૮. સમ્બહુલભિક્ખુવત્થુ

સુખો બુદ્ધાનન્તિ ઇમં ધમ્મદેસનં સત્થા જેતવને વિહરન્તો સમ્બહુલાનં ભિક્ખૂનં કથં આરબ્ભ કથેસિ.

એકદિવસઞ્હિ પઞ્ચસતભિક્ખૂ ઉપટ્ઠાનસાલાયં નિસિન્ના, ‘‘આવુસો, કિં નુ ખો ઇમસ્મિં લોકે સુખ’’ન્તિ કથં સમુટ્ઠાપેસું? તત્થ કેચિ ‘‘રજ્જસુખસદિસં સુખં નામ નત્થી’’તિ આહંસુ. કેચિ કામસુખસદિસં, કેચિ ‘‘સાલિમંસભોજનાદિસદિસં સુખં નામ નત્થી’’તિ આહંસુ. સત્થા તેસં નિસિન્નટ્ઠાનં ગન્ત્વા ‘‘કાય નુત્થ, ભિક્ખવે, એતરહિ કથાય સન્નિસિન્ના’’તિ પુચ્છિત્વા ‘‘ઇમાય નામા’’તિ વુત્તે, ‘‘ભિક્ખવે, કિં કથેથ? ઇદઞ્હિ સબ્બમ્પિ સુખં વટ્ટદુક્ખપરિયાપન્નમેવ, ઇમસ્મિં લોકે બુદ્ધુપ્પાદો ધમ્મસ્સવનં, સઙ્ઘસામગ્ગી, સમ્મોદમાનભાવોતિ ઇદમેવ સુખ’’ન્તિ વત્વા ઇમં ગાથમાહ –

૧૯૪. ‘‘સુખો બુદ્ધાનમુપ્પાદો, સુખા સદ્ધમ્મદેસના;

સુખા સઙ્ઘસ્સ સામગ્ગી, સમગ્ગાનં તપો સુખો’’તિ.

તત્થ બુદ્ધાનમુપ્પાદોતિ યસ્મા બુદ્ધા ઉપ્પજ્જમાના મહાજનં રાગકન્તારાદીહિ તારેન્તિ, તસ્મા બુદ્ધાનં ઉપ્પાદો સુખો ઉત્તમો. યસ્મા સદ્ધમ્મદેસનં આગમ્મ જાતિઆદિધમ્મા સત્તા જાતિઆદીહિ મુચ્ચન્તિ, તસ્મા સદ્ધમ્મદેસના સુખા. સામગ્ગીતિ સમચિત્તતા, સાપિ સુખા એવ. સમગ્ગાનં પન એકચિત્તાનં યસ્મા બુદ્ધવચનં વા ઉગ્ગણ્હિતું ધુતઙ્ગાનિ વા પરિહરિતું સમણધમ્મં વા કાતું સક્કા, તસ્મા સમગ્ગાનં તપો સુખોતિ વુત્તં. તેનેવાહ – ‘‘યાવકીવઞ્ચ, ભિક્ખવે, ભિક્ખૂ સમગ્ગા સન્નિપતિસ્સન્તિ, સમ્મગ્ગા વુટ્ઠહિસ્સન્તિ, સમગ્ગા સઙ્ઘકરણીયાનિ કરિસ્સન્તિ, વુદ્ધિયેવ, ભિક્ખવે, ભિક્ખૂનં પાટિકઙ્ખા, નો પરિહાની’’તિ (દી. નિ. ૨.૧૩૬).

દેસનાવસાને તે ભિક્ખૂ અરહત્તે પતિટ્ઠહિંસુ, મહાજનસ્સાપિ સાત્થિકા ધમ્મદેસના અહોસીતિ.

સમ્બહુલભિક્ખુવત્થુ અટ્ઠમં.