૮. દુતિયમિગલુદ્દકપેતવત્થુવણ્ણના

કૂટાગારે ચ પાસાદેતિ ઇદં ભગવતિ વેળુવને વિહરન્તે અપરં મિગલુદ્દકપેતં આરબ્ભ વુત્તં. રાજગહે કિર અઞ્ઞતરો માગવિકો માણવો વિભવસમ્પન્નોપિ સમાનો ભોગસુખં પહાય રત્તિન્દિવં મિગે હનન્તો વિચરતિ. તસ્સ સહાયભૂતો એકો ઉપાસકો અનુદ્દયં પટિચ્ચ – ‘‘સાધુ, સમ્મ, પાણાતિપાતતો વિરમાહિ, મા તે અહોસિ દીઘરત્તં અહિતાય દુક્ખાયા’’તિ ઓવાદં અદાસિ. સો તં અનાદિયિ. અથ સો ઉપાસકો અઞ્ઞતરં અત્તનો મનોભાવનીયં ખીણાસવત્થેરં યાચિ – ‘‘સાધુ, ભન્તે, અસુકપુરિસસ્સ તથા ધમ્મં દેસેથ, યથા સો પાણાતિપાતતો વિરમેય્યા’’તિ.

અથેકદિવસં સો થેરો રાજગહે પિણ્ડાય ચરન્તો તસ્સ ગેહદ્વારે અટ્ઠાસિ. તં દિસ્વા સો માગવિકો સઞ્જાતબહુમાનો પચ્ચુગ્ગન્ત્વા ગેહં પવેસેત્વા આસનં પઞ્ઞાપેત્વા અદાસિ. નિસીદિ થેરો પઞ્ઞત્તે આસને, સોપિ થેરં ઉપસઙ્કમિત્વા નિસીદિ. તસ્સ થેરો પાણાતિપાતે આદીનવં, તતો વિરતિયા આનિસંસઞ્ચ પકાસેસિ. સો તં સુત્વાપિ તતો વિરમિતું ન ઇચ્છિ. અથ નં થેરો આહ – ‘‘સચે, ત્વં આવુસો, સબ્બેન સબ્બં વિરમિતું ન સક્કોસિ, રત્તિમ્પિ તાવ વિરમસ્સૂ’’તિ, સો ‘‘સાધુ, ભન્તે, વિરમામિ રત્તિ’’ન્તિ તતો વિરમિ. સેસં અનન્તરવત્થુસદિસં. ગાથાસુ પન –

૪૮૮. ‘‘કૂટાગારે ચ પાસાદે, પલ્લઙ્કે ગોનકત્થતે;

પઞ્ચઙ્ગિકેન તુરિયેન, રમસિ સુપ્પવાદિતે.

૪૮૯. ‘‘તતો રત્યા વિવસાને, સૂરિયુગ્ગમનં પતિ;

અપવિદ્ધો સુસાનસ્મિં, બહુદુક્ખં નિગચ્છસિ.

૪૯૦. ‘‘કિં નુ કાયેન વાચાય, મનસા દુક્કટં કતં;

કિસ્સકમ્મવિપાકેન, ઇદં દુક્ખં નિગચ્છસી’’તિ. –

તીહિ ગાથાહિ નારદત્થેરો નં પટિપુચ્છિ. અથસ્સ પેતો –

૪૯૧. ‘‘અહં રાજગહે રમ્મે, રમણીયે ગિરિબ્બજે;

મિગલુદ્દો પુરે આસિં, લુદ્દો ચાસિમસઞ્ઞતો.

૪૯૨. ‘‘તસ્સ મે સહાયો સુહદયો, સદ્ધો આસિ ઉપાસકો;

તસ્સ કુલૂપકો ભિક્ખુ, આસિ ગોતમસાવકો;

સોપિ મં અનુકમ્પન્તો, નિવારેસિ પુનપ્પુનં.

૪૯૩. ‘‘‘માકાસિ પાપકં કમ્મં, મા તાત દુગ્ગતિં અગા;

સચે ઇચ્છસિ પેચ્ચ સુખં, વિરમ પાણવધા અસંયમા’.

૪૯૪. ‘‘તસ્સાહં વચનં સુત્વા, સુખકામસ્સ હિતાનુકમ્પિનો;

નાકાસિં સકલાનુસાસનિં, ચિરપાપાભિરતો અબુદ્ધિમા.

૪૯૫. ‘‘સો મં પુન ભૂરિસુમેધસો, અનુકમ્પાય સંયમે નિવેસયિ;

‘સચે દિવા હનસિ પાણિનો, અથ તે રત્તિં ભવતુ સંયમો’.

૪૯૬. ‘‘સ્વાહં દિવા હનિત્વા પાણિનો, વિરતો રત્તિમહોસિ સઞ્ઞતો;

રત્તાહં પરિચારેમિ, દિવા ખજ્જામિ દુગ્ગતો.

૪૯૭. ‘‘તસ્સ કમ્મસ્સ કુસલસ્સ, અનુભોમિ રત્તિં અમાનુસિં;

દિવા પટિહતાવ કુક્કુરા, ઉપધાવન્તિ સમન્તા ખાદિતું.

૪૯૮. ‘‘યે ચ તે સતતાનુયોગિનો, ધુવં પયુત્તા સુગતસ્સ સાસને;

મઞ્ઞામિ તે અમતમેવ કેવલં, અધિગચ્છન્તિ પદં અસઙ્ખત’’ન્તિ. –

તમત્થં આચિક્ખિ. તાસં અત્થો હેટ્ઠા વુત્તનયોવ.

દુતિયમિગલુદ્દકપેતવત્થુવણ્ણના નિટ્ઠિતા.