૧૩. વિમુત્તિઞાણનિદ્દેસવણ્ણના

૬૪. વિમુત્તિઞાણનિદ્દેસે સક્કાયદિટ્ઠીતિ વિજ્જમાનટ્ઠેન સતિ ખન્ધપઞ્ચકસઙ્ખાતે કાયે, સયં વા સતી તસ્મિં કાયે દિટ્ઠીતિ સક્કાયદિટ્ઠિ. વિચિકિચ્છાતિ વિગતા ચિકિચ્છા, સભાવં વા વિચિનન્તો એતાય કિચ્છતિ કિલમતીતિ વિચિકિચ્છા. સીલબ્બતપરામાસોતિ સીલેન સુદ્ધિ વતેન સુદ્ધિ સીલબ્બતેન સુદ્ધીતિ ગહિતઅભિનિવેસો. સો હિ સભાવં અતિક્કમિત્વા પરતો આમસતીતિ સીલબ્બતપરામાસો. ઉભિન્નં સમાનેપિ દિટ્ઠિભાવે તક્કઞ્ચ પરૂપદેસઞ્ચ વિના પકતિયા એવ સક્કાયદિટ્ઠિગહણતો પકતિભૂતાય વીસતિવત્થુકાય સક્કાયદિટ્ઠિયા પહાનેનેવ સબ્બદિટ્ઠિપ્પહાનદસ્સનત્થં સક્કાયદિટ્ઠિ વુત્તા. સીલબ્બતપરામાસો પન ‘‘સુદ્ધિપટિપદં પટિપજ્જામા’’તિ પટિપન્નાનં પટિપદાય મિચ્છાભાવદસ્સનત્થં વિસું વુત્તોતિ વેદિતબ્બો. તિણ્ણમ્પિ અનુસયપ્પહાનેનેવ પહાનં દસ્સેતું દિટ્ઠાનુસયો વિચિકિચ્છાનુસયોતિ વુત્તં, ન વિસું કિલેસત્તા. ઉપક્કિલેસાતિ કિલેસેન્તિ ઉપતાપેન્તિ વિબાધેન્તીતિ કિલેસા, થામગતટ્ઠેન ભુસા કિલેસાતિ ઉપક્કિલેસા. સમ્મા સમુચ્છિન્ના હોન્તીતિ સમુચ્છેદપ્પહાનેન અનુપ્પાદનિરોધેન સમ્મા સમુચ્છિન્ના હોન્તિ. સપરિયુટ્ઠાનેહીતિ ચિત્તં પરિયોનન્ધન્તાનિ ઉટ્ઠેન્તિ ઉપ્પજ્જન્તીતિ પરિયુટ્ઠાનાનિ, સમુદાચારપ્પત્તાનં કિલેસાનમેતં અધિવચનં. સહ પરિયુટ્ઠાનેહીતિ સપરિયુટ્ઠાનાનિ. તેહિ સપરિયુટ્ઠાનેહિ અનુસયિતઉપક્કિલેસેહિ. ચિત્તં વિમુત્તં હોતીતિ તેસં અભબ્બુપ્પત્તિકભૂતત્તા સન્તતિવસેન પવત્તમાનં ચિત્તં તતો વિમુત્તં નામ હોતિ. તદેવ સુટ્ઠુ વિમુત્તત્તા સુવિમુત્તં. તંવિમુત્તિઞાતટ્ઠેનાતિ તસ્સા વિમુત્તિયા જાનનટ્ઠેન.

વિમુત્તિઞાણનિદ્દેસવણ્ણના નિટ્ઠિતા.