૭. આવટ્ટહારસમ્પાતવણ્ણના

૬૯. નેક્ખમ્મસઙ્કપ્પબહુલો કસિણવસેન મેત્તાદિવસેન વા લદ્ધાય ચિત્તેકગ્ગતાસઙ્ખાતાય ચિત્તમઞ્જૂસાય ચિત્તં ઠપેત્વા સમાધિંયેવ વા યથાલદ્ધં સંકિલેસતો રક્ખિતચિત્તો નામ હોતીતિ વુત્તં – ‘‘તસ્મા રક્ખિતચિત્તસ્સ સમ્માસઙ્કપ્પગોચરોતિ અયં સમથો’’તિ. પઞ્ઞાપધાના વિપસ્સનાતિ આહ – ‘‘સમ્માદિટ્ઠિપુરેક્ખારોતિ અયં વિપસ્સના’’તિ. અરિયમગ્ગેન દુક્ખસચ્ચે પરિઞ્ઞાતે ઉદયબ્બયદસ્સનં મત્થકપ્પત્તં નામ હોતીતિ વુત્તં – ‘‘ઞત્વાન ઉદયબ્બયન્તિ દુક્ખપરિઞ્ઞા’’તિ. ‘‘યં કિઞ્ચિ સમુદયધમ્મં, સબ્બં તં નિરોધધમ્મ’’ન્તિ હિ મગ્ગઞાણસ્સ પવત્તિદસ્સનાતિ. ઇમાનિ ચત્તારિ સચ્ચાનીતિ ચતુસચ્ચધમ્મવસેન આવટ્ટનં નિટ્ઠપેતિ. તત્થ પુરિમેન સચ્ચદ્વયટ્ઠપનેન વિસભાગધમ્મવસેન, પચ્છિમેન સભાગધમ્મવસેન આવટ્ટનન્તિ દટ્ઠબ્બં.

આવટ્ટહારસમ્પાતવણ્ણના નિટ્ઠિતા.