૬. સબ્બદિસાકથાવણ્ણના

૮૮૬. ઇદાનિ સબ્બદિસાકથા નામ હોતિ. તત્થ ચતૂસુ દિસાસુ હેટ્ઠા ઉપરીતિ સમન્તતો લોકધાતુસન્નિવાસં, સબ્બલોકધાતૂસુ ચ બુદ્ધા અત્થીતિ અત્તનો વિકપ્પસિપ્પં ઉપ્પાદેત્વા ‘‘સબ્બદિસાસુ બુદ્ધા તિટ્ઠન્તી’’તિ યેસં લદ્ધિ, સેય્યથાપિ મહાસઙ્ઘિકાનં; તે સન્ધાય પુચ્છા સકવાદિસ્સ, પટિઞ્ઞા ઇતરસ્સ. પુરત્થિમાયાતિ પુટ્ઠો સક્યમુનિં સન્ધાય પટિક્ખિપતિ. પુન પુટ્ઠો લદ્ધિવસેન અઞ્ઞલોકધાતુયં ઠિતં સન્ધાય પટિજાનાતિ. કિન્નામો સો ભગવાતિઆદિ ‘‘સચે ત્વં જાનાસિ, નામાદિવસેન નં કથેહી’’તિ ચોદનત્થં વુત્તં. ઇમિના ઉપાયેન સબ્બત્થ અત્થો વેદિતબ્બોતિ.

સબ્બદિસાકથાવણ્ણના.