૨. અઞ્ઞતરબ્રાહ્મણવત્થુ

અનુપુબ્બેનાતિ ઇમં ધમ્મદેસનં સત્થા જેતવને વિહરન્તો અઞ્ઞતરબ્રાહ્મણં આરબ્ભ કથેસિ.

સો કિર એકદિવસં પાતોવ નિક્ખમિત્વા ભિક્ખૂનં ચીવરપારુપનટ્ઠાને ભિક્ખૂ ચીવરં પારુપન્તે ઓલોકેન્તો અટ્ઠાસિ. તં પન ઠાનં વિરૂળ્હતિણં હોતિ. અથેકસ્સ ભિક્ખુનો ચીવરં પારુપન્તસ્સ ચીવરકણ્ણો તિણેસુ પવટ્ટેન્તો ઉસ્સાવબિન્દૂહિ તેમિ. બ્રાહ્મણો ‘‘ઇમં ઠાનં અપ્પહરિતં કાતું વટ્ટતી’’તિ પુનદિવસે કુદ્દાલં આદાય ગન્ત્વા તં ઠાનં તચ્છેત્વા ખલમણ્ડલસદિસં અકાસિ. પુનદિવસેપિ તં ઠાનં આગન્ત્વા ભિક્ખૂસુ ચીવરં પારુપન્તેસુ એકસ્સ ચીવરકણ્ણં ભૂમિયં પતિત્વા પંસુમ્હિ પવટ્ટમાનં દિસ્વા ‘‘ઇધ વાલુકં ઓકિરિતું વટ્ટતી’’તિ ચિન્તેત્વા વાલુકં આહરિત્વા ઓકિરિ.

અથેકદિવસં પુરેભત્તં ચણ્ડો આતપો અહોસિ, તદાપિ ભિક્ખૂનં ચીવરં પારુપન્તાનં ગત્તતો સેદે મુચ્ચન્તે દિસ્વા ‘‘ઇધ મયા મણ્ડપં કારેતું વટ્ટતી’’તિ ચિન્તેત્વા મણ્ડપં કારેસિ. પુનદિવસે પાતોવ વસ્સં વસ્સિ, વદ્દલિકં અહોસિ. તદાપિ બ્રાહ્મણો ભિક્ખૂ ઓલોકેન્તોવ ઠિતો તિન્તચીવરકે ભિક્ખૂ દિસ્વા ‘‘એત્થ મયા સાલં કારેતું વટ્ટતી’’તિ સાલં કારેત્વા ‘‘ઇદાનિ સાલમહં કરિસ્સામી’’તિ ચિન્તેત્વા બુદ્ધપ્પમુખં ભિક્ખુસઙ્ઘં નિમન્તેત્વા અન્તો ચ બહિ ચ ભિક્ખૂ નિસીદાપેત્વા ભત્તકિચ્ચાવસાને અનુમોદનત્થાય સત્થુ પત્તં ગહેત્વા, ‘‘ભન્તે, અહં ભિક્ખૂનં ચીવરપારુપનકાલે ઇમસ્મિં ઠાને ઓલોકેન્તો ઠિતો ઇદઞ્ચિદઞ્ચ દિસ્વા ઇદઞ્ચિદઞ્ચ કારેસિ’’ન્તિ આદિતો પટ્ઠાય સબ્બં તં પવત્તિં આરોચેસિ. સત્થા તસ્સ વચનં સુત્વા, ‘‘બ્રાહ્મણ, પણ્ડિતા નામ ખણે ખણે થોકં કુસલં કરોન્તા અનુપુબ્બેન અત્તનો અકુસલમલં નીહરન્તિયેવા’’તિ વત્વા ઇમં ગાથમાહ –

૨૩૯. ‘‘અનુપુબ્બેન મેધાવી, થોકં થોકં ખણે ખણે;

કમ્મારો રજતસ્સેવ, નિદ્ધમે મલમત્તનો’’તિ.

તત્થ અનુપુબ્બેનાતિ અનુપટિપાટિયા. મેધાવીતિ ધમ્મોજપઞ્ઞાય સમન્નાગતો. ખણે ખણેતિ ઓકાસે ઓકાસે કુસલં કરોન્તો. કમ્મારો રજતસ્સેવાતિ યથા સુવણ્ણકારો એકવારમેવ સુવણ્ણં તાપેત્વા કોટ્ટેત્વા મલં નીહરિત્વા પિલન્ધનવિકતિં કાતું ન સક્કોતિ, પુનપ્પુનં તાપેન્તો કોટ્ટેન્તો પન મલં નીહરતિ, તતો અનેકવિધં પિલન્ધનવિકતિં કરોતિ, એવમેવ પુનપ્પુનં કુસલં કરોન્તો પણ્ડિતો અત્તનો રાગાદિમલં નિદ્ધમેય્ય, એવં નિદ્ધન્તમલો નિક્કિલેસોવ હોતીતિ અત્થો.

દેસનાવસાને બ્રાહ્મણો સોતાપત્તિફલે પતિટ્ઠતિ, મહાજનસ્સાપિ સાત્થિકા ધમ્મદેસના અહોસીતિ.

અઞ્ઞતરબ્રાહ્મણવત્થુ દુતિયં.