૨. ઠાનસુત્તવણ્ણના

૧૯૨. દુતિયે ઠાનાનીતિ કારણાનિ. ઠાનેહીતિ કારણેહિ. સોચેય્યન્તિ સુચિભાવો. સંવસમાનોતિ એકતો વસમાનો. ન સન્તતકારીતિ ન સતતકારી. ન સન્તતવુત્તિ સીલેસૂતિ સતતં સબ્બકાલં સીલજીવિતં ન જીવતીતિ અત્થો. સંવોહારમાનોતિ કથેન્તો. એકેન એકો વોહરતીતિ એકેન સદ્ધિં એકો હુત્વા કથેતિ. વોક્કમતીતિ ઓક્કમતિ. પુરિમવોહારા પચ્છિમવોહારન્તિ પુરિમકથાય પચ્છિમકથં, પુરિમકથાય ચ પચ્છિમકથા, પચ્છિમકથાય ચ પુરિમકથા ન સમેતીતિ અત્થો.

ઞાતિબ્યસનેનાતિઆદીસુ ઞાતીનં બ્યસનં ઞાતિબ્યસનં, ઞાતિવિનાસોતિ અત્થો. દુતિયપદેપિ એસેવ નયો. રોગબ્યસને પન રોગોયેવ આરોગ્યવિનાસનતો બ્યસનં રોગબ્યસનં. અનુપરિવત્તન્તીતિ અનુબન્ધન્તિ. લાભો ચાતિઆદીસુ એકં અત્તભાવં લાભો અનુપરિવત્તતિ, એકં અલાભોતિ એવં નયો નેતબ્બો. સાકચ્છાયમાનોતિ પઞ્હપુચ્છનવિસ્સજ્જનવસેન સાકચ્છં કરોન્તો. યથાતિ યેનાકારેન. ઉમ્મગ્ગોતિ પઞ્હુમ્મગ્ગો. અભિનીહારોતિ પઞ્હાભિસઙ્ખરણવસેન ચિત્તસ્સ અભિનીહારો. સમુદાહારોતિ પઞ્હપુચ્છનં. સન્તન્તિ પચ્ચનીકસન્તતાય સન્તં કત્વા ન કથેતીતિ અત્થો. પણીતન્તિ અતપ્પકં. અતક્કાવચરન્તિ યથા તક્કેન નયગ્ગાહેન ગહેતું સક્કા હોતિ, એવં ન કથેતીતિ અત્થો. નિપુણન્તિ સણ્હં. પણ્ડિતવેદનીયન્તિ પણ્ડિતેહિ જાનિતબ્બકં. સેસં સબ્બત્થ વુત્તાનુસારેનેવ વેદિતબ્બં.