૨. કમ્મકથાવણ્ણના

૬૩૩-૬૩૫. ઇદાનિ કમ્મકથા નામ હોતિ. તત્થ ‘‘નાહં, ભિક્ખવે, સઞ્ચેતનિકાનં કમ્માન’’ન્તિ (અ. નિ. ૧૦.૨૧૭) સુત્તપદં નિસ્સાય ‘‘સબ્બં કમ્મં સવિપાક’’ન્તિ યેસં લદ્ધિ, સેય્યથાપિ મહાસંઘિકાનં; તેસં ‘‘ચેતનાહં, ભિક્ખવે, કમ્મં વદામી’’તિ (અ. નિ. ૬.૬૩) સત્થારા અવિસેસેન ચેતના ‘‘કમ્મ’’ન્તિ વુત્તા; સા ચ કુસલાકુસલાવ સવિપાકા, અબ્યાકતા અવિપાકાતિ ઇમં વિભાગં દસ્સેતું સબ્બં કમ્મન્તિ પુચ્છા સકવાદિસ્સ, પટિઞ્ઞા ઇતરસ્સ. પુન સબ્બા ચેતનાતિ પઞ્હેસુ અબ્યાકતં સન્ધાય પટિક્ખેપો, કુસલાકુસલે સન્ધાય પટિઞ્ઞા વેદિતબ્બા. વિપાકાબ્યાકતાતિઆદિ સવિપાકાવિપાકચેતનં સરૂપેન દસ્સેતું વુત્તં. સેસમેત્થ ઉત્તાનત્થમેવ. ‘‘નાહં, ભિક્ખવે’’તિ સુત્તં સતિ પચ્ચયે દિટ્ઠધમ્માદીસુ વિપાકપટિસંવેદનં સન્ધાય વુત્તં, તસ્મા અસાધકન્તિ.

કમ્મકથાવણ્ણના.