૯. ઉપકાજીવકવત્થુ

સબ્બાભિભૂતિ ઇમં ધમ્મદેસનં સત્થા અન્તરામગ્ગે ઉપકં આજીવકં આરબ્ભ કથેસિ.

એકસ્મિઞ્હિ સમયે સત્થા પત્તસબ્બઞ્ઞુતઞ્ઞાણો બોધિમણ્ડે સત્તસત્તાહં વીતિનામેત્વા અત્તનો પત્તચીવરમાદાય ધમ્મચક્કપવત્તનત્થં બારાણસિં સન્ધાય અટ્ઠારસયોજનમગ્ગં પટિપન્નો અન્તરામગ્ગે ઉપકં આજીવકં અદ્દસ. સોપિ સત્થારં દિસ્વા ‘‘વિપ્પસન્નાનિ ખો તે, આવુસો, ઇન્દ્રિયાનિ, પરિસુદ્ધો છવિવણ્ણો પરિયોદાતો, કંસિ ત્વં, આવુસો, ઉદ્દિસ્સ પબ્બજિતો, કો વા તે સત્થા, કસ્સ વા ત્વં ધમ્મં રોચેસી’’તિ પુચ્છિ. અથસ્સ સત્થા ‘‘મય્હં ઉપજ્ઝાયો વા આચરિયો વા નત્થી’’તિ વત્વા ઇમં ગાથમાહ –

૩૫૩. ‘‘સબ્બાભિભૂ સબ્બવિદૂહમસ્મિ,

સબ્બેસુ ધમ્મેસુ અનૂપલિત્તો;

સબ્બઞ્જહો તણ્હક્ખયે વિમુત્તો,

સયં અભિઞ્ઞાય કમુદ્દિસેય્ય’’ન્તિ.

તત્થ સબ્બાભિભૂતિ સબ્બેસં તેભૂમકધમ્માનં અભિભવનતો સબ્બાભિભૂ. સબ્બવિદૂતિ વિદિતસબ્બચતુભૂમકધમ્મો. સબ્બેસુ ધમ્મેસૂતિ સબ્બેસુપિ તેભૂમકધમ્મેસુ તણ્હાદિટ્ઠીહિ અનૂપલિત્તો. સબ્બઞ્જહોતિ સબ્બે તેભૂમકધમ્મે જહિત્વા ઠિતો. તણ્હક્ખયે વિમુત્તોતિ તણ્હક્ખયન્તે ઉપ્પાદિતે તણ્હક્ખયસઙ્ખાતે અરહત્તે અસેખાય વિમુત્તિયા વિમુત્તો. સયં અભિઞ્ઞાયાતિ અભિઞ્ઞેય્યાદિભેદે ધમ્મે સયમેવ જાનિત્વા. કમુદ્દિસેય્યન્તિ ‘‘અયં મે ઉપજ્ઝાયો વા આચરિયો વા’’તિ કં નામ ઉદ્દિસેય્યન્તિ.

દેસનાવસાને ઉપકો આજીવકો તથાગતસ્સ વચનં નેવાભિનન્દિ, ન પટિક્કોસિ. સીસં પન ચાલેત્વા જિવ્હં નિલ્લાળેત્વા એકપદિકમગ્ગં ગહેત્વા અઞ્ઞતરં લુદ્દકનિવાસનટ્ઠાનં અગમાસીતિ.

ઉપકાજીવકવત્થુ નવમં.