૨૫. પિલિન્દવચ્છત્થેરવત્થુ

અકક્કસન્તિ ઇમં ધમ્મદેસનં સત્થા વેળુવને વિહરન્તો પિલિન્દવચ્છત્થેરં આરબ્ભ કથેસિ.

સો કિરાયસ્મા ‘‘એહિ, વસલિ, યાહિ, વસલી’’તિઆદીનિ વદન્તો ગિહીપિ પબ્બજિતેપિ વસલિવાદેનેવ સમુદાચરતિ. અથેકદિવસં સમ્બહુલા ભિક્ખૂ સત્થુ આરોચેસું – ‘‘આયસ્મા, ભન્તે, પિલિન્દવચ્છો ભિક્ખૂ વસલિવાદેન સમુદાચરતી’’તિ. સત્થા તં પક્કોસાપેત્વા ‘‘સચ્ચં કિર ત્વં પિલિન્દવચ્છ ભિક્ખૂ વસલિવાદેન સમુદાચરસી’’તિ પુચ્છિત્વા ‘‘એવં, ભન્તે’’તિ વુત્તે તસ્સાયસ્મતો પુબ્બેનિવાસં મનસિકરિત્વા ‘‘મા ખો તુમ્હે, ભિક્ખવે, વચ્છસ્સ ભિક્ખુનો ઉજ્ઝાયિત્થ, ન, ભિક્ખવે, વચ્છો દોસન્તરો ભિક્ખૂ વસલિવાદેન સમુદાચરતિ, વચ્છસ્સ, ભિક્ખવે, ભિક્ખુનો પઞ્ચ જાતિસતાનિ અબ્બોકિણ્ણાનિ સબ્બાનિ તાનિ બ્રાહ્મણકુલે પચ્ચાજાતાનિ, સો તસ્સ દીઘરત્તં વસલિવાદો સમુદાચિણ્ણો, ખીણાસવસ્સ નામ કક્કસં ફરુસં પરેસં મમ્મઘટ્ટનવચનમેવ નત્થિ. આચિણ્ણવસેન હિ મમ પુત્તો એવં કથેતી’’તિ વત્વા ઇમં ગાથમાહ –

૪૦૮. ‘‘અકક્કસં વિઞ્ઞાપનિં, ગિરં સચ્ચમુદીરયે;

યાય નાભિસજે કઞ્ચિ, તમહં બ્રૂમિ બ્રાહ્મણ’’ન્તિ.

તત્થ અકક્કસન્તિ અફરુસં. વિઞ્ઞાપનિન્તિ અત્થવિઞ્ઞાપનિં. સચ્ચન્તિ ભૂતત્થં. નાભિસજેતિ યાય ગિરાય અઞ્ઞં કુજ્ઝાપનવસેન ન લગ્ગાપેય્ય, ખીણાસવો નામ એવરૂપમેવ ગિરં ભાસેય્ય, તસ્મા તમહં બ્રાહ્મણં વદામીતિ અત્થો.

દેસનાવસાને બહૂ સોતાપત્તિફલાદીનિ પાપુણિંસૂતિ.

પિલિન્દવચ્છત્થેરવત્થુ પઞ્ચવીસતિમં.