૧૧. ઉજ્ઝાનસઞ્ઞિત્થેરવત્થુ

પરવજ્જાનુપસ્સિસ્સાતિ ઇમં ધમ્મદેસનં સત્થા જેતવને વિહરન્તો ઉજ્ઝાનસઞ્ઞિં નામ એકં થેરં આરબ્ભ કથેસિ.

સો કિર ‘‘અયં એવં નિવાસેતિ, એવં પારુપતી’’તિ ભિક્ખૂનં અન્તરમેવ ગવેસન્તો વિચરતિ. ભિક્ખૂ ‘‘અસુકો નામ, ભન્તે, થેરો એવં કરોતી’’તિ સત્થુ આરોચેસું. સત્થા, ‘‘ભિક્ખવે, વત્તસીસે ઠત્વા એવં ઓવદન્તો અનનુપવાદો. યો પન નિચ્ચં ઉજ્ઝાનસઞ્ઞિતાય પરેસં અન્તરં પરિયેસમાનો એવં વત્વા વિચરતિ, તસ્સ ઝાનાદીસુ એકોપિ વિસેસો નુપ્પજ્જતિ, કેવલં આસવાયેવ વડ્ઢન્તી’’તિ વત્વા ઇમં ગાથમાહ –

૨૫૩. ‘‘પરવજ્જાનુપસ્સિસ્સ, નિચ્ચં ઉજ્ઝાનસઞ્ઞિનો;

આસવા તસ્સ વડ્ઢન્તિ, આરા સો આસવક્ખયા’’તિ.

તત્થ ઉજ્ઝાનસઞ્ઞિનોતિ એવં નિવાસેતબ્બં એવં પારુપિતબ્બન્તિ પરેસં અન્તરગવેસિતાય ઉજ્ઝાનબહુલસ્સ પુગ્ગલસ્સ ઝાનાદીસુ એકધમ્મોપિ ન વડ્ઢતિ, અથ ખો આસવાવ તસ્સ વડ્ઢન્તિ. તેનેવ કારણેન સો અરહત્તમગ્ગસઙ્ખાતા આસવક્ખયા આરા દૂરં ગતોવ હોતીતિ.

દેસનાવસાને બહૂ સોતાપત્તિફલાદીનિ પાપુણિંસૂતિ.

ઉજ્ઝાનસઞ્ઞિત્થેરવત્થુ એકાદસમં.