૮. વિભત્તિહારસમ્પાતવણ્ણના

૭૦. કુસલપક્ખો કુસલપક્ખેન નિદ્દિસિતબ્બોતિ રક્ખિતચિત્તસ્સાતિ સતિસંવરો, સો છબ્બિધો દ્વારવસેન ચક્ખુદ્વારસંવરો યાવ મનોદ્વારસંવરોતિ. સમ્માસઙ્કપ્પો તિવિધો – નેક્ખમ્મસઙ્કપ્પો, અબ્યાપાદસઙ્કપ્પો, અવિહિંસાસઙ્કપ્પોતિ. સમ્માદિટ્ઠિ અટ્ઠવિધા દુક્ખે ઞાણં…પે… ઇદપ્પચ્ચયતાપટિચ્ચસમુપ્પન્નેસુ ધમ્મેસુ ઞાણન્તિ. ઉદયબ્બયઞાણં પઞ્ઞાસવિધં અવિજ્જાસમુદયા રૂપસમુદયો…પે… વિપરિણામલક્ખણં પસ્સન્તોપિ વિઞ્ઞાણક્ખન્ધસ્સ વયં પસ્સતિ. થિનમિદ્ધાભિભવનં ચતુબ્બિધં ચતુમગ્ગવસેન. તત્થ સતિસંવરો લોકિયલોકુત્તરવસેન દુવિધો. તેસુ લોકિયો કામાવચરોવ, લોકુત્તરો દસ્સનભાવનાભેદતો દુવિધો. એકમેકો ચેત્થ ચતુસતિપટ્ઠાનભેદતો ચતુબ્બિધો. એસ નયો સમ્માસઙ્કપ્પાદીસુપિ.

અયં પન વિસેસો – સમ્માસઙ્કપ્પો પઠમજ્ઝાનવસેન રૂપાવચરોતિપિ નીહરિતબ્બો. પદટ્ઠાનવિભાગો પદટ્ઠાનહારસમ્પાતે વુત્તનયેન વત્તબ્બો. અકુસલપક્ખે અસંવરો ચક્ખુઅસંવરો…પે… કાયઅસંવરો, ચોપનકાયઅસંવરો, વાચાઅસંવરો, મનોઅસંવરોતિ અટ્ઠવિધો. મિચ્છાસઙ્કપ્પો કામવિતક્કાદિવસેન તિવિધો. અઞ્ઞાણં ‘‘દુક્ખે અઞ્ઞાણ’’ન્તિઆદિના અટ્ઠવિધા વિભત્તં. સમ્માદિટ્ઠિપટિપક્ખતો મિચ્છાદિટ્ઠિ દ્વાસટ્ઠિવિધેન વેદિતબ્બા. થિનમિદ્ધં ઉપ્પત્તિભૂમિતો પઞ્ચવિધન્તિ એવં અકુસલપક્ખે વિભત્તિ વેદિતબ્બા.

વિભત્તિહારસમ્પાતવણ્ણના નિટ્ઠિતા.