૨૪. મહાપન્થકત્થેરવત્થુ

યસ્સ રાગો ચાતિ ઇમં ધમ્મદેસનં સત્થા વેળુવને વિહરન્તો મહાપન્થકં આરબ્ભ કથેસિ.

સો હાયસ્મા ચૂળપન્થકં ચતૂહિ માસેહિ એકં ગાથં પગુણં કાતું અસક્કોન્તં ‘‘ત્વં સાસને અભબ્બો, ગિહિભોગાપિ પરિહીનો, કિં તે ઇધ વાસેન, ઇતો નિક્ખમા’’તિ વિહારા નિક્કડ્ઢિત્વા દ્વારં થકેસિ. ભિક્ખૂ કથં સમુટ્ઠાપેસું, ‘‘આવુસો, મહાપન્થકત્થેરેન ઇદં નામ કતં, ખીણાસવાનમ્પિ મઞ્ઞે કોધો ઉપ્પજ્જતી’’તિ. સત્થા આગન્ત્વા ‘‘કાય નુત્થ, ભિક્ખવે, એતરહિ કથાય સન્નિસિન્ના’’તિ પુચ્છિત્વા ‘‘ઇમાય નામા’’તિ વુત્તે ‘‘ન, ભિક્ખવે, ખીણાસવાનં રાગાદયો કિલેસા અત્થિ, મમ પુત્તેન અત્થપુરેક્ખારતાય ચેવ ધમ્મપુરેક્ખારતાય ચ કત’’ન્તિ વત્વા ઇમં ગાથમાહ –

૪૦૭. ‘‘યસ્સ રાગો ચ દોસો ચ, માનો મક્ખો ચ પાતિતો;

સાસપોરિવ આરગ્ગા, તમહં બ્રૂમિ બ્રાહ્મણ’’ન્તિ.

તત્થ આરગ્ગાતિ યસ્સેતે રાગાદયો કિલેસા, અયઞ્ચ પરગુણમક્ખનલક્ખણો મક્ખો આરગ્ગા સાસપો વિય પાતિતો, યથા સાસપો આરગ્ગે ન સન્તિટ્ઠતિ, એવં ચિત્તે ન સન્તિટ્ઠતિ, તમહં બ્રાહ્મણં વદામીતિ અત્થો.

દેસનાવસાને બહૂ સોતાપત્તિફલાદીનિ પાપુણિંસૂતિ.

મહાપન્થકત્થેરવત્થુ ચતુવીસતિમં.