૨૦-૨૪. ઞાણપઞ્ચકનિદ્દેસવણ્ણના

૭૫. ઞાણપઞ્ચકનિદ્દેસે તેસં પઞ્ચન્નં ઞાણાનં અનુપુબ્બસમ્બન્ધસબ્ભાવતો એકતોવ પુચ્છાવિસ્સજ્જનાનિ કતાનિ. અભિઞ્ઞાતા હોન્તીતિ ધમ્મસભાવલક્ખણજાનનવસેન સુટ્ઠુ ઞાતા હોન્તિ. ઞાતા હોન્તીતિ ઞાતપરિઞ્ઞાવસેન સભાવતો ઞાતત્તા ઞાતા નામ હોન્તિ. યેન ઞાણેન તે ધમ્મા ઞાતા હોન્તિ, તં ઞાતટ્ઠેન ઞાણં, પજાનનટ્ઠેન પઞ્ઞાતિ સમ્બન્ધો. ઇમિનાવ નયેન સેસઞાણાનિપિ યોજેતબ્બાનિ. પરિઞ્ઞાતા હોન્તીતિ સામઞ્ઞલક્ખણવસેન સમન્તતો ઞાતા હોન્તિ. તીરિતા હોન્તીતિ તીરણપરિઞ્ઞાવસેન અનિચ્ચાદિતો ઉપપરિક્ખિતા સમાપિતા નામ હોન્તિ. પહીના હોન્તીતિ અનિચ્ચાનુપસ્સનાદિના ઞાણેન નિચ્ચસઞ્ઞાદયો ભઙ્ગાનુપસ્સનતો પટ્ઠાય પહીના હોન્તિ. પરિચ્ચત્તા હોન્તીતિ પહાનવસેનેવ છડ્ડિતા નામ હોન્તિ. ભાવિતા હોન્તીતિ વડ્ઢિતા પરિભાવિતા ચ હોન્તિ. એકરસા હોન્તીતિ સકિચ્ચસાધનપટિપક્ખપહાનેન એકકિચ્ચા હોન્તિ, પચ્ચનીકતો વા વિમુત્તિવસેન વિમુત્તિરસેન એકરસા હોન્તિ. સચ્છિકતા હોન્તીતિ પટિલાભવસેન ફલધમ્મો પટિવેધવસેન નિબ્બાનધમ્મોતિ પચ્ચક્ખકતા હોન્તિ. ફસ્સિતા હોન્તીતિ પટિલાભફુસનેન પટિવેધફુસનેન ચ ફસ્સિતા અનુભૂતા હોન્તિ. ઇમાનિ પઞ્ચ ઞાણાનિ હેટ્ઠા સુતમયઞાણવસેન વુત્તાનિ, ઇધ સકિચ્ચસાધનવસેન.

ઞાણપઞ્ચકનિદ્દેસવણ્ણના નિટ્ઠિતા.