૯. સન્તકાયત્થેરવત્થુ

સન્તકાયોતિ ઇમં ધમ્મદેસનં સત્થા જેતવને વિહરન્તો સન્તકાયત્થેરં નામ આરબ્ભ કથેસિ.

તસ્સ કિર હત્થપાદકુક્કુચ્ચં નામ નાહોસિ, કાયવિજમ્ભનરહિતો સન્તઅત્તભાવોવ અહોસિ. સો કિર સીહયોનિતો આગતો થેરો. સીહા કિર એકદિવસં ગોચરં ગહેત્વા રજતસુવણ્ણમણિપવાળગુહાનં અઞ્ઞતરં પવિસિત્વા મનોસિલાતલે હરિતાલચુણ્ણેસુ સત્તાહં નિપજ્જિત્વા સત્તમે દિવસે ઉટ્ઠાય નિપન્નટ્ઠાનં ઓલોકેત્વા સચે નઙ્ગુટ્ઠસ્સ વા કણ્ણાનં વા હત્થપાદાનં વા ચલિતત્તા મનોસિલાહરિતાલચુણ્ણાનં વિપ્પકિણ્ણતં પસ્સન્તિ, ‘‘ન તે ઇદં જાતિયા વા ગોત્તસ્સ વા પતિરૂપ’’ન્તિ પુન સત્તાહં નિરાહારા નિપજ્જન્તિ, ચુણ્ણાનં પન વિપ્પકિણ્ણભાવે અસતિ ‘‘ઇદં તે જાતિગોત્તાનં અનુચ્છવિક’’ન્તિ આસયા નિક્ખમિત્વા વિજમ્ભિત્વા દિસા અનુવિલોકેત્વા તિક્ખત્તું સીહનાદં નદિત્વા ગોચરાય પક્કમન્તિ. એવરૂપાય સીહયોનિયા આગતો અયં ભિક્ખુ. તસ્સ કાયસમાચારં દિસ્વા ભિક્ખૂ સત્થુ આરોચેસું – ‘‘ન નો, ભન્તે, સન્તકાયત્થેરસદિસો ભિક્ખુ દિટ્ઠપુબ્બો. ઇમસ્સ હિ નિસિન્નટ્ઠાને હત્થચલનં વા પાદચલનં વા કાયવિજમ્ભિતા વા નત્થી’’તિ. તં સુત્વા સત્થા, ‘‘ભિક્ખવે, ભિક્ખુના નામ સન્તકાયત્થેરેન વિય કાયાદીહિ ઉપસન્તેનેવ ભવિતબ્બ’’ન્તિ વત્વા ઇમં ગાથમાહ –

૩૭૮. ‘‘સન્તકાયો સન્તવાચો, સન્તવા સુસમાહિતો;

વન્તલોકામિસો ભિક્ખુ, ઉપસન્તોતિ વુચ્ચતી’’તિ.

તત્થ સન્તકાયોતિ પાણાતિપાતાદીનં અભાવેન સન્તકાયો, મુસાવાદાદીનં અભાવેન સન્તવાચો, અભિજ્ઝાદીનં અભાવેન સન્તવા, કાયાદીનં તિણ્ણમ્પિ સુટ્ઠુ સમાહિતત્તા સુસમાહિતો, ચતૂહિ મગ્ગેહિ લોકામિસસ્સ વન્તતાય વન્તલોકામિસો ભિક્ખુ અબ્ભન્તરે રાગાદીનં ઉપસન્તતાય ઉપસન્તોતિ વુચ્ચતીતિ અત્થો.

દેસનાવસાને સો થેરો અરહત્તે પતિટ્ઠહિ, સમ્પત્તાનમ્પિ સાત્થિકા ધમ્મદેસના અહોસીતિ.

સન્તકાયત્થેરવત્થુ નવમં.