૬૪-૬૭. સુદ્ધિકપટિસમ્ભિદાઞાણનિદ્દેસવણ્ણના
૧૧૦. સુદ્ધિકપટિસમ્ભિદાઞાણનિદ્દેસે ઇમેસં ઞાણાનં પભેદાભાવતોયેવ હેટ્ઠા વિય પભેદં અદસ્સેત્વાયેવ અત્થેસુ ઞાણં અત્થપટિસમ્ભિદાતિઆદિ વુત્તં. પઞ્ઞાપભેદાભાવેપિ અત્તના પટિવિદ્ધચતુસચ્ચધમ્મમત્તવસેન નાનત્તસબ્ભાવતો અત્થનાનત્તે પઞ્ઞા અત્થપટિસમ્ભિદે ઞાણન્તિઆદિ વુત્તં. તત્થ નાનત્તેતિ અત્થાદીનં અનેકભાવે. વવત્થાનેતિ અત્થાદીનં નિચ્છયને. સલ્લક્ખણેતિ અત્થાદીનં સમ્માદસ્સને. ઉપલક્ખણેતિ અત્થાદીનં ભુસંદસ્સને. પભેદેતિ અત્થાદીનં નાનાભેદે. પભાવનેતિ અત્થાદીનં પાકટીકરણેન ઉપ્પાદને. જોતનેતિ અત્થાદીનં દીપને. વિરોચનેતિ અત્થાદીનં વિવિધા દીપને. પકાસનેતિ અત્થાદીનં પભાસને. ‘‘નાનત્તે’’તિ મૂલપદં કત્વા સબ્બસાધારણવસેન વુત્તં. ‘‘વવત્થાને’’તિ સોતાપન્નસ્સ વસેન, ‘‘સલ્લક્ખણે ઉપલક્ખણે’’તિ સકદાગામિસ્સ વસેન, ‘‘પભેદે પભાવને’’તિ અનાગામિસ્સ વસેન, ‘‘જોતને વિરોચને પકાસને’’તિ અરહતો વસેન વુત્તન્તિ એવમ્પેત્થ યોજના કાતબ્બાતિ.
સુદ્ધિકપટિસમ્ભિદાઞાણનિદ્દેસવણ્ણના નિટ્ઠિતા.
ઇતિ સદ્ધમ્મપ્પકાસિનિયા પટિસમ્ભિદામગ્ગ-અટ્ઠકથાય
પઠમો ભાગો નિટ્ઠિતો.
નમો તસ્સ ભગવતો અરહતો સમ્માસમ્બુદ્ધસ્સ