૧૨. ફલઞાણનિદ્દેસવણ્ણના

૬૩. ફલઞાણનિદ્દેસે તંપયોગપ્પટિપ્પસ્સદ્ધત્તાતિ તસ્સ અજ્ઝત્તબહિદ્ધા વુટ્ઠાનપયોગસ્સ પટિપ્પસ્સદ્ધત્તા. મગ્ગો હિ સકક્ખણે કિલેસપ્પહાનેન ઉભતો વુટ્ઠાનપયોગં કરોતિ નામ, ફલક્ખણે કિલેસાનં પહીનત્તા મગ્ગસ્સ ઉભતો વુટ્ઠાનપયોગો પટિપ્પસ્સદ્ધો વૂપસન્તો નામ હોતિ. ઉપ્પજ્જતીતિ મગ્ગાનન્તરં સકિં વા દ્વિક્ખત્તું વા ઉપ્પજ્જતિ, ફલસમાપત્તિકાલે પન બહુક્ખત્તું, નિરોધા વુટ્ઠહન્તસ્સ દ્વિક્ખત્તું ઉપ્પજ્જતિ, સબ્બમ્પિ હિ તં પયોગપ્પટિપ્પસ્સદ્ધત્તા ઉપ્પજ્જતિ. મગ્ગસ્સેતં ફલન્તિ ફલં અપેક્ખિત્વા નપુંસકવચનં કતં. સકદાગામિમગ્ગક્ખણાદીસુપિ એકેકમગ્ગઙ્ગવસેનેવ વુટ્ઠાનયોજના વેદિતબ્બા.

ફલઞાણનિદ્દેસવણ્ણના નિટ્ઠિતા.