડિતં કલ્યાણમિત્તં ઓવાદાનુસાસનીગહણવસેન સેવેય્ય. ઓવાદે ચસ્સ તિટ્ઠેય્યાતિ અસ્સ કલ્યાણમિત્તસ્સ ઓવાદે અનુસિટ્ઠિયં યથાનુસિટ્ઠં પટિપજ્જનવસેન તિટ્ઠેય્ય. પત્થેન્તોતિ આકઙ્ખન્તો. અચલં સુખન્તિ નિબ્બાનસુખં ફલસુખઞ્ચ. તમ્પિ હિ અકુપ્પભાવતો ‘‘અચલ’’ન્તિ વુચ્ચતિ. સેસં વુત્તત્થમેવ.

વિમલત્થેરગાથાવણ્ણના નિટ્ઠિતા.

તિકનિપાતવણ્ણના નિટ્ઠિતા.

પઠમો ભાગો નિટ્ઠિતો.