૧૭. સારિપુત્તત્થેરવત્થુ

અક્કોધનન્તિ ઇમં ધમ્મદેસનં સત્થા વેળુવને વિહરન્તો સારિપુત્તત્થેરં આરબ્ભ કથેસિ.

તદા કિર થેરો પઞ્ચહિ ભિક્ખુસતેહિ સદ્ધિં પિણ્ડાય ચરન્તો નાલકગામે માતુ ઘરદ્વારં અગમાસિ. અથ નં સા નિસીદાપેત્વા પરિવિસમાના અક્કોસિ – ‘‘અમ્ભો, ઉચ્છિટ્ઠખાદક ઉચ્છિટ્ઠકઞ્જિયં અલભિત્વા પરઘરેસુ ઉળુઙ્કપિટ્ઠેન ઘટ્ટિતકઞ્જિયં પરિભુઞ્જિતું અસીતિકોટિધનં પહાય પબ્બજિતોસિ, નાસિતમ્હા તયા, ભુઞ્જાહિ દાની’’તિ. ભિક્ખૂનમ્પિ ભત્તં દદમાના ‘‘તુમ્હેહિ મમ પુત્તો અત્તનો ચૂળુપટ્ઠાકો કતો, ઇદાનિ ભુઞ્જથા’’તિ વદેતિ. થેરો ભિક્ખં ગહેત્વા વિહારમેવ અગમાસિ. અથાયસ્મા રાહુલો સત્થારં પિણ્ડપાતેન આપુચ્છિ. અથ નં સત્થા આહ – ‘‘રાહુલ, કહં ગમિત્થા’’તિ? ‘‘અય્યિકાય ગામં, ભન્તે’’તિ. ‘‘કિં પન તે અય્યિકાય ઉપજ્ઝાયો વુત્તો’’તિ? ‘‘અય્યિકાય મે, ભન્તે, ઉપજ્ઝાયો અક્કુટ્ઠો’’તિ. ‘‘કિન્તિ વત્વા’’તિ? ‘‘ઇદં નામ, ભન્તે’’તિ. ‘‘ઉપજ્ઝાયેન પન તે કિં વુત્ત’’ન્તિ? ‘‘ન કિઞ્ચિ, ભન્તે’’તિ. તં સુત્વા ભિક્ખૂ ધમ્મસભાયં કથં સમુટ્ઠાપેસું, ‘‘આવુસો, અચ્છરિયા વત સારિપુત્તત્થેરસ્સ ગુણા, એવંનામસ્સ માતરિ અક્કોસન્તિયા કોધમત્તમ્પિ નાહોસી’’તિ. સત્થા આગન્ત્વા ‘‘કાય નુત્થ, ભિક્ખવે, એતરહિ કથાય સન્નિસિન્ના’’તિ પુચ્છિત્વા ‘‘ઇમાય નામા’’તિ વુત્તે, ‘‘ભિક્ખવે, ખીણાસવા નામ અક્કોધનાવ હોન્તી’’તિ વત્વા ઇમં ગાથમાહ –

૪૦૦. ‘‘અક્કોધનં વતવન્તં, સીલવન્તં અનુસ્સદં;

દન્તં અન્તિમસારીરં, તમહં બ્રૂમિ બ્રાહ્મણ’’ન્તિ.

તત્થ વતવન્તન્તિ ધુતવતેન, સમન્નાગતં ચતુપારિસુદ્ધિસીલેન સીલવન્તં, તણ્હાઉસ્સદાભાવેન અનુસ્સદં , છળિન્દ્રિયદમનેન દન્તં, કોટિયં ઠિતેન અત્તભાવેન અન્તિમસરીરં તમહં બ્રાહ્મણં વદામીતિ અત્થો.

દેસનાવસાને બહૂ સોતાપત્તિફલાદીનિ પાપુણિંસૂતિ.

સારિપુત્તત્થેરવત્થુ સત્તરસમં.