૨૦. ખેમાભિક્ખુનીવત્થુ

ગમ્ભીરપઞ્ઞન્તિ ઇમં ધમ્મદેસનં સત્થા ગિજ્ઝકૂટે વિહરન્તો ખેમં નામ ભિક્ખુનિં આરબ્ભ કથેસિ.

એકદિવસઞ્હિ પઠમયામસમનન્તરે સક્કો દેવરાજા પરિસાય સદ્ધિં આગન્ત્વા સત્થુ સન્તિકે સારણીયધમ્મકથં સુણન્તો નિસીદિ. તસ્મિં ખણે ખેમા ભિક્ખુની ‘‘સત્થારં પસ્સિસ્સામી’’તિ આગન્ત્વા સક્કં દિસ્વા આકાસે ઠિતાવ સત્થારં વન્દિત્વા નિવત્તિ. સક્કો તં દિસ્વા ‘‘કો એસા, ભન્તે, આગચ્છમાના આકાસે ઠિતાવ સત્થારં વન્દિત્વા નિવત્તી’’તિ પુચ્છિ. સત્થા ‘‘એસા, મહારાજ, મમ ધીતા ખેમા નામ મહાપઞ્ઞા મગ્ગામગ્ગકોવિદા’’તિ વત્વા ઇમં ગાથમાહ –

૪૦૩. ‘‘ગમ્ભીરપઞ્ઞં મેધાવિં, મગ્ગામગ્ગસ્સ કોવિદં;

ઉત્તમત્થમનુપ્પત્તં, તમહં બ્રૂમિ બ્રાહ્મણ’’ન્તિ.

તત્થ ગબ્ભીરપઞ્ઞન્તિ ગમ્ભીરેસુ ખન્ધાદીસુ પવત્તાય પઞ્ઞાય સમન્નાગતં ધમ્મોજપઞ્ઞાય સમન્નાગતં મેધાવિં ‘‘અયં દુગ્ગતિયા મગ્ગો, અયં સુગતિયા મગ્ગો, અયં નિબ્બાનસ્સ મગ્ગો, અયં અમગ્ગો’’તિ એવં મગ્ગે ચ અમગ્ગે ચ છેકતાય મગ્ગામગ્ગસ્સ કોવિદં અરહત્તસઙ્ખાતં ઉત્તમત્થં અનુપ્પત્તં તમહં બ્રાહ્મણં વદામીતિ અત્થો.

દેસનાવસાને બહૂ સોતાપત્તિફલાદીનિ પાપુણિંસૂતિ.

ખેમાભિક્ખુનિવત્થુ વીસતિમં.