૧૩. સોધનહારવિભઙ્ગવણ્ણના

૪૫. તત્થ કતમો સોધનો હારોતિ સોધનહારવિભઙ્ગો. તત્થ ભગવા પદં સોધેતીતિ ‘‘અવિજ્જાય નિવુતો લોકો’’તિ (સુ. નિ. ૧૦૩૯; ચૂળનિ. અજિતમાણવપુચ્છા ૫૮, અજિતમાણવપુચ્છાનિદ્દેસ ૨) વદન્તો ભગવા – ‘‘કેનસ્સુ નિવુતો લોકો’’તિ (સુ. નિ. ૧૦૩૮; ચૂળનિ. અજિતમાણવપુચ્છા ૫૭, અજિતમાણવપુચ્છાનિદ્દેસ ૧) આયસ્મતા અજિતેન પુચ્છાવસેન વુત્તં પદં સોધેતિ નામ, તદત્થસ્સ વિસ્સજ્જનતો. નો ચ આરમ્ભન્તિ ન તાવ આરમ્ભં સોધેતિ, ઞાતું ઇચ્છિતસ્સ અત્થસ્સ અપરિયોસિતત્તા. સુદ્ધો આરમ્ભોતિ ઞાતું ઇચ્છિતસ્સ અત્થસ્સ પબોધિતત્તા સોધિતો આરમ્ભોતિ અત્થો. અઞ્ઞાણપક્ખન્દાનં દ્વેળ્હકજાતાનં વા પુચ્છનકાલે પુચ્છિતાનં પુચ્છાવિસયો અવિજટં મહાગહનં વિય મહાદુગ્ગં વિય ચ અન્ધકારં અવિભૂતં હોતિ. યદા ચ ભગવતા પણ્ડિતેહિ વા ભગવતો સાવકેહિ અપદે પદં દસ્સેન્તેહિ નિજ્જટં નિગુમ્બં કત્વા પઞ્હે વિસ્સજ્જિતે મહતા ગન્ધહત્થિના અભિભવિત્વા ઓભગ્ગપદાલિતો ગહનપ્પદેસો વિય વિગતન્ધકારો વિભૂતો ઉપટ્ઠહમાનો વિસોધિતો નામ હોતિ.

સોધનહારવિભઙ્ગવણ્ણના નિટ્ઠિતા.