૪. અભયસુત્તવણ્ણના

૧૮૪. ચતુત્થે કિચ્છાજીવિતકારણટ્ઠેન રોગોવ રોગાતઙ્કો નામ. ફુટ્ઠસ્સાતિ તેન રોગાતઙ્કેન સમન્નાગતસ્સ. ઉરત્તાળિં કન્દતીતિ ઉરં તાળેત્વા રોદતિ. અકતકલ્યાણોતિઆદીસુ કલ્યાણં વુચ્ચતિ પુઞ્ઞકમ્મં, તં અકતં એતેનાતિ અકતકલ્યાણો. સેસપદેસુપિ એસેવ નયો. પુઞ્ઞકમ્મમેવ હિ કોસલ્લસમ્ભૂતત્તા કુસલં, ભીતસ્સ પરિત્તાયકત્તા ભીરુત્તાણન્તિ વુચ્ચતિ. કતપાપોતિઆદીસુ પાપં વુચ્ચતિ લામકં અકુસલકમ્મં. લુદ્દન્તિ કક્ખળકમ્મં. કિબ્બિસન્તિ સમલં અપરિસુદ્ધકમ્મં. કઙ્ખી હોતીતિ બુદ્ધધમ્મસઙ્ઘગુણેસુ ચેવ સિક્ખાય ચ પુબ્બન્તે ચ અપરન્તે ચ પુબ્બન્તાપરન્તે ચ પટિચ્ચસમુપ્પાદે ચાતિ અટ્ઠસુ ઠાનેસુ કઙ્ખાય સમન્નાગતો હોતિ. વિચિકિચ્છીતિ વિચિકિચ્છાય સમન્નાગતો સાસનસદ્ધમ્મે ન નિટ્ઠં ગતો, ઉગ્ગહપરિપુચ્છાવસેન નિટ્ઠં ગન્તું ન સક્કોતિ. ઇમિના નયેન સબ્બત્થ અત્થો વેદિતબ્બો.