૧૦. રૂપારૂપધાતુપરિયાપન્નકથાવણ્ણના

૭૭૧-૭૭૫. ઇદાનિ રૂપરાગો રૂપધાતુપરિયાપન્નો અરૂપરાગો અરૂપધાતુપરિયાપન્નોતિ કથા નામ હોતિ. તત્થ યસ્મા કામરાગો કામધાતુપરિયાપન્નો, તસ્મા રૂપરાગારૂપરાગેહિપિ રૂપધાતુઅરૂપધાતુપરિયાપન્નેહિ ભવિતબ્બન્તિ યેસં લદ્ધિ, સેય્યથાપિ અન્ધકાનં, તે સન્ધાય પુચ્છા સકવાદિસ્સ, પટિઞ્ઞા ઇતરસ્સ. સેસં હેટ્ઠા વુત્તનયેનેવ વેદિતબ્બં. કેવલઞ્હિ તત્થ ‘‘રૂપધાતું અનુસેતિ, અરૂપધાતું અનુસેતી’’તિ પદં વિસેસો. સા ચ લદ્ધિ અન્ધકાનઞ્ચેવ સમ્મિતિયાનઞ્ચ. અયં અન્ધકાનંયેવાતિ.

રૂપરાગો રૂપધાતુપરિયાપન્નો અરૂપરાગો અરૂપધાતુપરિયાપન્નોતિકથાવણ્ણના.

રૂપારૂપધાતુપરિયાપન્નકથાવણ્ણના.

સોળસમો વગ્ગો.