૮. છબ્બગ્ગિયવત્થુ

કાયપ્પકોપન્તિ ઇમં ધમ્મદેસનં સત્થા વેળુવને વિહરન્તો છબ્બગ્ગિયે ભિક્ખૂ આરબ્ભ કથેસિ.

એકદિવસઞ્હિ સત્થા વેળુવને વિહરન્તો તેસં છબ્બગ્ગિયાનં ઉભોહિ હત્થેહિ યટ્ઠિયો ગહેત્વા કટ્ઠપાદુકા આરુય્હ પિટ્ઠિપાસાણે ચઙ્કમન્તાનં ખટખટાતિસદ્દં સુત્વા, ‘‘આનન્દ, કિં સદ્દો નામેસો’’તિ પુચ્છિત્વા ‘‘છબ્બગ્ગિયાનં પાદુકા આરુય્હ ચઙ્કમન્તાનં ખટખટસદ્દો’’તિ સુત્વા સિક્ખાપદં પઞ્ઞાપેત્વા ‘‘ભિક્ખુના નામ કાયાદીનિ રક્ખિતું વટ્ટતી’’તિ વત્વા ધમ્મં દેસેન્તો ઇમા ગાથા અભાસિ –

૨૩૧. ‘‘કાયપ્પકોપં રક્ખેય્ય, કાયેન સંવુતો સિયા;

કાયદુચ્ચરિતં હિત્વા, કાયેન સુચરિતં ચરે.

૨૩૨. ‘‘વચીપકોપં રક્ખેય્ય, વાચાય સંવુતો સિયા;

વચીદુચ્ચરિતં હિત્વા, વાચાય સુચરિતં ચરે.

૨૩૩. ‘‘મનોપકોપં રક્ખેય્ય, મનસા સંવુતો સિયા;

મનોદુચ્ચરિતં હિત્વા, મનસા સુચરિતં ચરે.

૨૩૪. ‘‘કાયેન સંવુતા ધીરા, અથો વાચાય સંવુતા;

મનસા સંવુતા ધીરા, તે વે સુપરિસંવુતા’’તિ.

તત્થ કાયપ્પકોપન્તિ તિવિધં કાયદુચ્ચરિતં રક્ખેય્ય. કાયેન સંવુતોતિ કાયદ્વારે દુચ્ચરિતપવેસનં નિવારેત્વા સંવુતો પિહિતદ્વારો સિયા. યસ્મા પન કાયદુચ્ચરિતં હિત્વા કાયસુચરિતં ચરન્તો ઉભયમ્પેતં કરોતિ, તસ્મા કાયદુચ્ચરિતં હિત્વા, કાયેન સુચરિતં ચરેતિ વુત્તં. અનન્તરગાથાસુપિ એસેવ નયો. કાયેન સંવુતા ધીરાતિ યે પણ્ડિતા પાણાતિપાતાદીનિ અકરોન્તા કાયેન, મુસાવાદાદીનિ અકરોન્તા વાચાય, અભિજ્ઝાદીનિ અસમુટ્ઠપેન્તા મનસા સંવુતા, તે ઇધ લોકસ્મિં સુસંવુતા સુરક્ખિતા સુગોપિતા સુપિહિતદ્વારાતિ અત્થો.

દેસનાવસાને બહૂ સોતાપત્તિફલાદીનિ પાપુણિંસૂતિ.

છબ્બગ્ગિયવત્થુ અટ્ઠમં.

કોધવગ્ગવણ્ણના નિટ્ઠિતા.

સત્તરસમો વગ્ગો.