૩૯. અઙ્ગુલિમાલત્થેરવત્થુ

ઉસભન્તિ ઇમં ધમ્મદેસનં સત્થા જેતવને વિહરન્તો અઙ્ગુલિમાલત્થેરં આરબ્ભ કથેસિ. વત્થુ ‘‘ન વે કદરિયા દેવલોકં વજન્તી’’તિ (ધ. પ. ૧૭૭) ગાથાવણ્ણનાય વુત્તમેવ. વુત્તઞ્હિ તત્થ –

ભિક્ખૂ અઙ્ગુલિમાલં પુચ્છિંસુ – ‘‘કિં નુ ખો, આવુસો અઙ્ગુલિમાલ, દુટ્ઠહત્થિં છત્તં ધારેત્વા ઠિતં દિસ્વા ભાયી’’તિ? ‘‘ન ભાયિં, આવુસો’’તિ. તે સત્થારં ઉપસઙ્કમિત્વા આહંસુ – ‘‘અઙ્ગુલિમાલો, ભન્તે, અઞ્ઞં બ્યાકરોતી’’તિ. સત્થા ‘‘ન, ભિક્ખવે, મમ પુત્તો અઙ્ગુલિમાલો ભાયતિ. ખીણાસવઉસભાનઞ્હિ અન્તરે જેટ્ઠકઉસભા મમ પુત્તસદિસા ભિક્ખૂ ન ભાયન્તી’’તિ વત્વા ઇમં ગાથમાહ –

૪૨૨. ‘‘ઉસભં પવરં વીરં, મહેસિં વિજિતાવિનં;

અનેજં ન્હાતકં બુદ્ધં, તમહં બ્રૂમિ બ્રાહ્મણ’’ન્તિ.

તસ્સત્થો – અચ્છમ્ભિતટ્ઠેન ઉસભસદિસતાય ઉસભં ઉત્તમટ્ઠેન પવરં વીરિયસમ્પત્તિયા વીરં મહન્તાનં સીલક્ખન્ધાદીનં એસિતત્તા મહેસિં તિણ્ણં મારાનં વિજિતત્તા વિજિતાવિનં ન્હાતકિલેસતાય ન્હાતકં ચતુસચ્ચબુદ્ધતાય બુદ્ધં તં એવરૂપં અહં બ્રાહ્મણં વદામીતિ અત્થો.

દેસનાવસાને બહૂ સોતાપત્તિફલાદીનિ પાપુણિંસૂતિ.

અઙ્ગુલિમાલત્થેરવત્થુ એકૂનચત્તાલીસં.