૩-૭. ઇસ્સરિયકામકારિકાકથાવણ્ણના

૯૧૦-૯૧૪. ઇદાનિ ઇસ્સરિયકામકારિકાકથા નામ હોતિ. છદ્દન્તજાતકાદીનિ સન્ધાય ‘‘બોધિસત્તો ઇસ્સરિયકામકારિકાહેતુ વિનિપાતં ગચ્છતિ, ગબ્ભસેય્યં ઓક્કમતિ, દુક્કરકારિકં અકાસિ, અપરન્તપં અકાસિ, અઞ્ઞં સત્થારં ઉદ્દિસી’’તિ યેસં લદ્ધિ, સેય્યથાપિ અન્ધકાનં, તે સન્ધાય પુચ્છા સકવાદિસ્સ, પટિઞ્ઞા ઇતરસ્સ. સેસં પઠમકથાયં ઉત્તાનત્થમેવ. દુતિયકથાયં ઇદ્ધિમાતિ યદિ ઇસ્સરિયકામકારિકાહેતુ ગચ્છેય્ય, ઇદ્ધિયા ગચ્છેય્ય, ન કમ્મવસેનાતિ ચોદનત્થં વુત્તં. ઇતરો પન પઠમપઞ્હે ભાવનામયં સન્ધાય પટિક્ખિપતિ. દુતિયપઞ્હે પુઞ્ઞિદ્ધિં સન્ધાય પટિજાનાતિ. તતિયકથાયં ઇસ્સરિયકામકારિકાહેતુ નામ દુક્કરકારિકા મિચ્છાદિટ્ઠિયા કરિયતિ. યદિ ચ સો તં કરેય્ય, સસ્સતાદીનિપિ ગણ્હેય્યાતિ ચોદનત્થં સસ્સતો લોકોતિઆદિ વુત્તં. ચતુત્થકથાયમ્પિ એસેવ નયોતિ.

ઇસ્સરિયકામકારિકાકથાવણ્ણના.